Roro kpahen erhirhiẹ ọnana: Ọke rẹ Julia o ni ujegbe, oborẹ ọ mẹrẹn yẹ ohworho ro vwoma. ‘Mi guọlọ tiame,’ nọ ta rẹn omayen—dedevwo eri vwiẹriẹ ọrhẹ igbehian yen a ta riẹn taghene ‘o vwoma-a.’

Ovwo jijiri na, Julia o roro kpahen oborẹ ono ru sabu ‘tiame ibiesuọn.’ Oborẹ ọnọ ghwai ru yẹ ọnọ ha orhọmo kpe omayen ẹdọke ezẹko . . .

Wu rhe vwo aruẹ iroro i Julia, me ọyẹ wu ne ru?

Orhiẹ oborẹ ọsọre wu ne brudu kpahen ugboma ọnọ-ọ. Itiọrurhomẹmro, i Baibol na ọ tẹmro ememerhen kpahen erhumu ugboma ehworhare ọrhẹ emẹse buebun, jerẹ Sarah, Rachel, Abigail, Joseph, ọrhẹ David. Baibol na ọ tare taghene ọmase owu re se Abishag ‘orhoma omamọ.’—1 Kings 1:4.

Ọrẹn, iphuphẹn buebun e brudu kpahen oborẹ ugboma aye ọ havwọ. Ọrana ọnọ sabu suẹ ebẹnbẹn eduado. Roro kpahen ọnana:

• Uvuẹn uyono owu, egbọtọ buebun e dje taghene aye i vwoma phan, ọrẹn, itiọrurhomẹmro, ibiesuọn yi ghini vwoma phan.

• Uvuẹn uyono ọrọrọ, emẹse ezẹko ri vwe vwo ẹhẹn, e roro taghene aye vwo ẹhẹn phan!

• Uvuẹn omẹdamu rẹ aye ine tiame, iphuphẹn ezẹko i vwo anorexia—ọnana emiamo rọ lẹrhẹ emaren nọhọ fọkiẹ orhọmo ẹ ha kpe oma, rọ nọ sabu suẹ uhwu.

 Wu rha mẹriẹn taghene anorexia ọ guọlọ homaphia yanghene emaren ẹkpare re, guọlọ userhumu. Tonrhọ nyoma wu na ta rẹn eri vwiẹ ruọ yanghene ohworho ro te edje wu hẹroso. Baibol na ọrhọ ta: ‘Omamọ ugbehian o dje ẹguọlọ phia ọke ephian, jeghwai omizu re vwiẹre fọkiẹ ọke ebẹnbẹn.’—Proverbs 17:17.

Itiọrurhomẹmro, aruo ohworho wu havwọ uvuien, yọ lẹrhuọ rhiẹ ohworho erhumu yanghene ọrẹ ovwo vwo erhumu. Roro kpahen Absalom ọmọ Orodje David. Baibol na ọrhọ ta:

‘O vwo ọhworhare owuorowu re jiri erhumu ọnẹyen jerẹ ọnana-a. . . . O vwo upe owuorowu omaye-en.’—2 Samuel 14:25.

Ọrẹn, idama ọnana ọ vuọnre rhẹ omẹkpare, omwemẹ re ne ru oborẹ obiomurun, ọrhẹ ọphiẹrhọ! Omarana, fọkiẹ uruemru Absalom o vwori Baibol na ọrhọ ta omamọ ẹmro kpahiẹ-ẹn; o dje rie rhẹ ohworho rẹ ovwo vwo atamwu, ro ji vwo ẹhẹn ro no kpe.

Fọkiẹ iroro ọnana, i Baibol na nọ yẹrẹ ọwan urhebro ọnana:

‘Ku ewun uruemru ọkpokpọ na rhọ.’—Colossians 3:10.

‘Wu we jenẹ eheri ọnọ rhiẹ ọrẹ ugboma ọvo-o . . . , ọrẹn jenẹ orhiẹ ohworho odjahen wu havwọ uvuẹn ẹhẹn ọnọ.’—1 Peter 3:3, 4.

Obiomu ene vwo erhumu-u, ọrẹn oborẹ ọ mai ghanren kparobọ yẹ uruemru ọnọ. Orhoru, omamọ iruemru ni na lẹrhuọ vwo erhumu rhọ uvuẹn ikẹro awọrọ vrẹn ugboma ọgbogbanhon yanghene ugboma ro vwo erhumu! ‘Ihworho a kiki mẹrẹn ọrẹ o vwo erhumu,’ omaran ọgbọtọ re se Phylicia ọ tare, ‘ọrẹn aruo ohworho wu havwọ uvuien ọrhẹ omamọ iruemru ọnọ ọyẹ ihworho ina mai karorhọ.’

Ẹhẹn ọnọ o seriotọre ọke rẹ we ni ugboma ọnọ?

Wu vwo ẹhẹn wu na ha amivi kpẹn oma yanghene dobọ emaren ezẹko ẹriọ ji ne wu sabu kpọ obẹnbẹn owu vi uvuẹn ugboma?

Me ọyẹ wu ne wene kpahen ugboma wu rha sabu ru tomaran? (Kokarhọ erẹ wu guọlọ ru.)

• URHIERHI

• ẸHẸN

• ẸTON

• UGBOMA

• UGHWARO

• OPHIANRUGBOMA

Orhianẹ ee ye wu kpahenrhọ enọ eva erukaro na jeghwai kokarhọ ekwakwa esa yanghene ghwomaran uvuẹn onọ ọresa, roro kpahen ọnana: Ọnọ sabu rhirhiẹ taghene ihworho e vwa ha ukẹro ọsọre nuo jerẹ oborẹ we ni oma na-a. Ọphẹrẹre wu ne brudu kpahen ugboma ọnọ.—1 Samuel 16:7.