Ihworho e ru oborẹ obiomurun omamọ uvuẹn amwa i Nineveh rọ ha uvuẹn Assyria. Jehova nọ ta rẹn ọmẹraro ọnẹyen rẹ odẹ ye orhiẹ i Jonah, no riẹ i Nineveh ya ha orhetio rẹn aye, nẹ aye i ghwẹriẹ nẹ iruemru ọsọsọ aye. Ọrẹn, Jonah nọ zẹ riẹ amwa ọrọrọ rọ dẹrughwaroghwu amwa re dje rie nya na. Jonah nọ ruẹ ọkuna ro riẹ i Tarshish ro rhiẹ amwa rọ zẹ nya na.

Ọke ọkuna na ọ nyarhẹn, ogiribo ọgbogbanhon no zuẹ, ofẹn no mwu ihworho ra ghwa ọkuna na. Aye na nẹrhomo vwe isolobrugwẹ aye, aye na nọ: ‘Mesoriẹ ọnana ọ phia?’ Ọke o jiribẹn, Jonah nọ ta rẹn aye: ‘Mẹmẹ yi ru sọ. Mia zẹ fọkiẹ oborẹ i Jehova ọ ta mẹ taghene mi ru. Are i dorin mẹ rhẹ uvuẹn urhie na, ogiribo na nẹ ọnọ dobọji.’ Ihworho ra ghwa ọkuna na, a guọlọ doron i Jonah rhẹ uvuẹn urhie na-a, ọrẹn, Jonah ọ guọlọre nẹ aye i dorien rhọ ye. Ọke aye e doron i Jonah rhẹ uvuẹn urhie na, ogiribo na nọ ghini dobọji.

Jonah no rorori taghene ọye ono hwuo. Ọke i Jonah o dimẹ riẹ obotọre urhie ọduado na, nọ nẹrhomo vwe i Jehova. Jehova no dje erhenrin ọduado vwe yi. Erhenrin na no mwu i Jonah rọ, ọrẹn, Jonah o hwu-u. Jonah nọ ji nẹrhomo uvuẹn evwan erhenrin na, nọ tare: ‘Mi veri taghene mi na huvwele ọnọ ọke ephian.’ Jehova nọ sẹrorẹ i Jonah uvuẹn evwan erhenrin na te ẹdọke esa, no rurie nẹ erhenrin na o won i Jonah rhẹ otọre ọkaka.

Ra mẹriẹn taghene i Jehova o simi Jonah ne na, ọnana no mevirhọ taghene i Jonah orho riẹ Nineveh ri Jehova o dje rie nya na-a? Ẹjo. Jehova nọ rharhumu ta rẹn i Jonah no riẹ i Nineveh. Ọke ọnana, Jonah nọ huvwele  i Jehova. No riẹ i Nineveh ya ha orhetio rẹn evwọkon na, nọ tare: ‘O kurhẹ ẹdọke 40, nẹ ana ghwọghọ i Nineveh.’ Ọrẹn, oborẹ e vwe roro rhọ nọ phiare, itu i Nineveh ni ha orhetio na, aye ni ghwẹriẹre. Orodje i Nineveh nọ ta rẹn ihworho na: ‘Are i nẹrhomo vwe Osolobrugwẹ, nẹ are i ghwẹriẹ. Ọkezẹko, ọ ghwọghọ ọwa-an.’ Ọke i Jehova ọ mẹriẹn taghene itu i Nineveh i ghini ghwẹriẹ ne, ọrhọ ghwọghọ aye-e.

Jonah nọ tuekwẹre taghene i Jehova ọ ghwọghọ amwa na-a. Gbe rorie: Jehova o vwo erhionrin kpahen i Jonah jeghwai gbe arodọmẹ riẹn, ọrẹn, Jonah o gbe arodọmẹ rẹn ihworho i Nineve-eh. Ukpomaran, no siyẹ otafe amwa na uvuẹn obotọre orhan owu, no mwuomarhọ. Ọke oru, orhan na no hwuru, Jonah nọ tuekwẹre gbangbanhon. Omarana, Jehova nọ ta riẹn: ‘Wu vwo ọdamẹ kpahen orhan ọnana ghwẹ itu i Nineveh. Mi gbe arodọmẹ rẹn aye, aye ni simirhọ.’ Me yẹ ọwan i yono nẹ iyẹnrẹn ọnana rhe? Ihworho ri ha uvuẹn i Nineveh i ghanranren omamọ ghwẹ korhan korhan.