UYONO 01

Marhẹ i Baibol Na Ono Ru Ruẹ Akpenyerẹn Ọnọ Rhomurhọ?

KPORIE

Ọwan ephian a nọ enọ kpahen akpenyerẹn, ojẹriọ, uhwu, ọrhẹ obaro na. A ji guọlọ userhumu ne rhe oborẹ ene ru mẹrẹn igho ra na hẹrote oma ọwan, ọrhẹ oborẹ ekrun ọwan ono ru vwo omamerhomẹ. Orhiẹ ẹkpahenrhọ eghoghanren ọvo yi Baibol na o tiobọnẹ rẹn ọwa-an, ọrẹn, o ji tiobọnẹ urhebro ra na sabu ha nyerakpọ. Wu rorori taghene ana sabu mẹrẹn erere ni Baibol na?

1. Enọ ego yi Baibol na ọ kpahenrhọ?

Baibol na ọ kpahenrhọ enọ eghoghanren enana: Marhẹ arhọ o ru tonrhọ? Mesoriẹ e nyerẹn? Mesoriẹ ihworho a rioja? Me yọ phia ohworho orho hwu? Orhianẹ ọwan ephian i guọlọ ufuoma, mesoriẹ akpọ na ọ vuọn rhẹ uvweri? Me yọ nọ phia rẹn otọrakpọ na obaro na? Baibol na o jiririe rẹn ọwan na guọlọ ẹkpahenrhọ enana, iduduru ihworho i mẹrẹn obọdẹn ẹkpahenrhọ rẹn enọ erana ne.

2. Marhẹ i Baibol na ono ru ha userhumu rẹn ọwan riamerhen akpenyerẹn ọwan kẹdẹkẹdẹ?

Baibol na o tiobọnu obọdẹn urhebro rẹn ọwan. Jerẹ udje, o yono ekrun oborẹ aye ine ru vwo obọdẹn omamerhomẹ. Ọ ta rẹn ọwan oborẹ ene ruo, oma ọrhọ ghwọghọ ọwan, ọrhẹ oborẹ ene ru riamerhen owian ọwan. Wu ne yono oborẹ i Baibol na ọ ta kpahen irhomu-ẹmro enana, ọrhẹ erọrọ ọke re yono ọbe ọnana kugbe. Wu ne vwo imwẹro na taghene, “Eyaya Ọfuanfon na ephian [nọyẹ kemru kemru rọ ha uvuẹn i Baibol na] emru . . . erere.”—2 Timothy 3:16.

A ha ọbe ọnana wene i Baibol na-a. Ukpomaran, ọnọ ha userhumu wẹn yono i Baibol na harẹn omobọ ọnọ. Omarana, ame i jiririe wẹn ne wu se ekete i Baibol ra rionbọrhọ uvuẹn iyono na, ji ha aye vwanvwọn oborẹ we yono na.

YONO KODO RHỌ

Roro kpahen oborẹ i Baibol na o ru ha userhumu rẹn ihworho ne, oborẹ wu ne ru sabu mẹrẹn erere we rhe se yi, ọrhẹ oborẹ ọsoriẹ o fo wu guọlọ userhumu ne wu sabu vwẹruọ ye.

3. Baibol na ọnọ sabu kpọ ọwan vi

Baibol na ọ họhọ ukpẹ rọ dabu lo. Baibol na ọnọ sabu ha userhumu rẹn ọwan brorhiẹn ẹghwanren, ọnọ ji ha userhumu rẹn ọwan rhe oborẹ ọnọ phia obaro na.

Se Psalm 119:105, orho ru, are i gba kpahenrhọ enọ enana:

Ukẹro ọgo yẹ ọbo ijoro rọ ya ekete ọnana ọ ha ni Baibol na?
Ukẹro ọgo wa ha ni Baibol na?

4. Baibol na ọnọ sabu kpahenrhọ enọ ọwan

Baibol na ọ kpahenrhọ enọ eghoghanren rẹ ọmase owu o roro kpahan ẹgbukpe buebun ne. Kporo IVIDIO na, orho ru, are i gba kpahenrhọ enọ enana.

IVIDIO: Sẹrorẹ Ifiẹrorhọ Ọnọ! (1:48)

Uvuẹn ividio na, enọ ego yẹ ọmase na o roro kpahen?
Marhẹ uyono i Baibol na o ru ha userhumu riẹn?

Baibol na o jiririe rẹn ọwan na rha nọ enọ. Se Matthew 7:7, orho ru, are i gba kpahenrhọ onọ ọnana:

Enọ ego ye kpokpuo ẹhẹn ri Baibol na ọnọ sabu kpahenrhọ?

5. Wu na sabu riamerhen isese i Baibol na

Ihworho buebun a riamerhen isese i Baibol na, aye a ji mẹrẹn erere nẹ uvuien sa. Kporo IVIDIO na, orho ru, are i gba kpahenrhọ enọ enana.

IVIDIO: Isese i Baibol (2:05)

Uvuẹn ividio na, ukẹro ọgo yẹ iphuphẹn na, a ha ni isese?
Dedevwo aye i vwa riamerhen isese-e, mesoriẹ aye a riamerhen isese i Baibol na?

Baibol na ọ tare taghene, ọnọ yẹ ọwan ọkpọvi rọ nọ lẹrhẹ ọwan vwo omefuon ọrhẹ ifiẹrorhọ. Se Romans 15:4, orho ru, are i gba kpahenrhọ onọ ọnana:

Ive i Baibol na kpahen omefuon ọrhẹ ifiẹrorhọ, ọ merhuọn oma?

6. Awọrọ ina sabu ha userhumu rẹn ọwan vwẹruọ oborẹ ọ ha uvuẹn i Baibol na

Haba ọrẹ ọwan ọvo ine se i Baibol na, ihworho buebun i mẹrenriẹn vwrurhe taghene a mẹrẹn erere erhe lele awọrọ yonie kugbe. Se Acts 8:26-31, orho ru, are i gba kpahenrhọ onọ ọnana.

Marhẹ ọwan ine ru vwẹruọ oborẹ ọ ha uvuẹn i Baibol na? —Se eghwẹmro 30 ọrhẹ 31.

Ọhworhare onyẹ Ethiopia na ọ guọlọ userhumu nọ sabu vwẹruọ Eyaya Ọfuanfon na. Ihworho buebun a mẹrẹn erere, ohworho orho lele aye yono i Baibol na kugbe

OBORẸ IHWORHO EZẸKO A TA: “We kpe ọke ọnọ fughwẹ we rhe yono i Baibol na.”