UYONO 03
Wu Na Sabu Hẹroso i Baibol Na?
Baibol na o vwo ive ọrhẹ urhebro buebun. Ọkezẹko wu vwo ẹhẹn wu ne yono kpahen oborẹ ọ ha uvuẹn i Baibol na, ọrẹn, ọkezẹko wa ghwai vwo omamerhomẹ kpahiẹ-ẹn. O fori ne wu hẹroso ive ọrhẹ urhebro ri ha uvuẹn ọbe ahwanren ọnana? Ana sabu ha oborẹ i Baibol na ọ tare ruiruo vwana, ji vwo imwẹro kpahen oborẹ ọ tare kpahen obaro na? Ihworho buebun i vwo imwẹro kpahiẹn. Ame i jiririe wẹn ne wu yono i Baibol na.
1. Ikuegbe ri ha uvuẹn i Baibol na ghini urhomẹmro?
Baibol na ọ vuọnren rhẹ “iyẹnrẹn urhomẹmro ri gbare.” (Ecclesiastes 12:10) Ọ ta kpahen oborẹ ọ phiare ro sekpahen ihworho. (Se Luke 1:3; 3:1, 2.) Ihworho ra guọlọ iyẹnrẹn ahwanren ọrhẹ era tọn otọre guọlọ emru, i mẹrenriẹn vwrurhe taghene ẹdẹ, ihworho, ekete ọrhẹ irueruo sansan ri Baibol na o dje kpahen urhomẹmro.
2. Mesoriẹ ana sabu hẹroso i Baibol na dedevwo ọbe ahwanren?
Baibol na ọ hunute ekwakwa buebun re vwe rhe kpahen ọke ra ya ye. Jerẹ udje, ọ tẹmro ro sekpahen isayẹnsi. Ọke ra ya i Baibol na, ihworho buebun e vwo imwẹro kpahen ekwakwa buebun rọ tare kpahen isayẹnsi-i. Ọrẹn vwana, ihworho ri yono kpahen isayẹnsi i kweri taghene iyẹnrẹn ri ha uvuẹn i Baibol na i gbare. Baibol na ọbe ra “sabu hẹrosua vwana ọrhẹ bẹmẹdẹ.”—Psalm 111:8.
3. Mesoriẹ ana sabu hẹroso oborẹ i Baibol na ọ tare kpahen obaro na?
Baibol na ọ vuọnren rhẹ aruẹmẹrẹn * ri ta kpahen “ekwakwa ri vwa ji phia.” (Isaiah 46:10) Ọ ji mẹraro kpahen ekwakwa buebun ri na phia bọmọke aye i ki homaphia. O ji dje kpahen oborẹ akpọ na ono rhirhiẹ uvuẹn ọke ọwan na. Uvuẹn uyono ọnana, ọwan ine yono kpahen aruẹmẹrẹn i Baibol ezẹko. Iyẹnrẹn na i gbare omamọ!
YONO KODO RHỌ
Yono kpahen oborẹ isayẹnsi ọke ọwan na o ru kwerhọ oborẹ i Baibol na ọ tare, ji yono kpahen aruẹmẹrẹn i Baibol ezẹko ri merhoma.
4. Isayẹnsi o kwerhọ oborẹ i Baibol na ọ tare
Ọke ahwanren, ihworho buebun i vwo imwẹro taghene akpọ na ọ ha oberun emru. Kporo IVIDIO na.
Djokarhọ iyẹnrẹn ra ya rhẹ ọbe i Job omẹ ẹgbukpe 3,500 ri vrẹnren. Se Job 26:7, orho ru, are i gba kpahenrhọ onọ ọnana:
-
Mesoriẹ o gbe ọwan unu ọke ra ta taghene a ha akpọ na “kpahen oberun emru owuorowu-u?”
Ẹgbukpe 200 ri vrẹnren, ye ki me rhe oborẹ a kwaphiẹ ame rọ ha uvuẹn otọrakpọ na lele. Ọrẹn, djokarhọ oborẹ i Baibol na ọ tare omẹ ẹgbukpe 3,500 ri vrẹnren. Se Job 36:27, 28, orho ru, are i gba kpahenrhọ enọ enana:
-
Mesoriẹ oborẹ a kwaphiẹ ame rhọ lele o gbo unu?
-
Ekete i Baibol re wu ghwai se na o ruẹ imwẹro wu vwo kpahen i Baibol na gbanhonrhọ?
5. Baibol na ọ mẹraro kpahen ekwakwa oghẹnrensan ri na homaphia
Se Isaiah 44:27–45:2, orho ru, are i gba kpahenrhọ onọ ọnana:
-
Iyẹnrẹn ego yi Baibol na ọ mẹraro kpahen ẹgbukpe 200 a ki ghwọghọ i Babylon?
Ikuegbe o djephia taghene i Cyrus Orodje i Persia ọrhẹ egba owọnriẹn, i fi Babylon kparobọ uvuẹn ẹgbukpe 539 B.C.E. * Aye ni rurie nẹ urhie rọ sẹrorẹ amwa na o mwuo. Aye a wọnrọn vwẹre aye i ki nya anurẹsẹ re rhie firhọ na ruẹ uvuẹn amwa na, ji fie kparobọ-ọ. Vwana, ọ vrẹn ẹgbukpe 2,500 ne, arha sabu bọn i Babylon ghwomara-an. Djokarhọ oborẹ i Baibol na ọ mẹraruiẹ rhotọre.
Se Isaiah 13:19, 20, orho ru, are i gba kpahenrhọ onọ ọnana:
-
Marhẹ aruẹmẹrẹn kpahen i Babylon o rugba lele?
Oghwọghọ i Babylon uvuẹn Iraq
6. Baibol na ọ mẹraro kpahen ekwakwa ra phia inyenana
Baibol na ọ ta rẹn ọwan taghene, e “nyerẹn uvuẹn ẹdẹ ri koba na.” (2 Timothy 3:1) Djokarhọ oborẹ i Baibol na ọ tare kpahen ẹdẹ ri koba na.
Se Matthew 24:6, 7, orho ru, are i gba kpahenrhọ onọ ọnana:
-
Ekwakwa kirighwo ego yi Baibol na ọ tare taghene ene rhiẹromẹrẹn uvuẹn ẹdẹ ri koba na?
Se 2 Timothy 3:1-5, orho ru, are i gba kpahenrhọ enọ enana:
-
Iruemru ego yẹ ihworho ine vwo uvuẹn ẹdẹ ri koba na ri Baibol na o dje kpahen?
-
Iruemru ego usuẹn enana ye wa mẹrẹn vwana?
OBORẸ IHWORHO EZẸKO A TA: “Baibol na ọbe esia ro vwo iyẹnrẹn ra na ja sabu hẹroso.”
-
Me yọ lẹrheriẹ mwuẹro taghene wu na sabu hẹroso i Baibol na?
ME WU YONORIN?
Ikuegbe, isayẹnsi ọrhẹ aruẹmẹrẹn i djephia taghene wu na sabu hẹroso i Baibol na.
Ẹzẹkoko
-
Ikuegbe ri ha uvuẹn i Baibol na ghini urhomẹmro?
-
Izede ego yẹ isayẹnsi o ru kwerhọ oborẹ i Baibol na ọ tare?
-
Wu rorori taghene i Baibol na ọ mẹraro kpahen obaro na? Me wu rorori? Mesoriẹ?
GUỌLỌ IYẸNRẸN ERỌRỌ
Oborẹ i Baibol na ọ ta kpahen isayẹnsi ọgbare?
“Isayẹnsi o Vwo Ekwerhọ Rhẹ i Baibol na?” (Urhomu-ẹmro rọ ha uvuẹn itanẹti)
Ekwakwa ego yi na phia uvuẹn “ẹdẹ ri koba na”?
“Aruẹmẹrẹn 6 ri Baibol na ọ ta Kpahen re Ruẹgba Inyenana” (The Watchtower, May 1, 2011)
Yono kpahen aruẹmẹrẹn i Baibol ro sekpahen oborẹ Usuon i Greek o rugba lele.
Yono kpahen oborẹ aruẹmẹrẹn i Baibol, o ru wene ukẹro rẹ ọhworhare owu ọ ha ni Baibol na.
“Ha mẹ, Osolobrugwẹ o Vwo Nyerẹ-ẹn” (The Watchtower No. 5 2017)
^ Udjoghwẹmro 9 Aruẹmẹrẹn o mevirhọ iyẹnrẹn ro nẹ obẹ Osolobrugwẹ rhe ra ta rẹn ọwan kpahen oborẹ ọnọ phia obaro na.
^ Udjoghwẹmro 25 B.C.E. o mevirhọ “A ki mẹrẹn ikekele ọke ọwan,” C.E o mevirhọ “Ikekele ọke ọwan.”
