UYONO 13
Me Yẹ Iyẹnrẹn Esiri Ro Se Kpahen Ẹga?
1. Ẹga ephian ye ri rhomurun?
A mẹrẹn ihworho ri vwo ẹhẹn esiri uvuẹn ẹga sansan. Orhiẹ emru aghọghọ taghene Osolobrugwẹ ọ mẹrẹn ihworho erana, ọ je hẹrọte aye. Jọrẹn, ihworho ezẹko aha ẹga rhurhu oma ruẹ orukuruku. (2 Corinthians 4:3, 4; 11:13-15) Jerẹ oborẹ iyẹnrẹn o dje phia, ẹga ezẹko i fi oma aye rhẹ ozighi, ikpekpekpe, ivweri kugbe egbe emọboban aghwa. Marhẹ irueru enana ọda ihworho ra ga Osolobrugwẹ urhomẹmro na oma te!—Se Matthew 24:3-5, 11, 12.
Ẹga urhomẹmro ọ ha odidi vwẹ Osolobrugwẹ, ọrẹn ẹga efian o tuien oma. Aye e yono iyono efian i vwa ha uvuẹn i Baibol na, kugbe iyono efian ri se kpahen Osolobrugwẹ rhẹ eri hwu ne. Jọrẹn, Jehova ọ guọlọre taghene ihworho i rhe urhomẹmro ro se kpahiẹn.—Se Ezekiel 18:4; 1 Timothy 2:3-5.
2. Me yẹ iyẹnrẹn esiri ro se kpahen ẹga?
Itiọrẹ-urhomẹmro, ẹga i sabu phiẹ Osolobrugwẹ rhọ taghene aye vwo ẹguọlọ kpahiẹn, ọrẹn aye vwo ẹguọlọ kpahen akpọ Echu-u. (James 4:4) Ẹmro Osolobrugwẹ o se ẹga efian ‘Babylon Orode.’ Babylon yẹ agbamwa ahwanren, uvuien yẹ ẹga efian ọtonrhọ ọke Ukude i Noah ọ vrẹn hin. Nime ẹga efian a phiẹ ihworho rhọ, jeghwai sehiẹn aye, Osolobrugwẹ ọ sa mọ ha oghwọghọ kpregede harẹn aye phẹrẹkpẹ.—Se Revelation 17:1, 2, 5, 16, 17; 18:8.
Iyẹnrẹn esiri erọrọ e havwiẹ. Ihworho ri vwo ẹhẹn esiri re ha uvuẹn ẹga efian sansan, a sẹrẹ Jehova ẹro-o. Ọ ha uyono urhomẹmro na e koko aye.—Se Micah 4:2, 5.
3. Me yẹ ofori taghene ihworho ri vwo ẹhẹn esiri iru?
Ẹga urhomẹmro oku ihworho kugbe
Jehova ọ hẹrọte ihworho ri vwo ẹguọlọ kpahen urhomẹmro rhẹ oborẹ orhomurun. O jiri rie harẹn aye nẹ aye nẹ ẹga efian rhe, ihworho ivwo ẹguọlọ kpahen Osolobrugwẹ e wene akpọ-enyerẹn aye neneyo oma ọmerhen Osolobrugwẹ.—Se Revelation 18:4.
Uvuẹn ẹgbukpe uzusiorin ọrẹ ukaro, ọke rẹ ihworho ri vwo ẹhẹn esiri e rhon iyẹnrẹn esiri mie inyikọ na, aye ni kwerhọ ye rhẹ aghọghọ. Aye ne yono izede akpọ-enyerẹn ọkpokpọ mie i Jehova, akpọ ro vwo ifiẹrorhọ rhẹ otọre. Nime aye dede iyẹnrẹn esiri na ha, nẹ aye rhiẹ omamọ udje harẹn ọwan inyenana, nyoma aye a ha i Jehova rhẹ emru ukaro uvuẹn akpo-enyerẹn aye.—Se 1 Thessalonians 1:8, 9; 2:13.
Jehova odede ihworho re tiẹn ẹga efian, aye i rhe kwomakugbe ekrun era ga ye. Wu rha kerhọ use i Jehova, wu ne rhirhiẹ ugbehian yẹ, wu ne rhirhiẹ usun ekrun ihworho ra ga Osolobrugwẹ urhomẹmro na, wu ne jeghwai vwo arhọ ri bẹmẹdẹ.—Se Mark 10:29, 30; 2 Corinthians 6:17, 18.
4. Marhẹ Osolobrugwẹ ọnọ ha aghọghọ rẹn ituakpọ ephian?
Orhiẹn ebro ọ sa harẹn ẹga efian, ọrana iyẹnrẹn esiri. Ono ti ihworho re ha akpọ na ephian nẹ osehiẹn. Ẹga efian orho sun ohworho owuorowu vrẹ-ẹ. Ihworho ri ne nyerẹn uvuẹn akpọ ọrana, ine kwomakugbe ga Osolobrugwẹ urhomẹmro na.—Se Revelation 18:20, 21; 21:3, 4.
