Ọke i Saul o hwu hin, David no rhiẹ orodje. Ọke ọrana, David ọ ha ẹgbukpe 30. Ọke ro rhiẹ orodje te ẹgbukpe ezẹko ne, ason owu, ọke ro mevi oberun oghwa ye, nọ mẹrẹn ọmase owu ro vwo erhumu omamọ. David no mo rhe taghene odẹ ọmase na i Bath-sheba, nọ jeghwai rhe taghene ọmase na ane isodja owu re se Uriah. David no se i Bath-sheba rhiẹ oghwa ye. David no lele Bath-sheba ghwọwe, nọ mẹrevwan. David ọ damoma ro no rhurhu oborẹ ọye o ruru na. David nọ ta rẹn olotu isodja ye no fi Uriah rhẹ obaro uvweri na, nọ nyaje vwo. Ọke re kpe Uriah uvuẹn uvweri na hin, David nọ rọnmọ i Bath-sheba.

Ọrẹn, Jehova ọ mẹrẹn ọsoso oborẹ ọ phiare na. Me yi Jehova ono ruo? Jehova no dje ọmẹraro Nathan vwe i David. Nathan nọ ta rẹn i David: ‘Ọdafe owu o vwo igegede buebun, ọrẹn, ovwiegbere owu o vwo ọmogegede owu ọvo ro vwo ẹguọlọ kpahen omamọ. Ọdafe na nọ ha ọmogegede owu rẹ ovwiegbere na o vwori.’ David nọ tuekwẹre, nọ tare: ‘Ọdafe ọrana o fo ohworho re ne kpe hwu! Nathan nọ ta rẹn i David: ‘Wẹwẹ yẹ ọdafe ọrana!’ Ẹhẹn i David no seriotọre, nọ ta rẹn i Nathan: ‘Mi ru ọdandan haso i Jehova ne.’ Ọdandan ọnana nọ rhua ikpokpogho buebun vwe i David ọrhẹ ekrun ọnẹyen. Jehova nọ ha oja riẹ i David, ọrẹn, nọ ha uphẹn riẹn no nyerẹn, fọkime ọ homariotọre jeghwai ta urhomẹmro.

David ọ guọlọ bọn oghwa ẹga harẹn i Jehova, ọrẹn, Jehova nọ djẹ ọmọ i David re se Solomon nọ bọn oghwa ẹga na. David no mwuegbe ekwakwa rhotọre harẹn ọmọyen, nọ tare: ‘Oghwa ẹga i Jehova ono vi  vwo erhumu. Solomon ọ ji kamu, ọrẹn, mi na ha userhumu riẹn mwuegbe ekwakwa rọ nọ ha bọn oghwa ẹga na.’ David no toro igho buebun neneyo a sabu ruiruo ebanbọn na. David nọ guọlọ ihworho ri tẹn ona ebanbọn rhotọre. No koko oro ọrhẹ idọlọ efuanfon buebun, kugbe erhan i cedar ri nẹ i Tyre ọrhẹ Sidon rhe. Ọke ri David ọ guọlọ hwuẹ ne, no dje oborẹ i Solomon ọnọ bọn oghwa ẹga na lele ha riẹn. David nọ tare: ‘Nyoma ọkpọvi Jehova yi mia ya oborẹ ana bọn oghwa ẹga na lele. Jehova ọnọ ha userhumu wẹn. Wu vwa zofẹ-ẹn. Gbanhon ne wu tuẹn owian rhọ.’