Imizu eghoghanren:

Jerẹ oborẹ are rheri, Baibol na ọbe ro gbikun kpahẹn ihworho. Ehworhare rhẹ emẹse buebun ri vwẹ esegburhomẹmro, edẹrughwaro ghwu ebẹnbẹn rẹ ame jeghwai dẹrughwaro ghwu. Aye rhẹ ọwan “ehọhoma.” (James 5:17) Ezẹko usuẹn aye, ikpokpogho ọrhẹ ọfiamu ehiẹn ra ye. Ezẹko, ekrun aye rhẹ imizu ezẹko uvuẹn ukoko na ekparehaso aye. Buebun oborẹ aye i rusọ okpokpẹ aye ẹhẹn.

Ihworho erana ni nya jẹ i Jehova vwo phẹlẹphẹlẹ? Ẹjo. Buebun aye ehọhẹ ọbo ijoro na rọ nẹrhomo taghene: “Mi begheri jerẹ ogegede ro vruru. Guọlọ odibo ọnọ, nime irhi enọ a sẹremẹ ẹro-o.” (Psalm 119:176) Ẹmro enana i se kpahuọn?

Erẹ aga i Jehova ri begheri nẹ usuẹn igegede na evwa sẹriẹ ẹro-o. Ukpe rono rhiẹ omaran, oji brẹ aye nya—nyomẹ imizu ọye rhẹ aye agba ga kwẹgbe. Gbe roro kpahiẹn, jerẹ udje, oborẹ i Jehova ọsẹ i Job ro rhiẹ odibo yi erhumu, ro rhiẹromẹrẹn ikpekpogho buebun—jerẹ enyerẹn-akpọ ye re ghwọghọre, emọ yen ri hwuru, kugbe emiamo ọgbogbanhon ro mwurien. Job o diẹn erharhere ẹmro ri nẹ obẹ ihworho ra tobọ sa ye erhumu bri. Uvuen na ọsẹrerhumu jẹ i Jehova-a, dedevwo iroro yi e phiẹ riẹ rhọ uvwre ọke owu. (Job 1:22; 2:10) Marhẹ i Jehova ọsẹ i Job erhumu lele rẹ ọrharhumu mevi?

Izede owu rẹ i Jehova ọsẹ i Job erhumu ọrana ni nyomẹ odibo ro lelie ga re sẹ Ẹlaihu. Ọkerẹ i Job ọta kpahẹn edamẹ enẹyen, Ẹlaihu nọ kerhọ ye, ọrana no mwurien tẹmro. Nime ọye ọnọ ta? Ọnọ tẹmro ri gbọghan rẹn i Job gbinẹ ono djẹ iborhien hariẹn, nẹ ofa ọruẹ? Ẹlaihu onẹ omayen taghene ọye orhomu ghwẹ i Job? Ẹjo! Nyomẹ ẹhẹn ọfuanfo Osolobrugwẹ, Ẹlaihu nọ tare: “Mẹmẹ rhẹ owẹwẹ owu obaro Osolobrugwẹ urhomẹmro na; eyẹn ọyẹ aje ha ma mẹ.” Nẹ ọyẹ i Job imwẹnro: “Wu vwa zofẹn mẹ-ẹ, mi kpokpo ẹhẹ-ẹn.” (Job 33:6, 7) Ukpe rọnọ ha bẹ ebẹnbẹn i Job, Ẹlaihu nọ hẹ udu ọrhẹ urhebro rẹ i Job ọguọlọre ha riẹn.

Biko mẹriẹn vwrurhe taghene aruẹ ẹhẹn ọrana ọyẹ ame emuegbe i broshọ ọnana. Ukukaro, ame kerhọ, jeghwai jomarhotọre roro kpahẹn erhirhiẹ sansan ọrhẹ ẹmro ihworho ri tiriẹ erhumu e tare. (Proverbs 18:13) Ame nẹ ọbe Ọfuanfo na so, nẹ ame je nẹrhomo dabu roro kpahẹn oborẹ i Jehova ọsẹ idibo yi erhumu lele re ha erhirhiẹ itiomaran ọke ahwanren. Obẹtaye, iyẹnrẹn erana re ha uvuẹn ọbe Ọfuanfo na ọrhẹ oborẹ ọphiare ọke ọnana ọyẹ ame i kukugbe ha ruẹ i broshọ ọnana. Ame dabu jirie harẹn are nẹ are se ọbe ọnana. Biko are rhe taghene ame vwẹ omamẹ ẹguọlọ kpahẹn are.

Ugboma Usuon Iseri Jehova