1, 2. Me ye ne ruo na sabu daji uvuẹn ẹguọlọ Osolobrugwẹ?

ỌWAN ephian i guọlọ gbanhon ji vwo omọkpokpọ. Omarana, na damoma riẹ omamọ emaren, sasoma ọke ephian, ji hẹrote ugboma ọwan. Dedevwo ọnana ọ guọlọ omẹdamu, ọwan a mẹrẹn erere re nerhumie sa, omarana e vwe rhe fiobọrhotọre-e. Ọrẹn, o ji fo na gbanhon ji vwo omọkpokpọ izede ọrọrọ.

² Dedevwo ọwan a dabu ruẹ riaro re rhe i Jehova ne na, o ji fo ne ruẹ onyerẹnkugbe ọwan rhẹ ọye nọ gbanhonrhọ. Ọke i Jude ọ ha urhebro rẹn Ilele Kristi nẹ aye i ‘sẹrorẹ oma aye rhẹ uvuẹn ẹguọlọ Osolobrugwẹ,’ no ji dje oborẹ aye ine ru ọnana lele. Nọ ta rẹn aye: “Are i dabu bọn oma are rhẹ uvuẹn esegburhomẹmro ọfuanfon are.” (Jude 20, 21) Omarana, marhẹ ọwan ine ru sabu bọn esegburhomẹmro ọwan gbanhon?

3-5. (a) Me yẹ Echu ọ guọlọre taghene wu roro kpahen iruemru-urhi Jehova? (b) Marhẹ oma o ruo kpahen irhi ọrhẹ iruemru-urhi Jehova?

³ Orhiẹ oborẹ ọghanranren no mwẹro taghene izede i Jehova yi mai rhomu. Echu ọ guọlọre ne wu roro taghene iruemru-urhi Osolobrugwẹ i gbanhon phan, wu  sabu nyerẹnmwu aye-e, oma ọnọ ji merhuọn wu rhe brorhiẹn oborẹ ọsọre ọrhẹ oborẹ ọgbare harẹn omobọ ọnọ. Nẹ ọke ogba Eden rhe, Echu ọ damoma rọ nọ lẹrhẹ ihworho vwo imwẹro kpahen iroro ọnana. (Genesis 3:1-6) Ọ ji damoma inyenana.

⁴ Iroro Echu ọ gbare? Iruemru-urhi Jehova i gbanhon phan? Ẹjo. Na ha udje yi phia, gbe rorie taghene wa nya uvuẹn ogba orhorhomu. Ne wu djokarhọ ekete owu ra gbogba orhierhi rhọ. Wu na sabu roro, ‘Mesoriẹ a gbogba ọnana rhẹ izede na?’ Ọrẹn ogege, ne wu rhon uvwele okporokpo obọrevaye ra gbogba rhọ na. Marhẹ oma ono ruo kpahen ogba na? Oma ọnọ merhuọn taghene o simi ruo nẹ abọ okporokpo na rọ vwọ ha ruẹ emaren re! Iruemru-urhi Jehova i họhọ ogba ọrana, Dẹbolo ọ họhọ okporokpo ọrana. Baibol na ọ yẹrẹ ọwan orhetio: “Are sẹrorẹ iroro are, are rha dẹrẹ! Nime ọvwreghrẹn are, Dẹbolo, ọ nya sa nya rie jerẹ okporokpo ro kwenu, rọ guọlọ ohworho rọ nọ sha re.”—1 Peter 5:8.

⁵ Jehova ọ guọlọre nẹ ọwan i nyerẹn akpọ rọ mai rhomu kparobọ. Ọ guọlọ nẹ Echu ọ phiẹ ọwan rhọ-ọ. Ọrana yẹ ọsoriẹ ọ yẹ ọwan irhi ọrhẹ iruemru-urhi ri na sẹrorẹ ọwan, ji yẹ ọwan omamerhomẹ. (Ephesians 6:11) James ọrhọ ya: “Ohworho rọ dabu ni urhi ọgbagba ọrẹ ugbomọphẹ na fiotọre, jeghwai nyalelie . . . oma nẹ ọnọ ji merhiẹn fọkiẹ oborẹ o ruẹ.”—James 1:25.

6. Marhẹ ene ru vwo imwẹro taghene izede Osolobrugwẹ yi mai rhomu?

⁶ Ọwan i rha nyalele ọkpọvi Jehova, akpenyerẹn ọwan ono rhomurhọ, onyerẹnkugbe re vwori rhẹ ọye nẹ ọnọ gbanhonrhọ. Jerẹ udje, ọwan a mẹrẹn erere ọke ra nẹrhomo vwe yi ọke ephian. (Matthew 6:5-8; 1 Thessalonians 5:17) Oma ọ merhen ọwan ọke ra huvwele ọkpọvi  ọnẹyen nyoma re kwomakugbe ha ẹga riẹn jeghwai ha urhebro rẹn owuowọnwan, ọrhẹ ọke erhe vwobọrhọ ẹmro na eghwoghwo ji yono awọrọ. (Matthew 28:19, 20; Galatians 6:2; Hebrews 10:24, 25) Ọke ọwan erhe roro kpahen oborẹ ekwakwa enana i ru bọn esegburhomẹmro ọwan gbanhon, ọwan ne vwo imwẹro ọgbogbanhon ọke ephian taghene izede i Jehova yi mai rhomu.

7, 8. Me yọ nọ sa ọwan erhumu kẹnoma rẹn uduebro edamuni ra na sabu mẹrẹn obaro na?

⁷ Ọwan ina sabu rhe brudu kpahen ekwakwa egbogbanhon ri na damu esegburhomẹmro ọwan ni obaro na. Orhianẹ omaran we roro, karorhọ ẹmro i Jehova: “Mẹmẹ, Jehova, yẹ Osolobrugwẹ are, Ohworho ro yono are nẹ are i mẹrẹn erere harẹn omobọ are, Ohworho ro sun are lele izede ro fori nẹ are nyalele. Orhianẹ are ine kwe nyalele ekama mẹ! Ufuoma are nẹ ọnọ họhọ urhie,  habaye irueruo ọsoso are nẹ ọnọ họhọ ukolame rọ ha urhie ọduado na.”—Isaiah 48:17, 18.

⁸ Ọke arha huvwele i Jehova, ufuoma ọwan nẹ ọnọ họhọ urhie ro vwo mwuo, irueruo ọsoso ọwan nẹ ọnọ họhọ ukolame rọ bọmọ ruẹ okokọ urhie ọke ephian. Ana sabu mọrọn esegburhomẹmro ọwan, udabọ oborẹ e rhiẹromẹrẹn uvuẹn akpenyerẹn ọwan. Baibol na ọrhọ ta: “Doron ebẹnbẹn enọ vwe i Jehova, ọye nẹ ọnọ sẹroruọ. O vwo ọke owuorowu rọ nọ lẹrhẹ ohworho ọvwata ghorien se-e.”—Psalm 55:22.

9, 10. Me yo mevirhọ ra na do te edje?

⁹ We rhe ruẹ onyerẹnkugbe ọnọ rhẹ i Jehova nọ rhọ gbanhanrhọ, wu na “do te edje.” (Hebrews 6:1) Me yo mevirhọ ra na do te edje?

¹⁰ Ọwan i rhiẹ ihworho ri kpakoron vwẹre, ne ki rhiẹ Olele Kristi rọ do te edje-e. Ne rhiẹ ohworho rọ do te edje, ana vi ha i Jehova ruẹ ugbehian ọwan jeghwai vwo aruẹ ukẹro rọ ha ni ekwakwa. (John 4:23) Paul ọrhọ ya: “Ihworho re nyerẹn lele ekwakwa ugboma, a tẹnrovi ekwakwa ugboma, ọrẹn ihworho re nyerẹn lele ẹhẹn na, a tẹnrovi ekwakwa erẹ ẹhẹn.” (Romans 8:5) Ohworho rọ do te edje ọ vwọ tẹnrovi akpẹriọ yanghene ekwakwa ugboma uvuẹn akpenyerẹn ye-en. Ukpomaran, ọ tẹnrovi ogame i Jehova jeghwai djẹ odje ẹghwanren uvuẹn akpọ ye. (Proverbs 27:11; se James 1:2, 3.) O vwo kwe ne suien ruẹ ekwakwa ri biomuru-un. Ohworho rọ do te edje o rhe oborẹ ọgbare, o ji mwuegbe ro no ruẹ oborẹ ọgbare.

11, 12. (a) Me yi Paul ọ ta kpahen “omẹgbanhon ọmẹrẹnvwrurhe” ọrẹ Olele Kristi? (b) Re ne rhiẹ Olele Kristi rọ do te edje, marhẹ o ru họhọ ohworho rọ ten ona iruẹn?

¹¹ Na sabu rhiẹ ohworho rọ do te edje, ọ guọlọ  omẹdamu. Ọnyikọ Paul ọrhọ ya: “Ihworho ri ghwanren ne ya riẹ emaren eghwaghwa, era nyoma omẹgbanhon ọmẹrẹnvwrurhe aye re yonorin ruiruo nẹ aye i fi ovẹnẹ rhẹ oborẹ ọgbare ọrhẹ oborẹ ọsọre.” (Hebrews 5:14) Ẹmro na “yonorin,” ọnọ sabu lẹrhẹ ọwan roro kpahen uyono ihworho re fioma rhẹ iruẹn.

¹² Arha mẹrẹn ohworho rọ ten ona iruẹn ọke rọ ha iruẹn phia, ne rhe taghene ọ ha ọke ọrhẹ uyono ọ ki sabu ten ona yen. E vwiẹ ye rhẹ ohworho rọ ten ona iruẹ-ẹn. Erhe vwiẹ ọmọ, ọmọ na o rhe oborẹ ọnọ ha abọ ye yanghene aghwẹ ye ruiruo lele-e. Ọrẹn, bibiesuọn bibiesuọn, no yono oborẹ a mọrọn emru ji yono oborẹ a nya. Erhe yonie, ọnọ sabu rhiẹ ohworho rọ ten ona iruẹn. Omaran ọ ji havwọ, ọ ha ọke ọrhẹ uyono na ki sabu rhiẹ Ilele Kristi ri do te edje.

13. Me yọ nọ sa ọwan erhumu roro lele izede ri Jehova o roro lele?

¹³ Uvuẹn ọbe ọnana, e yono kpahen oborẹ ene ru roro lele izede i Jehova o roro lele, ọrhẹ oborẹ ene ru ha ukẹro i Jehova ọ ha ni ekwakwa nie. Ọwan i yono kpahen oborẹ ene ru dje ọdaremẹro ọrhẹ ẹguọlọ kpahen iruemru-urhi Jehova. Ọke erhe brorhiẹn, o fori na nọ oma ọwan: ‘Irhi yanghene iruemru-urhi ego ri nẹ i Baibol rhe yi sekpahen erhirhiẹ ọnana? Marhẹ mi ne ru ha aye wian? Me yi Jehova ọ guọlọre taghene mi ru?’—Se Proverbs 3:5, 6; James 1:5.

14. Me yo fori ne ru orhianẹ ọwan i guọlọ ru esegburhomẹmro ọwan gbanhonrhọ?

¹⁴ Ọke ephian yẹ ọwan e ru esegburhomẹmro ọwan kpahen i Jehova gbanhan. Jerẹ oborẹ omamọ emaren ẹriọ ọ lẹrhẹ ugboma ọwan gbanhan, erhe yono kpahen i Jehova ọke ephian ọnọ lẹrhẹ esegburhomẹmro ọwan gbanhonrhọ. Ọke ọwan a tuẹn uyono i Baibol rhọ obọ,  e yono kpahen irhomẹmro elolọhọ ri sekpahen i Jehova ọrhẹ izede enẹyen. Ọrẹn ọke uyono na o riarorhọ, o fori ne vwẹruọ ekwakwa ikokodo. Ọrana yẹ oborẹ i Paul o mevirhọ ọke rọ ta: “Ihworho ri ghwanren ne ya riẹ emaren eghwaghwa.” Arha ha ekwakwa re yonorin ruiruo, ọwan ne vwo ẹghwanren. Baibol na ọ ta rẹn ọwan: “Ẹghwanren yẹ oborẹ ọ mai ghanren.”—Proverbs 4:5-7; 1 Peter 2:2.

15. Marhẹ ẹguọlọ re ne vwo kpahen i Jehova ọrhẹ imizu ọwan ọ ghanren te?

¹⁵ Ohworho ọnọ sabu gbanhon ji vwo omọkpokpọ, ọrẹn ọrhọ guọlọ vwo omọkpokpọ ọke ephian, ọnọ dabu rha hẹrote omayen. Omaran ọ ji havwọ, ohworho rọ do te edje o rheri taghene o fori nọ wian gbanhon neneyo ọ sabu ru onyerẹnkugbe ọnẹyen rhẹ i Jehova gbanhonrhọ. Paul ọ karorhọ ọwan: “Are i rha damẹ oma are nẹ sẹ are ji ha uvuẹn esegburhomẹmro na; are i rhe dje oborẹ are ghini havwọ phia.” (2 Corinthians 13:5) Ọrẹn, ọwan i ji guọlọ oborẹ ọ ghwẹ esegburhomẹmro ọgbogbanhon. O fori nẹ ẹguọlọ re vwo kpahen i Jehova ọrhẹ imizu ọwan, ọrhọ gbanhanrhọ ọke ephian. Paul nọ tare: “Mi rhe vwo . . . irherhe ephian, mi rhe ji vwo esegburhomẹmro mi ne ghwie igbenu nẹ ekete aye i havwọ, ọrẹn mie vwo ẹguọlọ-ọ, mie fiemru owuorowu-u.”—1 Corinthians 13:1-3.

16. Me yẹ Echu ọ guọlọre ne rhe roro?

¹⁶ Echu ọ guọlọre ne rhe roro taghene ọwan i sabu ruẹ emru owuorowu rọ nọ merhen i Jehova oma-a. Ọ guọlọre nẹ ẹhẹn ọwan o seriotọre, ne ji roro taghene o vwo ifiẹrorhọ owuorowu kpahen ebẹnbẹn ọwa-an. Echu ọ  guọlọ na hẹroso imizu ukoko ọwa-an, ọ guọlọ nẹ oma ọ merhen ọwa-an. (Ephesians 2:2) Echu o rheri taghene iroro esọsọ ina sabu ha ẹkuọn rẹn ọwan jeghwai ghwọghọ onyerẹnkugbe ọwan rhẹ Osolobrugwẹ. Ọrẹn, Jehova o tiobọnu oborẹ ọnọ ha userhumu rẹn ọwan wọnrọn haso iroro esọsọ. Ọ yẹrẹ ọwan ifiẹrorhọ.

17. Marhẹ ifiẹrorhọ ọ ghanren te?

¹⁷ Uvuẹn 1 Thessalonians 5:8, Baibol na ọ ha ifiẹrorhọ ọwan dje erhu rọ sẹrorẹ urhomu isodja uvuẹn uvweri, nyoma ro se erhu ọrana “ifiẹrorhọ ọrẹ usimi.” Erhe vwo ifiẹrorhọ kpahen ive i Jehova, ọnọ sẹrorẹ ọmudu ọwan ji ha userhumu rẹn ọwan ten iroro esọsọ.

18, 19. Marhẹ ifiẹrorhọ o ruẹ i Jesu gbanhon lele?

¹⁸ Ifiẹrorhọ i Jesu o vwori o rurie gbanhon. Uvuẹn ason rọ kẹta ọke rọ ha otọrakpọ na, ọ dẹrughwaroghwu erhirhiẹ ebẹnbẹn owu ya ruẹ ọrọrọ. Ugbehian yen rọ kẹririẹ omamọ ọ rhẹ riẹ. Ugbehian yen ọrọrọ ọ ten riẹn.  Erọrọ i zẹ je vwo. Ihworho amwa yen i kparehasuiẹ, aye i ji guọlọ taghene e kpe yi hwu. Me yọ ha userhumu riẹn din emiamiamo enana? “Fọkiẹ aghọghọ rọ ha obaruiẹ, no vwo edirin uvuẹn orhan oja, ọ zofa-a, vwarana, o siyẹ obọrhe aga usuon Osolobrugwẹ ne.”—Hebrews 12:2.

¹⁹ Jesu o rheri taghene ọrhọ fuevwan, ọnọ ha ujiri vwe Ọsẹ ye jeghwai dje Echu rhẹ ọmọrenfian. Ifiẹrorhọ ọnana ọ yẹriẹ aghọghọ ọduado. Jesu o ji rhe taghene phẹrẹkpẹ ọnọ rharhumu kwomakugbe Ọsẹ ye obẹ odjuwu. Ifiẹrorhọ ọnana yọ sariẹ erhumu sabu din. Jerẹ i Jesu, o fori na tẹnrovi ifiẹrorhọ ọwan. Ọnọ sa ọwan erhumu din udabọ erhirhiẹ ephian.

20. Me yọ nọ sa erhumu vwo iroro ri gbare?

²⁰ Jehova ọ mẹrẹn esegburhomẹmro ọrhẹ edirin ọnọ. (Isaiah 30:18; se Malachi 3:10.) O veri taghene “ono ruẹ edamẹ erẹ ẹhẹn ọnọ wẹn.” (Psalm 37:4) Omarana, gba tẹnrovi ifiẹrorhọ ọnọ. Echu ọ guọlọre nẹ ifiẹrorhọ  ọnọ ọ vabọ, ne wu ji roro taghene ive i Jehova i ruẹ gba-a. Ọrẹn, wu vwa ha uphẹn rẹn iroro esọsọ-ọ! Wu rha djokarhọ ye taghene ifiẹrorhọ ọnọ o seriotọre, gba nekpẹn userhumu miẹ i Jehova. Karorhọ ẹmro ri ha uvuẹn Philippians 4:6, 7: “Are i vwe brudu kpahen emru owuorowu-u, ọrẹn, uvuẹn kemru kemru ọrẹ ẹrhomo kugbe orẹ ọrhẹ ekpẹmẹ, are i ta edamẹ are harẹn Osolobrugwẹ; ọke ọrana ufuoma ọrẹ Osolobrugwẹ rọ ghwẹ ọmẹrẹnvwrurhe ephian nẹ ọnọ sẹrorẹ ọmudu ọrhẹ oghwa iroro are nyoma Kristi Jesu.”

21, 22. (a) Me yẹ ọhọre i Jehova kpahen otọrakpọ na? (b) Me wu brorhiẹn yen wu ne ruo?

²¹ Rhe roro kpahen omamọ akpenyerẹn rọ ha obaro na ọke ephian. Phẹrẹkpẹ, kohworho kohworho ro nyerẹn ọke ọrana ọnọ ga i Jehova. (Revelation 7:9, 14) Gbe roro kpahen akpenyerẹn uvuẹn akpọ ọkpokpọ na. Ono rhomu ghwẹ kemru kemru re roro kpahan vwana! Echu, ikpodje yi, ọrhẹ evwọkon ephian ine nie. Wu kpomẹ dẹ-ẹ, wu ji hwuẹ-ẹ. Ukpomaran, oma ọnọ rhọ merhuọn kẹdẹkẹdẹ nime wu vwo omọkpokpọ, we ji nyerẹn. Ihworho ephian ina wian kugbe dẹrẹ akpo na rhiẹ i paradais. Ihworho ephian ine vwo omamọ emaren, ji rhirhiẹ omamọ ekete ro vwo omefuon. Ihworho i vwo uruemru ọkon yanghene ozighi egbe-e, ọrẹn aye ine dje uruemru esiri rẹn owuowọnwan. Bibiesuọn bibiesuọn, ihworho ephian ri ha akpọ na, nẹ ina mẹrẹn “ugbomọphẹ ọrẹ emọ Osolobrugwẹ.”—Romans 8:21.

²² Jehova ọ guọlọre ne wu ha ye mwu ugbehian rọ mai kpẹnkpẹn. Rhe ruẹ ekete omẹgbanhuọn o teri ne wu huvwele i Jehova jeghwai rhe tiẹ kẹriẹ kẹdẹkẹdẹ. Omarana, jenẹ ọwan ephian i daji uvuẹn ẹguọlọ Osolobrugwẹ bẹmẹdẹ!—Jude 21.