Roro kpahen erhirhiẹ ọnana: Ọke ro ruiruẹn rhẹ igbehian yen, Tim no doron ibọru rọ ghwọghọ ivakpo ohworho ro rhirhiẹ kẹrẹ aye.

Orhianẹ wẹwẹ yi Tim, me ọyẹ wu ne ru?

WU VWO ODJẸ ESA:

1. Zẹ.

2. kpere ọwọrọ.

3. Ta rẹn ọrẹ we rhirhiẹ kẹrẹ na oborẹ ọphiare, jeghwai ta riẹn taghene wu na kwa oborẹ wu ghwọghọre na.

Wu na sabu vwo ẹhẹn wu na djẹ Odjẹ A. Ọrẹn o fori ne wu ta esọre wu ruru—orhianẹ ivakpo wu biomurun yanghene emru ọrọrọ.

1. Ọyẹ oborẹ o fori ne ru.

   Baibol na ọrhọ ta: ‘Ọwan i guọlọ rha ta urhomẹmro ọrẹ i kemru kemru.’—Hebrews 13:18.

2. Ihworho a harhomẹ erẹ a ta orusọ rẹ aye i ruru.

   Baibol na ọrhọ ta: ‘Ọrẹ o rhurhu ọdandan ọnẹyen o vwo efikparobọ-ọ, ọrẹn ọrẹ ọ ta ọdandan ye phia jeghwai nya je aye vwo, ene dje arodọmẹ riẹn.’—Proverbs 28:13.

3. Mai ghanren kparobọ, ọ merhen Osolobrugwẹ oma.

   Baibol na ọrhọ ta: ‘Jehovah o vwo utuoma kpahen ọrẹ ọ ta efian, ọrẹn o vwo omamọ onyerẹnkugbe rhẹ ohworho ọsoso.’—Proverbs 3:32.

Karina, ẹgbukpe 20, ọ guọlọ ti itikẹti ra ha bru eho riẹn nu rẹn ọsẹ ye fọkiẹ imoto rọ ghwa gbanhon. Ọrẹn ọ sabu tie nu bẹmẹdẹ-ẹ. ‘Emru ẹgbukpe owu ọ vrẹn,’ Karina nọ tare, ‘ọsẹ mẹ nọ mẹrẹn itikẹti na ra ya odẹ mẹ rhọ. Ọnana no firi mẹ rhẹ okpetu!’

Me ye yonorin? Karina ọrhọ ta: ‘We rhe ti erusọ nuẹ, ọ lẹrhẹ ekwakwa biomẹ rhọ. Wu na djẹ rhọ ye orhoru!’

Baibol na ọrhọ ta: ‘Ọwan ephian e ruẹ sọ ọgbọ buebun.’ (James 3:2, ẹmro obotọre) Jerẹ oborẹ ọ havwọ, ọrana oka omeriotọre ọrhẹ ẹ do te edje a rha ta erusọ re ruru—omarana ruie ogege.

Udjoghwẹ rọ ha kpahiẹn, ọyẹ yono nẹ erusọ ọnọ. Ọgbọtọ owu re se Vera ọrhọ ta: ‘Mia damoma mi ne yono emru nẹ orusọ owuowu mi ruru, rọ nọ sa mẹ erhumu rhiẹ omamọ ohworho jeghwai rhe oborẹ mi na hẹrote erhirhiẹ na lele ọke ọrọrọ.’ Jenẹ e ni oborẹ wu ne ru ọrana lele.

Wu kpare ijighere ọsẹ ọnọ, no biomurun ọke wa ghwa ye. Me ọyẹ wu ne ru?

• Wu ta oborẹ ọ phiare rẹn ọsẹ ọnọ-ọ.

• Ta rẹn ọsẹ ọnọ oborẹ ọ ghini phia.

• Ta rẹn ọsẹ ọnọ oborẹ ọ phiare ọrẹn, kpere ọwọrọ.

Wa vrẹn ọdamuni-i, fọkime we mwuegbe rhọ ye-e. Me ọyẹ wu ne ru?

• Kpere ọdamuni na.

• Kpere oma fọkiẹ ọdamuni na wu vwa vrẹn.

• Kpere ọrẹ o yonuo na.

 Gbe roro kpahen erhirhiẹ era hunute na, ne wu fioma rhẹ (1) ọse na ọrhẹ (2) oyono na. We rhe kiki kwerhọ erusọ enọ, me ọyẹ ọsẹ ọrhẹ ọrẹ o yonuo na ine roro kpahuọn? We rhe rhurhu erusọ enọ, me ọyẹ aye ine roro kpahuọn?

Gbe roro kpahen orusọ wu ruru uvuẹn ẹgbukpe ro rieri na, ne wu kpahenrhọ enọ enana.

Me ọyẹ orusọ na? Marhẹ wu ru orusọ ọrana lele?

• Mia ta orusọ na phia-a.

• Mi kpere ọwọrọ fọkiẹ orusọ na.

• Mi ta orusọ na phia.

Wa rha ta orusọ na-a, marhẹ oma o ruruo lele?

• Dẹn—Mi vabọ ọnana!

• E-eh—Manẹ mia ta urhomẹmro.

Marhẹ we rhe ru erhirhiẹ na rhomurhọ?

Me ọyẹ wu yonorin nẹ orusọ wu ruru na?

Mesoriẹ ihworho ezẹko i vwa guọlọ ta erusọ rẹ aye ruru?

Ikẹro ọgo yẹ ihworho ine ha nuo wa rha ha ọke ephian rhurhu erusọ enọ, ọrẹn ikẹro ọgo yẹ aye ine ha nuo wu rha ta erusọ enọ?—Luke 16:10.