Ọke i Jezebel o rhon oborẹ ọ phia rẹn emẹraro i Baal na, nọ tuekwẹre gbangbanhon. Jezebel no dje urhomu vwe Elijah, nọ tare: ‘Odẹ rọ sa na, wu ne hwuo jerẹ oborẹ emẹraro i Baal i hwuru na.’ Ofẹn no mwu Elijah, nọ zẹ riẹ ato. Elijah nọ nẹrhomo vwe i Jehova: ‘Jehova, mi sabu vwo edirin ọnana ghwomara-an. Ghwai ji mẹ vwo mi hwu.’ Nime oma ọ ghwọghọ Elijah, nọ merhẹn rhẹ obotọre orhan owu.

Ọmakashe owu nọ rhọmeriẹn bibiesuọn, nọ tare: ‘Vẹnrẹn ne wu riẹ emaren.’ Elijah nọ mẹrẹn ibrẹdi rọ djẹrẹ re fi rhẹ oberun atita ọrhẹ uko ame. Nọ riẹ ibrẹdi na jeghwai da ame na, nọ rharhumu semerhẹn. Ọmakashe na, nọ rhọmeriẹn ọgbọrọrọ, nọ tare: ‘Riẹ emaren. Nime wu guọlọ omẹgbanhon ne wu sabu nya ugbo onya na.’ Omarana, Elijah nọ rharhumu riẹ emaren. Ọke oru, nọ nyaren ẹdọke 40 ọrhẹ ason 40 o ki te Ugbenu i Horeb. Elijah no yo semerhẹn uvuẹn unu rọ ha uvuẹn atita. Ọrẹn, Jehova nọ nọ riẹn: ‘Elijah, me we ruẹ aran?’ Elijah nọ kpahenrhọ riẹn: ‘Emọ Israel a nyamwu oborẹ aye i veri-i. Aye i ghwọghọ agbarha izobo ọnọ jeghwai kpe emẹraro enọ ne. Vwarana, aye a ji guọlọ kpe mẹ.’

Jehova nọ ta riẹn: ‘Nyarhẹn, ye mevi ugbenu na.’ Ukukaro, aphẹrẹ ọgbogbanhon no zu vrẹn obaro unu rọ ha uvuẹn atita na. Ọreva ye, otọre na no kpoghori, erhanren nọ ji homaphia. Ọrọkẹta, Elijah no rhon uvwele bọrọbọrọ. Elijah nọ ha ewun ro kurhọ rhurhu ughwaruiẹ, nọ jeghwai mevi otafe unu atita na. Jehova nọ nọ riẹn oborẹ ọsoriẹ ọ zẹ. Elijah nọ tare: ‘Mẹmẹ ọvo yi hẹrhẹre.’ Ọrẹn, Jehova nọ ta riẹn: ‘Rhẹ owẹwẹ ọvo yi hẹrhẹre-e. O ji vwo emọ Israel erọrọ ri te 7,000 ra ji ha ẹga mẹ. Nyarhẹn ya ha Elisha mwu rhẹ ẹrhẹ ọnọ, no rhiẹ ọmẹraro.’ Ogege, Elijah no yo ru oborẹ i Jehova ọ ta riẹn na. Wu rorori taghene i Jehova ọnọ ha userhumu wẹn, wu rhe ru oborẹ ọ guọlọre? Itiọrurhomẹmro, ọnọ ha userhumu wẹn. Jene yono kpahen oborẹ ọ phiare uvwre ọke okaka na.