UYONO 07

Marhẹ i Jehova ọ Havwọ?

KPORIE

We rhe roro kpahen i Jehova Osolobrugwẹ, me wa karorhọ? We nie taghene o vwo omẹgbanhon omamọ, o ji serabọ wẹn, jerẹ oborẹ akpọ na o serabọ nẹ ọren na? Gbinẹ we nie taghene o vwo omẹgbanhon omamọ jerẹ agbranran, omarana a sabu tiẹ kẹriẹ-ẹ? Marhẹ i Jehova ọ ghini havwọ? Nyoma Ẹmro ọnẹyen ro rhiẹ i Baibol na, Jehova no dje iruemru enẹyen phia rẹn ọwan, ọ jeghwai djephia taghene o vwo ọdamẹ kpahen ọwan ephian.

1. Mesoriẹ a vwa sabu mẹrẹn Osolobrugwẹ?

“Osolobrugwẹ ohworho ẹhẹn.” (John 4:24) Jehova o vwo ugboma jerẹ ọwa-an. Ọye ohworho ra vwa mẹrẹn, ro rhirhiẹ odjuwu, ro rhiẹ ekete ra vwa mẹrẹn.

2. Ego yẹ usuẹn iruemru i Jehova o vwori?

Dedevwo a vwa mẹrẹn i Jehova-a, ọrẹn, ọwan i rhe rhe aruẹ Ohworho rọ havwọ, ne ne vwo ẹguọlọ kpahiẹn, fọkime ọye o vwo iruemru ra lẹrhẹ ọwan tiẹ kẹriẹ. Baibol na ọrhọ ta: “Jehova o vwo ẹguọlọ kpahen orhienbro ọsoso, ọ vwọ samọ nyajẹ ihworho enẹyen ri vwo atamwu vwo-o.” (Psalm 37:28) Ọye o ji “dje ẹguọlọ okokodo ọrhẹ arodọmẹ phia,” maido kpahen ihworho ra rioja. (James 5:11) “Jehova ọ kẹrẹ ihworho rẹ ẹhẹn aye o seriotọre; o simi ihworho rẹ ẹhẹn aye ọ ghwọghọre.” (Psalm 34:18) Wu rheri taghene orhienbro ọnọ, ọnọ sabu lẹrhẹ evwan merhen i Jehova yanghene lẹrhiẹ mwuomarhọ? Ohworho rọ djẹ odjẹ ro no ruẹ oborẹ obiomurun, ọ vwọ lẹrhẹ oma merhiẹ-ẹn. (Psalm 78:40, 41) Ọrẹn, ohworho ro ruẹ oborẹ orhomurun, ọ lẹrhẹ oma merhiẹn ọke ephian.—Se Proverbs 27:11.

3. Marhẹ i Jehova o ru djephia taghene o vwo ẹguọlọ kpahen ọwan?

Uruemru i Jehova rọ mai ghanren yẹ ẹguọlọ. Itiọrurhomẹmro, “Osolobrugwẹ yẹ ẹguọlọ.” (1 John 4:8) Orhiẹ nyoma i Baibol na ọvo yi Jehova o dje ẹguọlọ ye rẹn ọwa-an, ọrẹn, o ji dje yi phia nyoma ekwakwa rọ maren. (Se Acts 14:17.) Gbe roro kpahen oborẹ ọ marẹn ọwan lele. Ọ yẹrẹ ọwan omẹgbanhon ra na mẹrẹn ikọlọ irhorhomu, rhon ikpekporo ra merhoma, jeghwai riamerhen emaren imemerhen. Ọ guọlọre nẹ ọwan i riamerhen akpenyerẹn.

YONO KODO RHỌ

Yono kpahen oborẹ i Jehova ọ ha ru ekwakwa igbevwunu enana. Orho ru, gbe yono kpahen oborẹ i Jehova o ru dje obọdẹn iruemru enẹyen rẹn ọwan.

4. Ẹhẹn ọfuanfon yẹ omẹgbanhon Osolobrugwẹ ọ ha wian owian

Jerẹ oborẹ ọwan a ha abọ ọwan wian owian, omaran i Jehova ọ ji ha ẹhẹn ọfuanfon ọnẹyen wian. Baibol na o djephia taghene ẹhẹn ọfuanfon na, orhiẹ ohworho-o, ọrẹn, omẹgbanhon Osolobrugwẹ ọ ha wian owian. Se Luke 11:13 ọrhẹ Acts 2:17, orho ru, are i gba kpahenrhọ enọ enana:

Osolobrugwẹ ono ‘tiobọnu’ ẹhẹn ọfuanfon ọnẹyen rẹn ihworho ri nekpẹn yen. Omarana, wu rorori taghene ẹhẹn ọfuanfon na ohworho, gbinẹ omẹgbanhon Osolobrugwẹ ọ ha wian? Mesoriẹ we rorie omaran?

Jehova ọ nyoma ẹhẹn ọfuanfon ọnẹyen ruẹ ekwakwa igbevwunu. Se Psalm 33:6 ọrhẹ 2 Peter 1:20, 21, orho ru, are i gba kpahenrhọ onọ ọnana:

Izede ego yi Jehova ọ ha ẹhẹn ọfuanfon ọnẹyen ruiruo ne?

5. Jehova o vwo iruemru irhorhomu

Moses ọ fuevwan ga Osolobrugwẹ, ọrẹn, ọ ji guọlọ rhe ọrọ Ma riẹn fiotọre. Omarana, Moses nọ ta riẹn: “Ji mẹ rhe izede enọ, neneyo mi sabu rho.” (Exodus 33:13) Ọrẹ ẹkpahenrhọ, Jehova no dje aruẹ ohworho rọ havwọ rẹn i Moses. Se Exodus 34:4-6, orho ru, are i gba kpahenrhọ enọ enana:

Iruemru i Jehova ego yo djephia rẹn i Moses?
Ọgo usuẹn iruemru i Jehova yọ mai jo?

6. Jehova ọ hẹrote ihworho

Ihworho Osolobrugwẹ, nọyẹ itu Hebrew, evrẹn uvuẹn i Egypt.Marhẹ oma o ruẹ i Jehova ọke rọ mẹrẹn ihworho yi ra rioja? Kporo IKPEKPORO na jeghwai nyalelie, yanghene se Exodus 3:1-10. Orho ru, are i gba kpahenrhọ enọ enana.

IKPEKPORO: Jehova ọ Hẹrote Ihworho yi Ọke Aye a Rioja (2:45)

Me yẹ iyẹnrẹn ọnana o yoniruon kpahen oborẹ oma o ruẹ i Jehova kpahen ojẹriọ ituakpọ?—Se eghwẹmro ọrẹ 7 ọrhẹ 8.
Wu rorori taghene i Jehova ọ ghini guọlọ ha userhumu rẹn ituakpọ, o ji mwuo ẹro taghene o vwo omẹgbanhon ro no ruie? Me wu rorori? Mesoriẹ?