UYONO 06
Marhẹ Arhọ o Ru Tonrhọ?
“Wẹwẹ [nọyẹ Osolobrugwẹ] yẹ esiri arhọ.” (Psalm 36:9) Ọrana o mwuruon ẹro? Ihworho ezẹko e roro taghene o vwo Ọmemama-a, aye e roro taghene ekwakwa i kpare varhe. Orho rhiomaran, nọyẹ e nyerẹn fọkiẹ ekwakwa ri ghwai homaphia. Ọrẹn, orho rhiẹ i Jehova yọ ma arhọ, nọyẹ o vwo oborẹ ọsoriẹ ọ ma yen, rhomaran? a Jene roro kpahen oborẹ i Baibol na ọ ta kpahen oborẹ arhọ ọ tonrhọ lele, ọrhẹ oborẹ ọsoriẹ o fo ne vwo imwẹro kpahiẹn.
1. Marhẹ otọrakpọ na ọrhẹ idjuwu na i tonrhọ lele?
Baibol na ọrhọ ta: “Uvuẹn ọtonrhọ, Osolobrugwẹ nọ ma idjuwu ọrhẹ otọrakpọ na.” (Genesis 1:1) Ihworho buebun re yono kpahen isayẹnsi, i vwo imwẹro na taghene otọrakpọ na ọrhẹ idjuwu na i vwo ọtonrhọ. Marhẹ Osolobrugwẹ o ru ma aye? Ọ nyoma “omẹgbanhon” ọnẹyen ma ekwakwa ephian ri ha uvuẹn idjuwu na, nọyẹ igalazi, ikereti ọrhẹ iplanẹti sansan.—Genesis 1:2.
2. Mesoriẹ Osolobrugwẹ ọ ma otọrakpọ na?
Jehova “ọ ma [otọrakpọ na] fughwẹ-ẹ, ọrẹn, ọ ma riẹn ne rhirhiẹ ye.” (Isaiah 45:18) Ọ ma otọrakpọ na, nọ dabu serhọ rẹn ọwan, o ji ruie ne vwo i kemru kemru ra guọlọre na sabu nyerien bẹmẹdẹ. (Se Isaiah 40:28; 42:5.) Ere yono kpahen isayẹnsi i tare taghene otọrakpọ na ọ vẹnẹ iplanẹti erọrọ. Otọrakpọ na ọvo ye rheri taghene ọnọ sabu sẹrorẹ arhọ.
3. Me yọ lẹrhẹ ituakpọ vẹnẹ eranmo?
Ọke i Jehova ọ ma otọrakpọ na hin, nọ ma ekwakwa re nyerẹn rhọye. Ewawọ ọrhẹ eranmo, yẹ oborẹ ọ kiki ma rhọye. Ọke o ru, “Osolobrugwẹ nọ ma onyakpọ uvuẹn ohọhọme ọnẹyen.” (Se Genesis 1:27.) Me yọ lẹrhẹ ituakpọ vẹnẹ? Ra mẹriẹn taghene Osolobrugwẹ ọ ma rẹn ọwan uvuẹn ohọhọme ọnẹyen, ọwan ne dje iruemru enẹyen phia jerẹ ẹguọlọ ọrhẹ orhienbro ọsoso. Ọ ji ma ọwan rhẹ omẹgbanhon re ne yono edjadjẹ, vwo ẹguọlọ kpahen ekwakwa irhorhomu, jeghwai riamerhen ikpekporo. Habaye, ọwan i vẹnẹ eranmo nime a sabu ha ẹga rẹn Ọmemama ọwan.
YONO KODO RHỌ
Roro kpahen oborẹ o djerie phia taghene a ma arhọ, ọrhẹ oborẹ ọsoriẹ ene kwerhọ iyẹnrẹn i Baibol na kpahen emama taghene urhomẹmro. Yono kpahen oborẹ iruemru ituakpọ o yono ọwan kpahen Osolobrugwẹ.
4. A ma arhọ
E jiri ituakpọ fọkiẹ oborẹ aye i ru phia rẹ aye a hẹrokele oborẹ Osolobrugwẹ ọ maren. Omarana, ọrọmo yo fori ne vi jiri fọkiẹ emama enana? Kporo IVIDIO na, orho ru, are i gba kpahenrhọ onọ ọnana.
-
Me yẹ ewena i ru phia ne, rẹ aye a hẹrokele oborẹ Osolobrugwẹ ọ maren?
Ohworho yọ bọn koghwa koghwa. Ọrẹn, ọrọmo yọ ma i kemru kemru ri ha uvuẹn otọrakpọ na? Se Hebrews 3:4, orho ru, are i gba kpahenrhọ enọ enana:
-
Ekwakwa ego usuẹn emama ya merhuọn oma?
-
O dje ọhọ phia erhe vwo imwẹro na taghene ohworho yọ ma idjuwu na, otọrakpọ na ọrhẹ i kemru kemru? Mesoriẹ o mwẹro?
Wu rheri?
Wu na sabu mẹrẹn irhomu-ẹmro ọrhẹ ividio ri sekpahen urhomu-ẹmro ọnana ri ha uvuẹn i jw.org uvuẹn oghọn na, “A Ma Riẹn?”
“Itiọrurhomẹmro, ohworho yọ bọn koghwa koghwa, ọrẹn, ohworho rọ ma i kemru kemru yẹ Osolobrugwẹ”
5. Oborẹ ọsoriẹ o fo ne vwo imwẹro kpahen iyẹnrẹn i Baibol na kpahen emama
Uvuẹn i Genesis urhomu-ẹmro ọrẹ 1, Baibol na o dje kpahen ọtonrhọ otọrakpọ na ọrhẹ i kemru kemru re nyerẹn uvuien. Wu na sabu hẹroso iyẹnrẹn na, gbinẹ we rorie taghene iyẹnrẹn efian? Kporo IVIDIO na, orho ru, are i gba kpahenrhọ enọ enana.
-
Baibol na o yonorin taghene a ma otọrakpọ na ọrhẹ ekwakwa re nyerẹn vwọye ẹdẹ erhan ri vwo inọke 24 uvuẹn ẹdẹ na owuowu?
-
Wu rorori taghene ana sabu kwerhọ iyẹnrẹn i Baibol na kpahen emama? Me wu rorori? Mesoriẹ?
Se Genesis 1:1, orho ru, are i gba kpahenrhọ onọ ọnana:
-
Ere yono kpahen isayẹnsi i tare taghene odjuwu na ọrhẹ otọrakpọ na i vwo ọtonrhọ. Marhẹ wu ne ru ha oborẹ aye i tare na vwanvwọn oborẹ wu seri uvuẹn i Baibol na?
Ihworho ezẹko e roro sẹ Osolobrugwẹ ọ ma arhọ nyoma ekwakwa ri varhe. Se Genesis 1:21, 25, 27, orho ru, are i gba kpahenrhọ enọ enana:
-
Baibol na o yonorin taghene Osolobrugwẹ ọ ma emru owu, ọke o ru, nọ dẹrẹrhiẹ erhenrin, eranmo ọrhẹ ituakpọ? Gbinẹ ọye yọ ma i “kemru kemru” ri vwo arhọ? b
6. Ituakpọ emama oghẹnrensan rẹ Osolobrugwẹ ọ maren
Ọwan i vẹnẹ eranmo ri Jehova ọ maren. Se Genesis 1:26, orho ru, are i gba kpahenrhọ onọ ọnana:
-
Fọkime Osolobrugwẹ ọ maren ọwan uvuẹn ohọhọme ọnẹyen, re vwo iruemru jerẹ ẹguọlọ ọrhẹ arodọmẹ, me yẹ ọnana o yonorin ọwan kpahen Osolobrugwẹ?
OBORẸ IHWORHO EZẸKO A TA: “Ikuegbe i Baibol kpahen emama, osia.”
-
Me wu rorori? Mesoriẹ?
ME WU YONORIN?
Jehova yọ ma idjuwu na ọrhẹ otọrakpọ na, kugbe i kemru kemru re nyerẹn.
Ẹzẹkoko
-
Me yi Baibol na o yonorin kpahen ọtonrhọ odjuwu na ọrhẹ otọrakpọ na?
-
Osolobrugwẹ ọ lẹrhẹ ekwakwa sansan varhe nyoma emru owu, gbinẹ ọ marẹn aye ephian?
-
Me yọ lẹrhẹ ituakpọ vẹnẹ omamọ?
GUỌLỌ IYẸNRẸN ERỌRỌ
Guọlọ iyẹnrẹn ri djephia taghene o vwo Ọmemama.
Ni oborẹ ọsẹ owu o ru dje iyẹnrẹn i Baibol kpahen emama rẹn ọmọyen ọhworhare.
Yono sẹ uyono ekwakwa ri kpare varhe o serhọ rhẹ oborẹ i Baibol na ọ tare.
“Nyoma Ekwakwa ri Varhe yẹ Osolobrugwẹ ọ ma Ekwakwa re Nyerẹn?” (Urhomu-ẹmro rọ ha uvuẹn itanẹti)
Se kpahen oborẹ iyẹnrẹn esuaso ahwanren ọrhẹ ekwakwa itu isayẹnsi i yono kpahen, o ru djephia sẹ a ma ekwakwa re nyerẹn, yanghene aye i ghwai homaphia.
Oborẹ Arhọ ọ Tonrhọ Lele—Enọ Isionrin ra na Sabu nọ (ibroshọ)
