Onyẹ Israel owu re se Elkanah ọ rọnmọ emẹse awanva, odẹ aye Hannah ọrhẹ Penninah, ọrẹn, Hannah yẹ Elkanah ọ mai vwo ẹguọlọ kpahen. Penninah nọ ha i Hannah djechẹẹ, nime Hannah o ji vwiẹ ọmọ-ọ, ọrẹn, Penninah o vwiẹ emọ buebun ne. Kẹgbukpe kẹgbukpe, Elkanah ọrhẹ ekrun ọnẹyen ephian e riẹ tabernacle rọ ha uvuẹn Shiloh nẹ aye i ya ha ẹga rẹn i Jehova. Ọke owu aye e riẹ avwaye, Elkanah nọ mẹrẹnvwrurhe taghene Hannah o mwuomarhọ omamọ. Elkanah nọ ta rẹn i Hannah: ‘Biko, wu vwa viẹ-ẹ, Hannah. Mẹmẹ ọrhẹ owẹwẹ i havwiẹ. Mi vwo ẹguọlọ kpahuọn.’

Ọke oru, Hannah ọvo nọ yọ nẹrhomo. Ọke rọ nẹrhomo vwe i Jehova nọ ha userhumu riẹn, nọ viẹ. Hannah no vive: ‘Jehova, wu rha lẹrhe mẹ vwiẹ ọmọ ọhworhare, mi na haye wẹn, ọmọ na, ọnọ rhọ ha ẹga wẹn ọsoso akpenyerẹn yen ephian.’

Orherẹn Ọduado re se Eli, nọ mẹrẹn unu i Hannah rọ phariẹ, Eli no rorori taghene Hannah ọ da enyo. Hannah nọ kpahenrhọ riẹn: ‘Ẹjo, ọrovwori mẹ, mia da enyo-o. Mi vwo obẹnbẹn ro kpokpi mẹ ẹhẹn, mia nẹrhomo vwe i Jehova kpahiẹn.’ Eli nọ mẹrẹnvwrurhe taghene ọye o ru sọ, nọ tare: ‘Jenẹ Osolobrugwẹ ọ yọ oborẹ wa nekpẹn yen mie yi na.’ Oma nọ merhen i Hannah, nọ ghwẹrioma rie. Uvwre ẹgbukpe owu, Hannah nọ  mẹrevwan jeghwai vwiẹ ọmọ, no serie Samuel. Wu na sabu roro kpahen oborẹ oma ọnọ merhen Hannah te?

Ive ri Hannah o ve rẹn i Jehova, ọ sẹriẹ ẹro-o. Ogege Hannah o le i Samuel enye hin, nọ kpareriẹ riẹ i tabernacle na, nọ ga avwaye. Hannah nọ ta rẹn Eli: ‘Ọnana yẹ ọmọ mi nẹrhomo kpahen na. Mi ha riẹ rẹn i Jehova, nọ ga ye ọsoso ẹdẹ ye ephian.’ Elkanah ọrhẹ Hannah ne rhiẹ ọpha ruẹ i Samuel kẹgbukpe kẹgbukpe, aye na jeghwai ha ewun ọkpokpọ vwe yi. Jehova nọ lẹrhẹ Hannah vwiẹ emọ ehworhare awansa ọrhẹ emọ egbọtọ awanva erọrọ.