Jezebel o vwiẹ ọmọ ọgbọtọ owu re se Athaliah ro vwo uruemru obiobiomu jerẹ izie. Athaliah ọ rọnmọ orodje i Judah. Ọke esa Athaliah o hwu hin, ọmọyen nọ yo suẹn i Judah. Ọrẹn, ọke ọmọyen o hwu, Athaliah nọ ha omayen mwu ẹrhẹ orodje uvuẹn i Judah. Ọke oru, Athaliah no kpe ọsoso ihworho ri na sabu rhiẹ orodje, tobọ te ivwremọ yen ehworhare. Ofẹn Athaliah no mwu ihworho ephian.

Orherẹn Ọduado re se Jehoiada ọrhẹ aniẹ re se Jehosheba, i rheri taghene oborẹ Athaliah o ruẹ na, obiomurun omamọ. Aye ni fi arhọ aye rhẹ erhirhiẹ imwofẹn, neneyo aye i sabu ti owu usuẹn ivwremọ Athaliah nu, odẹ ọmọ na yẹ Jehoash. Aye ni hẹrote ọmọ na uvuẹn oghwa ẹga na.

Ọke i Jehoash o te ẹgbukpe irhiruẹ ne, Jehoiada no se ọsoso ekpako ọrhẹ itu i Levi ri ha uvuẹn amwa na koko, nọ ta rẹn aye: ‘Are i dẹrẹ ighwe oghwa ẹga na, are i vwe jenẹ ohworho owuorowu ọ ruẹ uvuie-en.’ Jehoiada nọ ha Jehoash mwu ẹrhẹ orodje i Judah, no ku erhu orodje rhọ ye urhomu. Ihworho ri ha uvuẹn amwa i Judah, ne kumie: ‘Umogun, wu ne sun tọ!’

Ọke orodje ọmase Athaliah o rhon uvwele ihworho re kumie, nọ zẹ riẹ oghwa ẹga na. Ọke rọ mẹrẹn orodje ra ha mwu obọ na, no bunu: “A phiẹre mẹ rhọ! A phiẹre mẹ rhọ!” Ekakuro na ni mwu Athaliah ro rhiẹ ọvwọkon na, aye ni kpareriẹ ruẹ otafe, aye ni kperie hwu. Ọrẹn, nẹ ihworho ọye ọ riẹriẹre uvuẹn amwa na vwo?

Jehoiada nọ ha userhumu rẹn agbamwa na nẹ aye i lele i Jehova riẹ ọphọ kugbe, aye ni veri taghene i Jehova ọvo yẹ aye ina ga. Jehoiada nọ ta rẹn aye nẹ aye i ghwọghọ oghwa ẹga i Baal ọrhẹ ema aye. Jehoiada nọ ha irherẹn ọrhẹ itu i Levi mwu, nẹ aye i  wian uvuẹn oghwa ẹga na neneyo ihworho na i sabu ha ẹga rẹn i Jehova avwaye. Jehoiada nọ ha ihworho mwu, nẹ aye i dẹrẹ oghwa ẹga na, neneyo ihworho ri vwa fon i ja rha ruẹ uvuien. Jehoiada ọrhẹ ekakuro amwa na, ni ha Jehoash riẹ oghwa orodje na, aye ni hariẹ siyẹ aga usun na. Ihworho i Judah na ghọghọ. Vwarana, aye ina sabu ga i Jehova, aye i vabọ Athaliah jeghwai tiomanẹ ẹga i Baal ne. Wu mẹrẹn oborẹ uduefigbere i Jehoiada o ru ha userhumu rẹn ihworho buebun?