UYONO 10
Marhẹ Wu Ne Ru Vwrurhe Ẹga Urhomẹmro Na?
1. Ẹga urhomẹmro owu ọvo yẹ ọ havwiẹ?
Nẹ oma so fọkiẹ emẹraro efian.’—MATTHEW 7:15.
Jesu o yono idibo yi kpahen ẹga owu ọvo, ẹga urhomẹmro na. Ọ ha riẹ dje izede ro sun ọwan riẹ arhọ ri bẹmẹdẹ. Jesu nọ tare: ‘Ihworho krẹn yẹ a guọlọ’ izede na mẹrẹn. (Matthew 7:14) Osolobrugwẹ o dede ogame rẹ a bọn kpahen Ẹmro urhomẹmro ọnẹyen na. Otu ra ga ẹga urhomẹmro na ephian, esegburhomẹmro owu-ọvo yẹ aye i vwori.—Se John 4:23, 24; 14:6; Ephesians 4:4, 5.
Ni Ividio na Osolobrugwẹ o Kwerhọ Aruẹ Ẹga Ephian?
2. Me yẹ i Jesu ọ ta kpahen Ilelikristi efian?
‘Aye dje oma phia taghene aye i rhe Osolobrugwẹ, ọrẹn aye tenriẹn nyoma irueru erẹ aye rhe.’—TITUS 1:16.
Jesu o ti rẹ ọwan erhọ taghene emẹraro efian ine biomu ukoko Ilelikristi ọrẹ urhomẹmro na. Aye ruẹ jerẹ Ilelikristi urhomẹmro na. Ituẹ ishọshi aye e ji se oma aye taghene aye Ilelikristi. Ọrẹn nyoma oborẹ aye eruẹ lele, wu na sabu vwrurhẹ aye. Izede ọgo? Ẹga urhomẹmro na ọvo ye wu na mẹrẹn Ilelikristi ri vwo omamọ iruẹmru.—Se Matthew 7:13-23.
3. Marhẹ wu ne ru sabu vwrurhe era ga ẹga urhomẹmro na?
Roro kpahen eka isiorin enana re wu na ha vwrurhe aye:
-
Otu ra ga ẹga urhomẹmro na a ha ọghọ rẹn i Baibol na ro rhiẹ Ẹmro Osolobrugwẹ. Aye a damoma aye ine ru lele iruemru-urhi Baibol na. Omaran na, ẹga urhomẹmro ọ vẹnẹ ẹga ri bọn iyono aye kpahen iroro ituakpọ. (Matthew 15:7-9) Otu ra ga ẹga urhomẹmro na, e ruẹ lele oborẹ aye e ghwoghwo.—Se John 17:17; 2 Timothy 3:16, 17.
-
Ilelikristi urhomẹmro a ha ọghọ harẹn odẹ Osolobrugwẹ, Jehova. Jesu ọ ha ọghọ rẹn odẹ Osolobrugwẹ nyoma ọye o dje yi phia. Ọ sa ihworho erhumu nẹ aye i rhe Osolobrugwẹ, ọ jeghwai yono aye nẹ aye nẹ ẹrhomo ne ruẹ odẹ Osolobrugwẹ fuanfon. (Matthew 6:9) Ekete we rhirhiẹ, ẹga ọgo yẹ o dje odẹ Osolobrugwẹ phia?—Se John 17:26; Romans 10:13, 14.
-
Ilelikristi urhomẹmro na eghwoghwo kpahen Uvie Osolobrugwẹ. Osolobrugwẹ o dje i Jesu rhe me ghwoghwo iyẹnrẹn esiri Uvie na. Uvie Osolobrugwẹ ọvo yẹ ifiẹrorhọ ituakpọ i vwori. Jesu o ghwoghwo iyẹnrẹn esiri na ye te ẹdẹ uhwu ọnẹyen. (Luke 4:43; 8:1; 23:42, 43) Ọye ọ tarẹ taghene idibo yi ine ji ghwoghwo kpahiẹn. Ohworho orho bro rhe mọ ta wẹn kpahen Uvie Osolobrugwẹ, ẹga ọgo yẹ wu ne roro taghene ọye ọ havwọ?—Se Matthew 24:14.
-
Idibo i Jesu a ha usun akpọ ọkon ọnana-a. Wu na sabu vwru rhe aye nyoma aye kẹnoma harẹn usun oseghe yanghene owọnren amwa. (John 17:16; 18:36) Habaye aye i vwa hẹrokele irueru rhẹ iruemru esọsọ-ọ.—Se James 4:4.
-
Ilelikristi urhomẹmro na e vwo ẹguọlọ okokodo kpahen owuowọnwan. Aye i yono nẹ uvuẹn Ẹmro Osolobrugwẹ kpahen oborẹ aye ena sabu ha ọghọ rẹn ihworho ephian. Dedewo ẹga ofian a ha obọ tua ivweri egbamwa na, ilelikristi urhomemro e tiẹn uruemru ọrana. (Micah 4:1-3) Omaran na, Ilelikristi a ha ọke aye ọrhẹ oborẹ aye i vwori ha userhumu rẹn awọrọ.—Se John 13:34, 35; 1 John 4:20.
4. Wu na sabu vwrurhe ẹga ọrẹ urhomẹmro na?
Ẹga ọgo yẹ ọ bọn iyono yi kpahen Ẹmro Osolobrugwẹ, ha ọghọ rẹn odẹ Osolobrugwẹ, jeghwai ghwoghwo taghene Uvie Osolobrugwẹ ọvo yẹ ifiẹrorhọ ituakpọ i vwori? Ihworho ego yẹ edje ẹguọlọ phia, e vwa je tiẹn uvweri? Me yẹ wu rorori?—Se 1 John 3:10-12.
