Wu na sabu mẹrẹn oma rhẹ aruẹ erhirhiẹ ọrẹ Linda, orhiọrẹ oborẹ omizu orurie ote rie ẹhẹn? Orhiẹ emru omemwurhọ taghene ezẹko e lẹrhẹ oborẹ imizu i ru raye hẹ ẹkuọn harẹn aye ọrẹ ẹhẹn. Ọrana ọje phia wẹn dẹ ne?

Urhomẹmro, ame amẹriẹn rhiẹ emru obẹnbẹn rẹ ana harhomu omizu rọ ha uvuẹn ukoko na ro ru rame sọ. Wu rhe nieso, Ileli Kristi aye ọwan ivwẹ ẹguọlọ kpahẹn ọwan. (John 13:34, 35) Omizu orho ruẹ ame sọ, ọphiẹrhọ rhẹ omiamiamo rọ ha sa ọgbanhan omamọ.—Psalm 55:12.

Okemru owuọvo, Baibol na ọ tariẹ taghene ọkezẹko Ileli Kristi aye ọwan a sabu ruẹ ọwan oborẹ ọnọ “suẹ unuebro.” (Colossians 3:13) Dedevwo, ọrana ọrhọ phia rọwan, ọbẹn rẹ ame asabu fie kparobọ. Ovwẹ oborẹ ọnọ sabu sẹ ọwan erhumu? Gbe roro kpahẹn iruemru irhi esa enana re ha uvuẹn ọbe Ọfuanfon na:

Ọsẹ ọwan obẹ odjuwu o rhe kpahẹn kemrukemru. Kemrukemru rọ phia i Jehova ọ mẹrẹn aye, omaran ji te osehiẹn rhẹ oja rẹ ọrhua sa. (Hebrews 4:13) Jehova ororo harẹn ame ọkerẹ ame ariẹ oja. (Isaiah 63:9) O vwo kwe taghene “ukpokpogho, okpetu” yan nẹ emru ọrọrọ—tobọ odibo yi ọrọrọ dede—“nọ hẹriẹ ọwan nẹ ẹguọlọ Osolobrugwẹ ovwo kpahẹn ọwa-an.” (Romans 8:35, 38, 39) Ofo nẹ ame e hẹrokelie, nẹ eje rhe kwe nẹ ohworho owuorowu yanghene emru owuorowu ofiẹ ohẹriẹ rhẹ erhẹrhẹ ame rhẹ i Jehova?

Ẹharhomu omevirhẹ ekwerhọ-ọ. Arha harhomu erẹ iru rọwan biomu, avwa haye djẹ orusọ na rhẹ emru ọkokamo-o, yanghene ne bru ase harẹn aye-e, yanghene chochọn aye-e. Karorhọ, Jehova ovwo kwerhẹ ọdanda-an, ọrẹn ọ harhomu ọwan orho vwo oborọ soriẹ. (Psalm 103:12, 13; Habakkuk 1:13) Ọkerẹ ọye ọhẹ urhebro harẹn ọwan nẹ a harhomu ereva, Jehova ọ haye tarẹn ọwan nẹ a hẹrokelie. Ovwo “biomẹ evwan bẹmẹdẹ-ẹ.”—Psalm 103:9; Matthew 6:14.

Ọwan irhe tiẹ evwan-ebiomu nẹ ẹhẹn, ọnọ yẹ ọwan erere. Izede ọgo? Roro kpahẹn udje ọnana. Agba haye taghene wu mọrẹn ibiẹ atita rọ vwọ ghwa rhẹ obọ, ne wu riẹn obọ na ibibiesuọn. Ọvwọ samọ bọn ogege ra-an. Ọrẹn wu rha riẹn obọ na jiri vwan, ne marhẹ ono rhirhiẹ? Emua ọke wu na sabu zirien—iminiti ezẹko? unọke owu? gbinẹ ono jiri ghwẹ omaran? Ovwẹ ẹfro, obọ na ọnọ rhọ omamọ! Jerẹ oborẹ ọhavwọ, atita na rhẹ ọnọ ghwa ghwẹ oborẹ ọghwa te vẹrhẹ-ẹ. Ọrẹn wu rha mọriẹn jiri, nọ samọ ghwa rhọ uvuẹn obọ. Omaran ọyẹ evwan-ebiomu ọhavwọ. Orho jiri vwan uvuẹn ẹhẹn ame—ọrhọ tobọ kamo dede—ọ sabu suẹ ọkpẹ ẹkuọn harẹn ọwan. Ọyọrọ soriẹ i Jehova ọ ta taghene  etiẹ evwan-ebiomu nẹ ẹhẹn. Itiọrẹ urhomẹmro arha kpare iroro vrẹn evwan-ebiomu emru erhumu harẹn ọwan.—Proverbs 11:17.

Me ọ sẹ Linda erhumu rọ vwọ wọ evwan-ebiomu rhẹ ẹhẹn fọkiẹ oborẹ omizu owu orurie? Usuẹn ekwakwa rẹ ọye o ruru, ororo kpahẹn oborẹ i ọbe Ọfuanfo ọtare kpahẹn ẹharhomu. (Psalm 130:3, 4) Linda ọkparẹ iroro vrẹn, nime orheri taghene ame erha harhomu awọrọ i Jehova nọ rhọ harhomu ame. (Ephesians 4:32–5:2) Ha kpahẹn oborẹ ọhọ ẹmro enana e sa riẹ erhumu lele, nọ tare: “Nẹ ọhọhọre taghene ukperhumu i Jehova nọ tẹmro ha mẹ.”

Ro jiri bẹn, Linda nọ sabu tiẹ evwan-ebiomu nẹ ẹhẹn. Nọ harhomu omizu ọmase na, ekete ọke ọhavwọ na, omizu ọrana nẹ ugbehian yen omamọ. Linda ọdabu ga i Jehova sasasa riẹ obaro. Je nẹ mwẹnro taghene Jehova ọguọlọre nẹ orhirhiẹ omaran ha wẹn.