UYONO 4
Ọrọmo Yẹ i Jesu Kristi?
1. Marhẹ i Jesu ọ ton akpọ-enyerẹn rhọ?
Iruemru ego yẹ ọ lẹrhẹ i Jesu rhiẹ ohworho ra sabu rua?—MATTHEW 11:29; MARK 10:13-16.
Jesu ọvẹnẹ ituakpọ, ọye orhirhiẹ odjuwu jerẹ ohworho ẹhẹn bọmọke eki vwiẹ ye rhẹ otọrakpọ na. (John 8:23) Ọye yẹ emru ukukaro Osolobrugwẹ o kiki ma. Ọye nọ ha userhumu riẹn ma ekwakwa erọrọ. Ọye ọvo yẹ i Jehova ọ ha obọ ye ma, ọye soriẹ e seyi ‘Ọmọ owu ọvo’ Osolobrugwẹ ovwori. (John 1:14) Jesu ọye Unu-ẹmro harẹn Osolobrugwẹ, omaran na, ne serie ‘Ẹmro na.’—Se Proverbs 8:22, 23, 30; Colossians 1:15, 16.
2. Mesoriẹ i Jesu ọ rhe otọrakpọ na?
Osolobrugwẹ odje Ọmọ yen rhe otọrakpọ na, nyoma ro wene arhọ ye rhẹ uvuẹn evwan ọgbọtọ ro vwo ji chiọghọ onye i Jew re se Mary. Omaran na, Jesu ovwo ọsẹ onyakpọ-ọ. (Luke 1:30-35) Jesu ọ rhe otọrakpọ na (1) no yono ihworho kpahen Osolobrugwẹ, (2) no dje udje harẹn ọwan oborẹ ene ru sabu ru ọhọre Osolobrugwẹ udabọ ebẹnbẹn, rhẹ (3) nọ ha arhọ rọ gbare ọnẹyen ru ‘otan’ harẹn ọwan.—Se Matthew 20:28.
3. Mesoriẹ ọwan aguọlọ otan?
Otan ọye osa ra kwa aha tiẹ ohworho nẹ abọ uhwu. (Exodus 21:29, 30) Uhwu kugbe ọho, e rhiẹ ọhọre Osolobrugwẹ harẹn ituakpọ-ọ. Marhẹ ọwan i ru rhe? Osolobrugwẹ ọ ta harẹn ọhworhare ukukaro Adam, taghene orho ru oborẹ i Baibol na o seri ‘ọdandan,’ ọye ono hwuo. Orhianẹ Adam o ru ọdandan bri-i, ovwo hwu-u. (Genesis 2:16, 17; 5:5) Jerẹ oborẹ i Baibol na ọ tare, uhwu ọ ‘ruẹ uvuẹn’ akpọ na nyoma Adam rhe. Omaran na, emọ Adam ne ha ọdandan rhẹ uhwu riẹ-uku. Ọwan e guọlọ otan ro no tiẹ ọwan nẹ abọ uhwu aha riẹ-uku mie Adam.—Se Romans 5:12; 6:23.
Ọrọmo yẹ ọnọ sabu kwosa otan ro no tiẹ ọwan nẹ abọ uhwu na? Ọwan i rhe hwu, osa edandan ọwan ọvo ọyẹ ana sabu kwa. Ohworho rọ vwọ gba ọ sabu kwosa ọdandan ohworho ọrọrọ-ọ.—Se Psalm 49:7-9.
4. Mesoriẹ i Jesu ohwu?
Jesu ọ vẹnẹ rẹ ọwan nime ọye ohworho rọ gbare. Omaran na, ọye o hwu fọkiẹ edandan enẹye-en—nime ọye oruẹ ọdandan owuorowu-u, Jesu ohwuru fọkiẹ edandan ọwan. Osolobrugwẹ odje ẹguọlọ rọ maido harẹn ituakpọ nyoma ro dje Ọmọ yen rhe no mo hwuo fọkiẹ ọwan. Jesu ọ ji dje ẹguọlọ harẹn ọwan nyoma rọ kerhọ Ọsẹ ye, ọ ji ha arhọ ọnẹyen ha kpahen otọre fọkie edandan erẹ ọwan.—Se John 3:16; Romans 5:18, 19.
Ni Ividio na Mesoriẹ i Jesu o Hwu?
5. Me yẹ i Jesu o ruẹ ọke ọnana?
Jesu osimi ihworho re kpomẹ, ọ rhọmọ erẹ ihwuru, o tiẹ ihworho nẹ ebẹnbẹn ọke rẹ ọ ha uvuẹn otọrakpọ na. Ekwakwa enana idje oborẹ ọye ono ru harẹn ituakpọ ri kerhọ ye ọke rọsa na. (Matthew 15:30, 31; John 5:28) Ọke rẹ i Jesu ohwu hin, Osolobrugwẹ no rhọme riẹn nẹ uhwu rhe jerẹ ohworho ẹhẹn. (1 Peter 3:18) Jesu nọ hẹrhẹ uvuẹn obọrhe Jehova bọmọke rọ yẹ ye omẹgbanhon ro no sun jerẹ Orodje uvuẹn akpọ na ephian. (Hebrews 10:12, 13) Ọke ọnana, Jesu osuẹn obẹ odjuwu jerẹ Orodje. Ilelikristi ne ghwoghwo iyẹnrẹn esiri ọnana lele ekete ephian.—Se Daniel 7:13, 14; Matthew 24:14.
Phẹrẹkpẹ, Jesu ọnọ ha omẹgbanhon ọnẹyen jerẹ Orodje fi oba rhẹ oja-ẹriọ kugbe ihworho ra suiẹ. Ọsoso ihworho ri vwo esegburhomẹmro kpahiẹn nyoma aye a kerhọ ye, ena riẹ omamerhomẹ i paradais uvuẹn otọrakpọ na. Se Psalm 37:9-11.
