Ọwan ephian i guọlọ igho ra na hẹrote edamẹ ekrun ọwan. (Proverbs 30:8) Nime “igho ọ ji sẹrorẹ” ohworho. (Ecclesiastes 7:12) Ọnọ sabu bẹn ọkezẹko rẹ esa ọrhẹ ane ina ta kpahen igho, ọrẹn wu vwe jẹ igho suẹ ẹghwọ uvuẹn orọnmo ọnọ-ọ. (Ephesians 4:32) O fori nẹ esa ọrhẹ ane i hẹrosuẹ owuowọnwan aye erhe brorhiẹn oborẹ ana ghwọghọ igho lele.

OBORẸ I BAIBOL NA Ọ TARE: “Ọrọmo usuẹn are na rọ guọlọ bọn oghwa ọduado ro no jo siyẹ roro kpahen uchunu igho ro no mwuien vwẹre, sẹ o vwo uchunu igho ro no te ha bọn ye hin?” (Luke 14:28) Ọ ghanranren omamọ nẹ esa ọrhẹ ane i dabu djiroro oborẹ aye ina ghwọghọ igho lele. (Amos 3:3) Are i brorhiẹn oborẹ are ina dẹ, ọrhẹ uchunu igho are ina sabu ghwọghọ. (Proverbs 31:16) O fo ne are i dẹ i kemru kemru are i mẹrẹnren nime are i vwo igho na-a. Damoma kẹnoma rẹn osẹriọ. Ghwọghọ igho wu vwori ọvo.—Proverbs 21:5; 22:7.

OBORẸ WU NA SABU RU:

• Are i rha ghwọghọ igho hẹrhẹ uvuẹn ehion ubiamo na, are awanva i brorhiẹn oborẹ are ina haye ru

• Are i rha ghwọghọ igho vrẹn oborẹ are i fiẹrorhọ, are i damoma ti nẹ uchunu ekwakwa rẹ are a dẹ. Jerẹ udje, are ina sabu sere emaren uvuẹn oghwa ukperẹ are ina dẹ emaren re

OBORẸ I BAIBOL NA Ọ TARE: “Hẹrote i kemru kemru lele izede ro dje ọghọ phia, orhiẹ obaro i Jehova ọvo-o, ọrẹn, ji te obaro ituakpọ.” (2 Corinthians 8:21) Wu vwe tiẹ uchunu igho wa mẹrẹn nu rẹn ohworho wa rọnmọ-ọ.

Ta rẹn ohworho wa rọnmọ orhianẹ wa guọlọ brorhiẹn rọ nọ sabu lẹrhuọ ghwọghọ igho rhọ. (Proverbs 13:10) Are arha ta kpahen igho are i vwori, ọnọ ha userhumu rẹn are sẹrorẹ ufuoma uvuẹn orọnmo are. Nie taghene igho wa mẹrẹn ọrẹ ekrun na ephian, ukperẹ ono rhiẹ ọnọ ọvo.—1 Timothy 5:8.

OBORẸ WU NA SABU RU:

• Are awanva i kwerhọ uchunu igho are ina ghwọghọ oberhumu owuowọnwan

• Are i vwa hẹrhẹ nẹ obẹnbẹn ọ homaphia vwẹre bọmọke are ina ki ta kpahen igho-o