1, 2. Mesoriẹ we vwo ẹguọlọ kpahen i Jehova Osolobrugwẹ?

WU VWO ẹguọlọ kpahen Osolobrugwẹ? Ẹguọlọ wu vwo kpahiẹn omamọ ọye o mwuruo homave riẹn. Wu na sabu roro taghene ọye yẹ Ugbehian rọ mai kẹruọ. Ọrẹn Jehova yo kiki vwo ẹguọlọ kpahuọn vwẹre bọmọke wu ki vwo ẹguọlọ kpahiẹn. Baibol na ọrhọ ta: “Ọwan i vwo ẹguọlọ, nime ọye yo kiki vwo ẹguọlọ kpahen ọwan.”—1 John 4:19.

² Roro kpahen izede sansan ri Jehova o ru dje ẹguọlọ ọnẹyen harẹn ọwan. Ọ yẹrẹ ọwan otọrakpọ na no rhiẹ oghwa orhorhomu rẹn ọwan ọrhẹ kemru kemru ra guọlọre na sabu vwo omamerhomẹ. (Matthew 5:43-48; Revelation 4:11) Ọ guọlọre taghene ọwan i vwo omamọ onyerẹnkugbe rhẹ ọye, ọ jeghwai rhiẹ izede firhọ na sabu yono kpahiẹn. Ọke ọwan e se i Baibol na, ọwan na kerhọ i Jehova. Ọwan i rha nẹrhomo, ọye nọ kerhọ ọwan. (Psalm 65:2) Ọye ọ kpọ ọwan viẹ jeghwai yẹ ọwan omẹgbanhon rhẹ ẹhẹn ọfuanfon ọnẹyen. (Luke 11:13) Ọ tobọ dje Ọmọyen ọghoghanren rhiẹ otọrakpọ na no simi ọwan nẹ abọ ọdandan ọrhẹ uhwu.—Se John 3:16; Romans 5:8.

3. Marhẹ ọwan ine ru sabu vwo omamọ onyerẹnkugbe rhẹ i Jehova?

 ³ Gba ha ibiẹ ọke roro kpahen owuọnwan usuẹn igbehian enọ rọ mai kẹruọ, ọro meviẹ kẹruọ ọke omamerhomẹ ọrhẹ ọke omemwurhọ. A guọlọ omẹdamu na sabu sẹrorẹ aruẹ ugbehian ọrana rọ kpẹnkpẹnren na. Omaran ugbehian ọwan rhẹ i Jehova ro rhiẹ Ugbehian rọ mai rhomu ra na sabu vwo, ọ ji havwọ. Ugbehian ọwan rhẹ ọnẹyen ọnọ sabu tọ bẹmẹdẹ. Omarana, Baibol na ọrhọ ta rẹn ọwan: “Are i sẹrorẹ oma are rhẹ uvuẹn ẹguọlọ Osolobrugwẹ.” (Jude 21) Marhẹ ọwan ine ru sabu ruẹ ọnana? Baibol na ọrhọ kpahenrhọ ye: “Ọnana yẹ oborẹ ẹguọlọ Osolobrugwẹ o mevirhọ, ne ru lele ekama enẹyen; nime ekama enẹyen a ghwa pha-an.”—1 John 5:3.

4, 5. (a) Me yẹ “ẹguọlọ Osolobrugwẹ” o mevirhọ? (b) Marhẹ ẹguọlọ wu vwo kpahen i Jehova o tonrhọ lele?

⁴ Me yi Baibol na o mevirhọ ọke rọ ta taghene “ẹguọlọ Osolobrugwẹ”? Ọnana o mevirhọ ẹguọlọ Osolobrugwẹ o vwo kpahen ọwa-an, ọrẹn o mevirhọ ẹguọlọ ọwan i vwo kpahiẹn. Wu karorhọ ọke ukaro we dje ẹguọlọ kpahen i Jehova?

⁵ Karorhọ oborẹ oma ruruo ọke we yono taghene Jehova ọ guọlọre ne wu nyerien bẹmẹdẹ uvuẹn akpọ ọkpokpọ. Wu yono kpahen ọsoso oborẹ i Jehova o ruru na sabu nyerẹn bẹmẹdẹ ọrhẹ ẹghẹlẹ ọghoghanren i Jehova ọ yẹrẹ ọwan nyoma ro dje ọmọyen rhiẹ otọrakpọ na. (Matthew 20:28; John 8:29; Romans 5:12, 18) Ọke we yono kpahen oborẹ i Jehova o vwo ẹguọlọ kpahuọn lele, ọnana no teruo ẹhẹn jeghwai mwuo rhe vwo ẹguọlọ kpahiẹn.—Se 1 John 4:9, 10.

6. Me yẹ ẹguọlọ re vwo kpahen ohworho o sekpahen? Me yẹ ẹguọlọ wu vwo kpahen i Jehova o mwuruo ru ne?

 ⁶ Ọrẹn re ne vwo ẹguọlọ kpahen Osolobrugwẹ ọrana owu. Jerẹ udje, wu rhe vwo ẹguọlọ kpahen ohworho, ọ ghwẹ ọrẹ wu na ta “Mi vwo ẹguọlọ kpahuọn.” Ẹguọlọ ọnọ lẹrhẹ ọwan ru ekwakwa ri na lẹrhẹ oma merhen ohworho na. Omaran ọ ji havwọ, ẹguọlọ wu vwo kpahen i Jehova ọnọ lẹrhuọ guọlọ nya uvuẹn izede rọ nọ lẹrhẹ oma merhiẹn. Ọke ẹguọlọ ọnọ ọ gbanhanrhọ, ne wu homave hariẹn jeghwai bromarhame. Nyoma ọrana wu ruru na, ne wu ve ive taghene wu na ga ye bẹmẹdẹ. (Se Romans 14:7, 8.) Marhẹ wu ne ru sabu nyamwu ive ọrana?

7. Ọwan i rhe vwo ẹguọlọ kpahen i Jehova, me yẹ ọwan ine ruo? Me yẹ ekama enẹyen ezẹko?

⁷ Fọkiẹ ẹguọlọ re vwo kpahen i Jehova, ọwan “ne ruẹ lele ekama enẹyen.” Marhẹ ọwan e ruẹ ọnana lele? Ọwan a huvwele yi. Uvuẹn i Baibol na ọwan i yono kpahen oborẹ i Jehova ọ guọlọre taghene ọwan i nyerẹn lele. Jerẹ udje, ọ ta rẹn ọwan taghene ọ sọre ra na da enyo vrẹn oma, re ne so uhi yanghene mọrenfian, re ne bru ekware rhẹ ohworho ọwan i vwa ji rọnmọ, yanghene ra na ha ẹga rẹn ohworho yanghene emru ọrọrọ ukperẹ ono rhiẹ ọye.—1 Corinthians 5:11; 6:18; 10:14; Ephesians 4:28; Colossians 3:9.

8, 9. Marhẹ ọwan e ru rhe oborẹ i Jehova ọ guọlọre taghene ọwan i ru uvuẹn erhirhiẹ re vwe jurhi kpahen uvuẹn i Baibol na? Dje udje yi.

⁸ Ọrẹn na sabu lẹrhẹ oma merhen i Jehova, ọwan ine vi ru ghwẹ ọrẹ ana nyalele ekama enẹyen. Ọye ọ yẹ ọwan irhi buebun ri sekpahen erhirhiẹ ephian uvuẹn akpenyerẹn ọwa-an. Omarana, ono vwo ọkezẹko ri Baibol na ọ vwọ ghwai vwo urhi kpahen oborẹ ọwan ine ruo. Marhẹ ọwan ine ru sabu brorhiẹn ri gbare? (Ephesians 5:17)  Uvuẹn i Baibol na, o vwo iruemru-urhi ri rhiẹ urhomẹmro eghoghanren re yono ọwan kpahen ukẹro i Jehova ọ ha ni emru. Rẹ ọwan e se i Baibol na, ọwan ni na dabu rhe aruẹ Ohworho i Jehova ọ havwọ. Ọwan e yono kpahen izede ro roro lele, omaran ji te oborẹ o vwo ẹguọlọ kpahen ọrhẹ oborẹ o vwo utuoma kpahen.—Se Psalm 97:10; Proverbs 6:16-19; Se Iyẹnrẹn Ra Habaye 1.

⁹ Jerẹ udje, marhẹ ọwan e brorhiẹn oborẹ ene ni uvuẹn ekpetughe lele yanghene oborẹ ene ni uvuẹn intanẹti? Jehova ọ ghwai hunute oborẹ ọwan ine ruo-o. Ọrẹn iruemru-urhi rọ yẹrẹ ọwan ina sa ọwan erhumu brorhiẹn ri gbare. Ughe ọrhẹ iruẹn inyenana i vuọnren rhẹ irueruo ozighi ọrhẹ ọfanrhiẹn. Uvuẹn i Baibol na, Jehova ọ ta rẹn ọwan taghene ọye “o vwo utuoma kpahen kohworho kohworho ro vwo ẹguọlọ kpahen ozighi” ọnọ jeghwai “ha evwọnfanrhiẹn ihworho guẹnzọn.” (Psalm 11:5; Hebrews 13:4) Marhẹ iruemru-urhi enana ine ru sabu ha userhumu rẹn ọwan brorhiẹn ri gbare? Ogege ọwan i rhe rhe taghene Jehova o vwo utuoma kpahen emru ne, yanghene nọ ha ukẹro ọfanrhiẹn nie, o fori na kẹnoma rẹn emru na.

10, 11. Mesoriẹ ọwan a huvwele i Jehova?

¹⁰ Mesoriẹ ọwan a huvwele i Jehova? Ọwan i vwa huvwele i Jehova fọkime a guọlọ kẹnoma rẹn ojẹriọ yanghene ebẹnbẹn re nẹ erhumu orhienbro ọsọsọ re bruru-u. (Galatians 6:7) Ọrẹn, ọwan a huvwele i Jehova fọkime ọwan i vwo ẹguọlọ kpahiẹn. Jerẹ oborẹ emọ e ruẹ oborẹ ọ merhen ọsẹ aye oma, ọwan i guọlọ ru oborẹ ọnọ merhen Ọsẹ ọwan obẹ odjuwu oma. Ọwan i rha mẹrẹnvwrurhe taghene oma ọwan ọ merhen Jehova, o vwo oborẹ ana sabu ha dje yi-i!​—⁠Psalm 5:12; Proverbs 12:2; Se Iyẹnrẹn Ra Habaye 2.

 ¹¹ Ọwan i vwa huvwele i Jehova ọke ekwakwa i rhe serhọ ọvo-o, yanghene ọke ọwan e roro taghene e vwo izede ọrọrọ ghwomara-an. Ọwan i vwa ji sanọ irhi yanghene iruemru-urhi enẹyen ra na nyalele ọrhẹ erẹ ọwan ina ja nyalele-e. (Deuteronomy 12:32) Ukpomaran, ọwan a huvwele yi nẹ ẹhẹn sa, jerẹ ọbo ijoro na rọ tare: “Mi vwo omamerhomẹ kpahen ekama enọ, Ee, mi vwo ẹguọlọ kpahen aye.” (Psalm 119:47; Romans 6:17) Ọwan i guọlọ họhọ i Noah, ro dje ẹguọlọ ro vwo kpahen i Jehova phia nyoma o ru kemru kemru ri Jehova ọ ta riẹn no ru. Baibol na ọrhọ ta taghene i Noah “no ghini ru omaran.” (Genesis 6:22) Wu guọlọre nẹ i Jehova ọ ta aruẹ ẹmro ọrana kpahuọn?

12. Marhẹ ọwan ine ru sabu lẹrhẹ oma merhen i Jehova?

¹² Marhẹ oma o ru i Jehova ọke ọwan a huvwele yi? Ọwan a lẹrhẹ ọmudie “ghọgho.” (Proverbs 11:20; 27:11) Ọrana uphẹn ọduado! Ọwan a lẹrhẹ oma merhen Ọmemama na ọke ọwan a huvwele yi. Ọrẹn ọye ọ vwọ gba ọwan huvwele yi-i. Ukpomaran, ọ yẹrẹ ọwan ugbomọphẹ. Ọnana no mevirhọ taghene ọwan i vwo ugbomọphẹ re ne ru oborẹ ọgbare ọrhẹ oborẹ ọsọre. Jehova ọ guọlọre taghene ẹguọlọ rẹ ọwan i vwo kpahiẹn o mwu ọwan brorhiẹn ẹghwanren neneyo ọwan i sabu nyerẹn omamọ akpọ.—Deuteronomy 30:15, 16, 19, 20; Se Iyẹnrẹn Ra Habaye 3.

“EKAMA ENẸYEN A GHWA PHA-AN”

13, 14. Marhẹ ọwan i ru rhe taghene ekama Osolobrugwẹ a gbanhon pha-an? Dje udje yi.

¹³ Orhianẹ ọwan e roro taghene ekama i Jehova a sabu mọrọn aye nime aye i gbanhon phan, yanghene aye i lẹrhẹ ọwan vwo ugbomọphẹ vwo-o? Baibol na ọrhọ ta: “Ekama enẹyen a ghwa pha-an.” (1 John 5:3) Ẹmro i Greek ra ha rhian ẹmro na “a ghwa pha-an” o mevirhọ  “ohwan oghwaghwa.” Uvuẹn ekete i Baibol erọrọ, ẹmro ọnana a ha riẹ dje irhi egbogbanhon yanghene ihworho ra damoma ri ne sun awọrọ jeghwai sehiẹn aye. (Matthew 23:4; Acts 20:29, 30) New English Translation nọ rhian riẹn omana: “Ekama enẹyen i vwa djẹn ọwan mwuotọre-e.” Ekama i Jehova “a ghwa pha-an,” nọyẹ ọwan ina sabu nyalele aye. Bọmọke ọ ki ta rẹn ọwan ne ru emru, o rorie vwẹre.

¹⁴ Jerẹ udje, gbe rorie taghene wa ha userhumu rẹn ugbehian ọnọ kwrọ ekwakwa ye riẹ oghwa ọkpokpọ. Nọ kwrọ ọsoso ekwakwa na rhẹ ekpeti sansan. Ezẹko i pharare, aye ina phẹrẹ ẹkpare, ọrẹn ezẹko i ghware omamọ, ọ guọlọ awanva ri na kpare aye. Ugbehian na ọnọ ta wẹn taghene wẹwẹ ọvo i kpare ekpeti rọ mai ghwa usuẹn aye? Kakaka! Mesoriẹ? Fọkime ọ guọlọ ne wu ko-on. Jerẹ ugbehian ọrana, Jehova ọ sabu ta rẹn ọwan taghene ọwan i ru emru ra na ja sabu ru-u. (Deuteronomy 30:11-14) Jehova o vwẹruọ oborẹ ọwan i havwọ. Ọye “ọ dabu rhe oborẹ a maren ọwan lele, ọ karorhọ taghene ọwan eyẹn.”—Psalm 103:14.

15. Mesoriẹ ọwan ina sabu vwo imwẹro taghene irhi Jehova i havwiẹ fọkiẹ orhorhomu ọwan?

¹⁵ Moses ọ ta rẹn agbamwa Israel taghene irhi Jehova i havwiẹ “fọkiẹ orhorhomu” aye jeghwai ta taghene aye i rha huvwele yi ọnọ ha userhumu rẹn aye “sabu rhe nyerẹn.” (Deuteronomy 5:28-33; 6:24) Omaran ọ ji havwọ inyenana. Kemru kemru ri Jehova ọ ta rẹn ọwan taghene e ru, ọnọ lẹrhẹ akpenyerẹn ọwan rhomurhọ. (Se Isaiah 48:17.) Jehova ro rhiẹ Ọsẹ ọwan, o rhe oborẹ ọ mai rhomu rẹn ọwan ọke ephian. (Romans 11:33) Baibol na ọrhọ ta rẹn ọwan: “Osolobrugwẹ yẹ ẹguọlọ.” (1 John  4:8) Ọnana no mevirhọ taghene kemru kemru ri Jehova ọ ta ro ji ruẹ, ẹguọlọ yo mwuie.

16. Marhẹ ọwan i ru rhe taghene ana sabu huvwele udabọ ijẹgba ọwan ọrhẹ akpọ ọkon ra havwọ?

¹⁶ Ọ lọhọ ra na huvwele Osolobrugwẹ ọke ephia-an. Ọwan e nyerẹn uvuẹn akpọ ọkon ri Dẹbolo o suẹn. Ọ damoma rọ nọ riẹriẹ ihworho ru oborẹ obiomurun. (1 John 5:19) Ọwan a ji wọnrọn haso iroro ijẹgba ọwan, nime ọnọ sabu sun ọwan ja huvwele Osolobrugwẹ. (Romans 7:21-25) Ọrẹn ẹguọlọ ọwan i vwo kpahen i Jehova ọ yẹ ọwan omẹgbanhon re ne ru oborẹ orhomurun. Osolobrugwẹ ọ mẹrẹn omẹdamu ọwan ra na huvwele yi, nọ ha userhumu rẹn ọwan nyoma rọ yẹ ọwan ẹhẹn ọfuanfon ọnẹyen. (1 Samuel 15:22, 23; Acts 5:32) Ẹhẹn ọfuanfon ọ ha userhumu rẹn ọwan vwo iruemru ra lẹrhẹ ọwan huvwele Osolobrugwẹ.—Galatians 5:22, 23.

17, 18. (a) Me yẹ ọwan ine yono kpahen uvuẹn ọbe ọnana? (b) Me yẹ ọwan ine yono kpahen uvuẹn urhomu-ẹmro rọ ha kpahiẹn?

¹⁷ Uvuẹn ọbe ọnana, ọwan ine yono kpahen oborẹ ene ru sabu ruẹ oborẹ ọ merhen i Jehova oma. Ọwan ine yono oborẹ ene ru ha iruemru-urhi ọrhẹ ovwan ọfuanfon enẹyen ruiruo uvuẹn akpenyerẹn ọwan. Karorhọ taghene i Jehova ọ vwọ gba ọwan huvwele yi-i. Ọwan i rhe kwe huvwele yi, akpọ ọwan nẹ ono rhomurhọ, jeghwai vwo omamọ obọdẹn akpọ obaro na. Ọrọ mai ghanren, arha huvwele, ono dje ẹguọlọ rẹ ọwan i vwori kpahen Osolobrugwẹ phia.—Se Iyẹnrẹn Ra Habaye 4.

¹⁸ Na sabu rhe oborẹ ọgbare ọrhẹ oborẹ ọsọre, Jehova ọ yẹ owuowọnwan ẹhẹn obrorhiẹn. Ọwan i rhe yono ẹhẹn obrorhiẹn ọwan, ọnọ sa ọwan erhumu sabu “ru lele ekama enẹyen.” Omarana, me yẹ ẹhẹn obrorhiẹn ọwan, marhẹ ọwan ine ru sabu yonie? Jene yono kpahiẹn.