Ẹkwotọre Assyria i fi ẹkwotọre Israel kparobọ ne. Sennacherib, ro rhiẹ orodje Assyria nọ ji guọlọ lele emwa erọrọ uvuẹn i Judah fiuvweri. Ọye nọ ghwọghọ emwa ri ha uvuẹn Judah owuowu. Ọrẹn, amwa rẹ ọye ọ guọlọre omamọ yẹ Jerusalem. Sennacherib o rhe taghene i Jehova ọ chochọn i Jerusalemu-u.

Hezekiah ro rhiẹ orodje i Judah, nọ yẹ Sennacherib igho buebun neneyo ọ kpare iroro vrẹn i Jerusalem. Dedevwo, Sennacherib ọ ha igho na, no ji mwuegbe isodja buebun nẹ aye i ye lele i Jerusalem fiuvweri. Ofẹn no mwu ihworho ri ha uvuẹn amwa na, nime isodja Assyria i joma te ekete aye i havwọ ne. Omarana, Hezekiah nọ ta rẹn aye: ‘Are i vwa zofẹ-ẹn. Dedevwo, isodja Assyria e gbanhonma, ọrẹn, Jehova ono ru ọwan gbanhon ghwẹ aye.’

Sennacherib no dje ọnyikọ ye re se Rabshakeh riẹ Jerusalem, nọ ha ihworho na djechẹẹ. Rabshakeh no mevi otafe amwa na, nọ ta: ‘Jehova ọ sabu ha userhumu rẹn are-e. Are i vwe jenẹ Hezekiah ọ phiẹ are rhọ-ọ. O vwo osolobrugwẹ owuorowu rọ nọ sabu simi are nẹ abọ ame-e.’

Hezekiah nọ nọ i Jehova oborẹ ọye ono ruo. Jehova nọ kpahenrhọ riẹn: ‘We jenẹ ofẹn mwuo fọkiẹ oborẹ i Rabshakeh ọ tare na-a. Sennacherib ọ sabu ghwọghọ i Jerusalemu-u.’ Ọke oru, Sennacherib nọ ya ileta vwe Hezekiah. A ya rhẹ uvuẹn ileta na taghene: ‘Ghwai homakpahontọre. Jehova ọ sabu simuo-o.’ Hezekiah nọ nẹrhomo, nọ tare: ‘Biko, Jehova simi ame, neneyo ihworho ephian i rhe taghene wẹwẹ ọvo yẹ Osolobrugwẹ urhomẹmro na.’ Jehova nọ ta riẹn: ‘Orodje Assyria ọ sabu ruẹ i Jerusalemu-u. Mi na sẹrorẹ amwa mẹ.’

Sennacherib o vwo imwẹro taghene phẹrẹkpẹ ọye ọnọ ghwọghọ i Jerusalem. Ọrẹn, ason owu ọvo, Jehova no dje ọmakashe owu riẹ ekete isodja Assyria e havwọ uvuẹn otafe i Jerusalem. Ọmakashe na no kpe isodja Assyria ri te 185,000! Isodja  Orodje Sennacherib ri mai vwo omẹgbanhon ni hwuru. Sennacherib nọ ghwẹrioma rie, nime e firie kparobọ ne. Jehova ọ sẹrorẹ Hezekiah ọrhẹ ihworho ri ha uvuẹn i Jerusalem, jerẹ oborẹ ọye o vive yi. Orhianẹ wu ha uvuẹn i Jerusalem ọke ọrana, manẹ wa hẹroso i Jehova?