UYONO 6
Ifiẹrorhọ Ọgo Yẹ Ọ Havwiẹ Harẹn Ihworho Ri Hwu ne?
1. Iyẹnrẹn esiri ọgo yẹ ọhavwiẹ harẹn ihworho ri hwuru?
Ẹdọke ẹnẹ yẹ ugbehian i Jesu, Lazarus ohwu ne, bọmọke i Jesu ọki te Bethany rọ kẹrẹ i Jerusalem. Mary kugbe Martha imizu i Lazarus ni riẹ ekete esinrien rhọ. Ojiri-i, ihworho buebun ni kokori. Wu ne se roro kpahen oborẹ oma ọ merhen Martha rhẹ Mary te ọke i Jesu ọ rhọmọ Lazarus rhiẹ akpọ?—Se John 11:21-24, 38-44.
Martha orhe kpahen iyẹnrẹn esiri ro se kpahen ihworho ri hwuru. Ọye orheri taghene i Jehova ọnọ rhọmọ ihworho ri hwuru rhiẹ akpọ.—Se Job 14:14, 15.
2. Erhirhiẹ ọgo yẹ ihworho ri hwuru na e havwọ?
Osolobrugwẹ nọ ta harẹn Adam: ‘Wẹwẹ eyẹn, eyẹn wu na je ghwẹriẹ oma nya.’ —GENESIS 3:19.
Eyẹn yẹ aha ma ituakpọ. (Genesis 2:7; 3:19) Ọwan e vwo erhi ro vwo hwuẹ ro nẹ uvuẹn oma ọwa-an. Ọwan evwo emru owuorowu uvuẹn oma ọwan rọ vabọ uhwu-u. Ọwan i rhe hwu, avwẹrhiẹn ọwan oji hwu, omaran ji te iroro ọwan. Nọ ye soriẹ i Lazarus ọ tẹmro kpahen oborẹ ọye o rhiẹromẹrẹn ọke rẹ ọye ohwu-u, nime ihworho ri hwuru erhe emru owuorowu-u.—Se Psalm 146:4; Ecclesiastes 9:5, 6, 10.
Osolobrugwẹ ọ ha erhanren gboja rẹn eri hwuru? Baibol na odje phia taghene ihworho ri hwuru e rhe emru owuorowu na-a, nọyẹ uyono amwa erhanren ofian rọ rhaphiẹ Osolobrugwẹ. Uruemru ra torhẹ ihworho rhẹ erhanren, o tuien oma.—Se Jeremiah 7:31.
Ni Ividio na Erhirhiẹ Ọgo Yẹ Ihworho Ri Hwuru Na E Havwọ?
3. Ihworho ri hwuru ena je sabu tẹmro harẹn ọwan?
Ihworho ri hwu ne e vwa tẹmro-o, aye vwe ji rho-on. (Psalm 115:17) Ọrẹn, emakashe ezẹko evwọkon, aye a tẹmro harẹn ihworho, aye homaphia harẹn ihworho họhọ ihworho ri hwuru. (2 Peter 2:4) Jehova ovwo utuoma kpahen uruemru rẹ aga irimi.—Se Deuteronomy 18:10, 11.
4. Ayọmo yẹ a sa mọ rhọmọ rhiẹ akpọ?
Iduduru ihworho ri hwuru ọyẹ a sa mọ rhọmọ rhiẹ akpọ. Ihworho ezẹko ri vwe rhe Osolobrugwẹ dede, ri ru oborẹ o biomurun, ana ji rhọmọ aye nẹ uhwu rhe.—Se Luke 23:43; Acts 24:15.
Ihworho a rhọmọ rhe ine vwo uphẹn aye ne yono urhomẹmro na kpahen Osolobrugwẹ, rẹ aye ine vwo esegburhomẹmro kpahen i Jesu nyoma aye ena kerhọ ye. (Revelation 20:11-13) Erẹ a rhọmọ rhe na i rhe ru oborẹ orhomurun, nẹ aye ine vwo omamerhomẹ uvuẹn akpọ na bẹmẹdẹ.—Se John 5:28, 29.
5. Me yẹ ẹrhọmọnuhwu na o yono rẹ ọwan kpahen i Jehova?
Ifiẹrorhọ ọ havwiẹ harẹn ihworho ri hwuru, nyoma ọrẹ Osolobrugwẹ odje Ọmọ yen mo hwu harẹn ọwan. Omaran na, ẹrhọmọnuhwu na odje rẹ ọwan kpahen ẹguọlọ i Jehova rhẹ ẹghẹlẹ-ọphẹ ọnẹyen. Ọke rẹ ihworho ri hwuru na erhọmọ ne, ọrọmo wu ghini guọlọ mẹrẹn?—Se John 3:16; Romans 6:23.
