Ogege i Pharaoh o rhon taghene emọ Israel i nẹ Egypt ne, no wene ẹhẹn yen. Nọ ta rẹn isodja ye: ‘Are i mwuegbe oma are, na hatua aye! Manẹ e vwe tiobọnu aye-e.’ Ọye ọrhẹ isodja ye ni hatua emọ Israel.

Jehova ọ hẹrote ihworho yi, nyoma rọ ha avwre suẹn aye urhiọke ye te owuọwọn, ason orho te, nọ ha erhanren suẹn aye. No sunrun rẹ aye te Urhie owu re se i Red, nọ ta rẹn aye nẹ aye i ronmoma avwaye.

Emọ Israel ni kpararo mẹrẹn i Pharaoh ọrhẹ isodja ye, re le aye. O vwo ekete aye ina nya-a. Aye ni bunu se i Moses: ‘Ọwan ine hwuo! Manẹ wa nyajẹ ame vwo uvuẹn Egypt.’ Ọrẹn, Moses nọ tare: ‘Are i vwa zofẹ-ẹn. Are i mevigbanhon, nẹ are i mẹrẹn oborẹ i Jehova ono simi ọwan lele.’ Moses ọ ghini hẹroso i Jehova, rhomaran?

Jehova nọ ta rẹn emọ Israel nẹ aye i tuẹn onya rhọ. Ason ọrana, Jehova no fi avwre na rhẹ uvwre emọ Israel ọrhẹ itu Egypt. Ekete itu Egypt i havwọ, o mwuokuku. Ọrẹn, emọ Israel a mẹrẹn ude ekete aye i havwọ.

Jehova nọ ta rẹn i Moses, nọ rionbọ ye rhẹ urhie na. Omarana, Jehova no rurie nẹ aphẹrẹ ọgbogbanhon no zu ọsoso ason ẹdẹ ọrana. Urhie na nọ ghalẹre akwava, izede no rhiefirhọ uvuẹn erhẹrhẹ urhie na.  Emọ Israel ri te iduduru buebun ni nyavrẹn otọre ọkaka uvwre ame ro mwuze, riẹ obọreva urhie na.

Pharaoh ọrhẹ isodja ye ni ha kpahen emọ Israel. Jehova no rurie nẹ ọyanghan ọ homaphia uvwre aye. Omarana, ikoro ekalokpọ owọnren aye ni shoro nie. Isodja na ne bunu: ‘Jenẹ a ghwẹrioma nẹ aran! Jehova yọ wọnrọn harẹn aye.’

Jehova nọ ta rẹn i Moses: ‘Rionbọ rhẹ urhie na.’ Ogege, ame ro mwuze na, nọ bọmọ rhurhu isodja Egypt. Pharaoh ọrhẹ isodja ye ephian ni hwuru. O vwo ohworho owuorowu ro simirhọ-ọ.

Ọke emọ Israel a nyavrẹn urhie na hin, aye na so ijoro jiri Osolobrugwẹ, aye na ta: “So ijoro jiri Jehova, nime ọye yọ mai vwo omẹgbanhon. O rurie nẹ iyesi na ọrhẹ ihworho ra ghwa ye, i hwu rhẹ urhie na.” Ọke ihworho na a so ijoro, emẹse na ne gbe igbegbe, aye na jeghwai kporo akisẹ. Oma nọ merhen aye, nime aye i vwo ugbomọphẹ ne.