Imizu eghoghanren:

Ẹguọlọ re vwo kpahen Osolobrugwẹ ọrhẹ ihworho, yo mwu ọwan ‘ye ruẹ idibo ihworho uvuẹn egbamwa na ephian, ji bru aye rhẹ ame.’ (Matt. 28:​19, 20; Mark 12:​28-31) Obọdẹn ẹguọlọ o vwo omẹgbanhon omamọ. Ọnọ sabu hobọte ọmudu ihworho “ri vwo omamọ ẹhẹn ri ne vwo arhọ i bẹmẹdẹ.”—Acts 13:48.

Ọke bi, ọwan a tẹnroviẹ oborẹ ene ru yono idje ẹhaphia rhẹ urhomu, ọrhẹ oborẹ ene ru tiobọnẹ ẹbe ukoko na rẹn awọrọ. Vwana, o fori na damoma ruẹ oborẹ e lele awọrọ tẹmro kugbe, no rhomurhọ. Ene vi dje ẹguọlọ rẹn awọrọ, nyoma ra na tẹmro kpahen ekwakwa ri rhiẹ ọdamẹ rẹn aye. Ọrana o mevirhọ taghene ene fiomarhọ erhirhiẹ aye, ji rhe roro kpahen oborẹ o rhiẹ ọdamẹ rẹn aye owuowọnwan. Marhẹ ibroshọ ọnana ono ru ha userhumu rẹn ọwan ru te omaran?

Ibroshọ ọnana o vwo irhomu-ẹmro 12, ri dje kpahen iruemru ro fori ne vwo na sabu dje ẹguọlọ phia, jeghwai ruẹ idibo. A bọn uyono owuowu kpahen ikuegbe i Baibol owu, ro dje kpahen oborẹ i Jesu yanghene Olele Kristi ọrọrọ ọke ahwanren, o ru dje uruemru owu kirighwo phia uvuẹn owian aghwoghwo na. Ọbe ọnana ọnọ ha userhumu rẹn ọwan guọlọ izede re ne dje ẹguọlọ rẹn ihworho, ukperẹ ene yono idje ẹhaphia rhẹ urhomu. Dedevwo iruemru na owuowu i ghanranren uvuẹn eghọn ephian uvuẹn owian aghwoghwo na, ọrẹn ana kpomavi rẹn oborẹ iruemru ezẹko kirighwo ine ru ha userhumu rẹn ọwan ọke re ruẹ aghwoghwo, ẹrharhumu bru, yanghene uyono i Baibol.

Uvuẹn uyono owuowu, dabu roro kpahen oborẹ wu ne ru dje uruemru na phia, ọke we rhe lele ihworho tẹmro uvuẹn ekete we rhirhiẹ. Damoma ruẹ ẹguọlọ wu vwo kpahen i Jehova ọrhẹ ihworho kodorhọ. Ẹguọlọ ọrana yọ nọ mai ha userhumu wẹn ruẹ idibo, ghwẹ ena wu vwori.

Ghini uphẹn ọduado yẹ ame i vwori, rẹ ame ine lele are wian kugbe. (Zeph. 3:9) Jenẹ i Jehova ọ ha ebrurhọ ọduado wẹn, ru we dje ẹguọlọ phia rẹn ihworho ji ruẹ idibo!