Josiah o rhiẹ orodje i Judah ọke rọ ha ẹgbukpe ẹrẹnren. Ọke ọrana, ihworho e ru irueruo imajiki, aye a jeghwai ga ema. Ọke i Josiah o te ẹgbukpe 16, no yono oborẹ ono ru ga i Jehova izede rọ gbare. Ọke ro te ẹgbukpe 20, nọ ghwọghọ ọsoso ema ọrhẹ agbarha izobo ri ha uvuẹn amwa na. Ọke i Josiah o te ẹgbukpe 26, no ru ẹkwaphiẹrhotọre ra na kwaphiẹ oghwa ẹga i Jehova.

Hilkiah ro rhiẹ orherẹn ọduado, nọ mẹrẹn ọbe Urhi Jehova uvuẹn oghwa ẹga na, ọnọ sabu rhirhiẹ taghene i Moses ọvo yọ ya ọbe Urhi aye i mẹrẹnren na. Ọyẹbe i Josiah re se Shaphan nọ ha ọbe Urhi na vwe i Josiah, no se rie riẹn gorigori. Ọke i Josiah ọ kerhọ ọbe Urhi na, nọ mẹrẹnvwrurhe taghene ihworho na i sẹrerhumuji Jehova ẹgbukpe buebun ne. Orodje Josiah nọ ta rẹn Hilkiah: ‘Jehova ọ tuekwẹre kpahen ọwan. Nẹrhomo vwe i Jehova. Jehova ọnọ ta rẹn ọwan oborẹ ọwan ine ruo.’ Jehova nọ kpahenrhọ ye nyoma ọmẹraro ọmase re se Huldah, nọ tare: ‘Ihworho i Judah i nyaji mẹ vwo ne. Aye ina rioja, ọrẹn, orhiẹ ọke Orodje Josiah o suẹn na-a, fọkime ọ homariotọre.’

Ọke Orodje Josiah o rhon iyẹnrẹn na, no riẹ oghwa ẹga na jeghwai se ihworho i Judah koko. No se Urhi Jehova rẹn ọsoso ihworho ri ha uvuẹn agbamwa na. Josiah ọrhẹ ihworho na ni vive taghene aye ina huvwele i Jehova rhẹ ọsoso ọmudu aye.

O jiriri omamọ ne, rẹ agbamwa i Judah i riorẹ Ọnyavrẹn na. Ọrẹn, ọke i  Josiah o se Urhi na taghene o fori nẹ aye i riorẹ Ọnyavrẹn na kẹgbukpe kẹgbukpe, nọ ta rẹn ihworho na: ‘Ọwan ina riorẹ Ọnyavrẹn na harẹn i Jehova.’ Ọke oru, Josiah no mwuegbe ekwakwa ra na ha ze izobo ọrhẹ ihworho ri na so ijoro uvuẹn oghwa ẹga na. Omarana, agbamwa na ni riorẹ Ọnyavrẹn na ọrhẹ orẹ ibrẹdi ro vwo phie na, ẹdọke irhiruẹ. Nẹ ọke i Samuel rhe, o ji vwo orẹ Ọnyavrẹn rọ họhọ ọrana dẹ-ẹ. Josiah o ghini vwo ẹguọlọ kpahen Urhi Jehova. Oma ọ merhuọn we rhe yono kpahen i Jehova?