OBỌRẸ FOUR
Iborhin —“Ru Mẹ Fọ Nẹ Abọ Ọdandan Mẹ”
“Iruo ọkpokpọ mi vwori na nọ lẹrhẹ enyerẹn-akpọ uvwioghwa mẹ rhomu rhọ, ọrẹn nọ lẹrhe mẹ fiẹ oma rhẹ erharherẹ irueruo sansan. Ne mia riẹ orẹ ri vwe fo, tobọ vwobọ rhẹ irueruo usun oseghe, jeghwai riẹ ishọshi dede. Ne mi me rhirhiẹ Oseri Jehova furhiemu ẹgbukpe 40. Rẹ o jiribẹn, ne mi mo roro taghene Jehova ọrhọ harhomi mẹ ghwomara-an. Ne mi brorhiẹn kpe oma mẹ. Wu rha tobọ nieso, mi rhẹ urhomẹmro na hin mi ki nya sọ na.”—Martha.
IBORHIN ọ sabu rhirhiẹ ohwan rọ ghwọghọ ọwan oma. Orodje Devid ọrhọ ya, “Edandan mẹ e djọren mẹ botọre. Jerẹ ohwan ọghwaghwa, aye bẹren mẹ ẹkpare.” (Psalm 38:4) Ileli Kristi ezẹko ime mwomarhọ vrẹn ovwan, nime omwu aye ẹro taghene i Jehova ọnọ harhomu aye-e. (2 Corinthians 2:7) Orhiẹn ebro ọrana oserhọ? Wu rha tobọ ru ọdandan ọghwaghwa, ọrana o tiruo nẹ oborẹ i Jehova dibidibi, rẹ ọye ọnọ jọ sabu harhomuo? Ẹjo, orhiẹ omara-an!
“Jenẹ Akpọ Ẹmro Vi Omoma Owan”
Jehova ọvwọ sererhumu jẹ iruedandan re ghwẹriẹ re-e. Itiọrẹ urhomẹmro, o tiẹ kẹrẹ aye! Uvuẹn ido ọmọ ro rhiẹ osoghoro na, Jesu ọhẹ Jehova dje ọsẹ ro vwẹ ẹguọlọ, rẹ ọmọ yen ọnya jevwo ye nyerẹn orharhere akpọ. Ro jiri bẹn, ọmọ na nọ rharhumu rie. “Rẹ [ọmọ na] ọ je havwẹ ugbo oseseri, ọsẹ ye nọ kpararo mẹriẹn, ọrẹ arodọmẹ, nọ zorhẹ brie, nọ gbale riẹ jeghwai fiọnfiẹn oma.” (Luke 15:11-20) Wu guọlọ tikẹrẹ i Jehova, ọrẹn nu we roro taghene “wu je havwẹ ugbo oseseri” ha riẹn? Jerẹ ọsẹ rọ havwẹ ido i Jesu na, Jehova ovwẹ ẹhẹn arodọmẹ kpahuọn. Ovwẹ omwemẹ rẹ ọye ono deduo ha.
Ọrẹn, orho mwẹnro taghene edandan egbanhon vwan, yanghene ibun ghwẹ erẹ i Jehova ọnọ harhomu vwo-o? Biko roro kpahẹn use i Jehova ọnana, rọ havwẹ ọbe Isaiah 1:18: “‘Mọ ọke ọnana, neneyo akpọ ẹmro vi omoma ọwan,’ Jehova ọrhọ ta. ‘Edandan are erha tobọ họhọ oborọ kerẹn-ipe, ene ruẹ aye fo jerẹ isno.’” Omaran, ọrhọ tobọ rhiẹ edandan ri hohẹ erẹ ivwẹ ipe okwarha ro mwẹ ọwẹn ọfuanfo, ọbẹn harẹn Jehova rọ nọ haye rhomuo-o.
Jehova ọguọlọ nẹ ẹhẹn iborhin orho kpokpuo-o. Ne marhẹ omefuon ro nẹ eharhomu rhẹ omamẹ obrorhiẹn ẹhẹn rẹ Osolobrugwẹ ọ yẹ ọwan ono ru to obọ? Roro kpahẹn idjaghwẹ eva rẹ Orodje Devid ọ kpaare. Ọrukaro, nọ tare: “Mi na rhian orusọ mẹ rẹn Jehova.” (Psalm 32:5) Karorhọ, Jehova ọtobọ so ne taghene wu bru ọye nyoma ẹrhomo rhe, ne wu mọ “kpọ ẹmro vi” rhẹ ọye. Kwerhẹ use ọrana. Rhian edandan rẹn i Jehova, ne wu ta oborẹ ọ havwọ uvuẹn ẹhẹn ọnọ riẹn. Nyomẹ oborẹ i Devid orhiẹromẹrẹn, no mwurien fiẹ udu-gbere nẹrhomo ọnana: “Ru mẹ fo nẹ uvuẹn ogbegbon mẹ. . . . Ọmudu ro senu rọ je ghwọghọ, Ee Osolobrugwẹ wu tiẹ-ẹn.”—Psalm 51:2, 17.
Ọreva, Devid ọmẹrẹn urserhumu nẹ obẹ ohworho Osolobrugwẹ ọ hamwu rhe, ọmẹraro Nathan. (2 Samuel 12:13) Ẹdọke ọrẹ inyenana, Jehova ọ hẹ ekpako ukoko mwu re yonori, ne hẹ userhumu harẹn iruedandan re ghwẹriẹre nẹ aye kwaphiẹ ugbehian rẹ aye ehavwọ rhẹ i Jehova rhọ. Wu rhe bru ekpako na nya, aye ena hẹ eyaya ọbe Ọfuanfo na ọrhẹ ẹrhomo ro nẹ ẹhẹn rhe eruẹ ọmudu ọnọ serhọ, ono ruẹ ẹhẹn ọnọ pharhe yanghene ono tiẹ orharhere iroro nẹ uvuẹn ẹhẹn ọnọ, ọnọ je hẹ userhumu wẹn ha vwẹ oma ọkpokpọ ọrẹ ẹhẹn.—James 5:14-16.
Jehova ọguọlọre ne wu vwẹ obrorhiẹn ẹhẹn ro fiotọre
“Omamerhomẹ Ọ Havwiẹ Harẹn Ohworho Ra Kparẹ Iroro Vrẹn Orusọ Ye”
Ọrẹ urhomẹmro, wu na mẹriẹn rhiẹ emru obẹnbẹn omamọ wu na rhian ọdandan ọnọ harẹn i Jehova Osolobrugwẹ yanghene bru ekpako na nya. Devid oji vwẹ aro ebẹnbẹn itiẹ erana. Ọye nọ “fọdu” ibiesuọn kpahẹn edandan ye. (Psalm 32:3) Ọrẹn, ro ru, ọmẹrẹn erere omẹ edandan ye ọye ọrhianre, ọrhẹ oghwẹriẹme ọnẹyen.
Erere rọ mai do ọrana ọyẹ aghọghọ i Devid ọrharhumu vwo. Nọ yare: ‘Omamerhomẹ ọ havwiẹ harẹn ohworho ra kparẹ iroro vrẹn orusọ ye, ra hẹ ọdandan yen rhomu.’ (Psalm 32:1) Ọye nọ je nẹrhomo: “O Jehova, rhie evwẹrẹugbunu mẹ, nẹ unu mẹ ọ sabu ghwoghwo ujiri ọnọ.” (Psalm 51:15) Rẹ ẹhẹn iborhin o nie oma ne na ọrhẹ omamerhomẹ fọkiẹ ẹharhomu rẹ Osolobrugwẹ o yẹ riẹ na, Devid nọ tarẹn awọrọ kpahẹn i Jehova.
Jehova ọguọlọre ne wu vwẹ obrorhiẹn ẹhẹn ro fiotọre. Ọ jeghwai guọlọ taghene wu ta harẹn awọrọ kpahẹn ọye rhẹ egbemuo enẹyen, rhẹ ọrẹ wu ne rue rhẹ omemwurhọ-ọ, ọrẹn ọrẹ ẹhẹn esiri kugbẹ aghọghọ. (Psalm 65:1-4) Karorhọ use ọnẹyẹn na “rẹ ena phorho edandan ọnọ, neneyo omẹrhuọnrhuọn onẹ obẹ i Jehova rhe.”—Acts 3:19.
Ọrana oborẹ ọphiare harẹn Martha. Nọ tare: “Kọkekọke nọyẹ ọmọ mẹ ọhworhare ọ hẹ i Watchtower rhẹ Awake! vwe mẹ. Bibiesuọn bibiesuọn, ne me rharhumu mọ rieriẹn omamẹ rhẹ i Jehova. Ekete rọ mai gbanhon mẹ uvuẹn erharhumu rhe mẹ na, nẹ ọrẹ mi na nekpẹn eharhomu ọsoso edandan mi ru ne. Ifuenyi, ne mi nẹrhomo vwẹ Osolobrugwẹ nẹ ọ harhomi mẹ. Omwuru mẹ ẹro taghene ọsoso ẹgbukpe 40 ena nya vrẹn, me ke rharhumu bru i Jehova rhe-e. Oborọ phia mẹ odje rie phia taghene ohworho ọrhọ tobọ nya jẹ Osolobrugwẹ ẹga vwo ikpe buebun dede, ọnọ je sabu rharhumu rhe, mo rhirhiẹ uvuẹn ẹguọlọ ọnẹyen.”