Jehova ọ yẹ emọ Israel iguẹnzọn ni suẹn aye, ọrẹn, aye i guọlọ orodje. Aye ni ta rẹn i Samuel: ‘Egbamwa erọrọ i vwo irodje. Ame i ji guọlọ ọrẹ ame.’ Oma ọ merhen i Samuel kpahen ọnana-a, nọ nẹrhomo vwe i Jehova kpahiẹn. Jehova nọ ta riẹn: ‘Rhẹ owẹwẹ yẹ ihworho na i tenre-en. Ọrẹn, omẹmẹ yẹ aye i tenren. Ta rẹn aye taghene aye ine vwo orodje, ọrẹn, orodje na ọnọ ha ekwakwa buebun mie aye.’ Udabọ ọrana, ihworho na ni tare: ‘Ame a damerhọ-ọ. Ame i guọlọ orodje!’

Jehova nọ ta rẹn i Samuel taghene ọhworhare owu re se i Saul, yo no rhiẹ orodje ọrukaro. Ọke i Saul o rhiẹ ọpha ruẹ i Samuel uvuẹn Ramah, Samuel nọ ha riẹ mwu ẹrhẹ orodje nyoma o rhie ọfugbo ra djẹ ohworho ha rhẹ urhomie.

Ọke oru, Samuel no se emọ Israel na koko, neneyo o dje orodje aye rẹn aye. Ọrẹn, aye e rhe ekete i Saul ọ havwọ-ọ. Wu rhe oborẹ ọsoriẹ? Nime, Saul o tiomanu uvuẹn ehwan. Ọke aye a mẹrẹn i Saul, aye ni hariẹ phia no mevi erhẹrhẹ ihworho na. Saul o rhi ghwẹ ọsoso ihworho na, ọ jeghwai vwo erhumu omamọ. Samuel nọ tare: ‘Ọnana yẹ ohworho ri Jehova ọ djẹha na.’ Ihworho na ni kumierin: ‘Umogun, wu ne sun tọ!’

Ukukaro, Orodje Saul ọ kerhọ i Samuel jeghwai huvwele i Jehova. Ọrẹn, ọke oru, no wenerin. Jerẹ udje, o fo nẹ i Saul o ze izobo-o. Ẹdẹ owu, Samuel nọ ta rẹn i Saul nọ hẹrhiẹ, ọrẹn, Samuel ọrhọ kiki rhe-e. Omarana, Saul no brokpakpa ze izobo na. Me yi Samuel o ruru? Samuel nọ ta rẹn i Saul: ‘Manẹ wu vwa tiẹn uvwele i Jehova-a.’ Saul o yono emru nẹ oborẹ o ru sọ na?

Ọke oru, Saul no yo lele itu Amalek wọnrọn, Samuẹl nọ ta rẹn i Saul taghene o kpe ọsoso ihworho na. Ọrẹn, Saul orho kwe kpe Agag ro rhiẹ orodje Amalek na-a. Jehova nọ ta rẹn i Samuel: ‘Saul ọ nyaji mẹ vwo ne, ọ vwọ rhọ kerhọ mẹ-ẹ.’ Samuel no mwuomarhọ fọkiẹ ọnana, nọ ta rẹn i Saul: ‘Nime wu tiẹn uvwele i Jehova, ọye ọnọ djẹ orodje ọrọrọ.’ Ọke i Samuel ọ nyajẹ i Saul vwo, Saul nọ mọrọn ewun i Samuel, ewun i Samuel nọ bẹrẹre. Samuel nọ ta rẹn i Saul: ‘Jehova ọ ha uvie na  mio ne.’ Jehova ọnọ ha uvie na rẹn ohworho ọrọrọ ro no vwo ẹguọlọ kpahiẹn jeghwai huvwele yi.