UYONO 16

Me yi Jesu o Ruru ọke rọ ha Uvuẹn Otọrakpọ na?

KPORIE

Ihworho buebun e roro taghene i Jesu ọmọboban, ọmẹraro ro vwo ẹghwanren, yanghene ọhworhare ro hwuẹ. Ọrẹn, me ya na ji sabu yono nẹ oborẹ o nyerakpọ lele ọke rọ ha uvuẹn otọrakpọ na? Uvuẹn uyono ọnana, ene yono kpahen ezẹko usuẹn ekwakwa eghoghanren ri Jesu o ruru, ọrhẹ oborẹ wu ne ru mẹrẹn erere nẹ aye.

1. Me yẹ owian i Jesu rọ mai ghanren?

Owian i Jesu rọ mai ghanren yẹ ọrẹ ono “ghwoghwo iyẹnrẹn esiri Uvie Osolobrugwẹ.” (Se Luke 4:43.) O ghwoghwo iyẹnrẹn esiri taghene Osolobrugwẹ ọnọ ha Uvie yanghene igọmẹti mwu, ro no ti ebẹnbẹn ituakpọ ephian nie. a Jesu ọ ha ẹgbukpe esa gbuphrophro wian gbangbanhon, rọ ta rẹn awọrọ kpahen iyẹnrẹn ọnana.—Matthew 9:35.

2. Mesoriẹ i Jesu o ru igbevwunu?

Baibol na o dje kpahen buebun usuẹn “ewian igbevwunu, ọrhẹ eka rẹ Osolobrugwẹ ọ haphia nyoma [i Jesu].” (Acts 2:22) Osolobrugwẹ ọ yi Jesu omẹgbanhon rọ sabu sun aruọke, ghẹrẹ ihworho ri vrẹn uriusionrin, simi ere kpomẹ, jeghwai rhọmọ eri hwuru rhiẹ akpọ. (Matthew 8:23-27; 14:15-21; Mark 6:56; Luke 7:11-17) Igbevwunu sansan ri Jesu o ruru, i dabu djephia taghene Osolobrugwẹ yo dje rie rhe. O ji djephia taghene i Jehova o vwo omẹgbanhon ro no fiobarhọ ebẹnbẹn ọwan ephian.

3. Me yẹ ọwan ina sabu yono nẹ akpenyerẹn i Jesu?

Jesu ọ huvwele i Jehova ọke ephian. (Se John 8:29.) Udabọ ẹkparehaso, Jesu ọ fuevwan ru oborẹ Ọsẹ ye ọ ta riẹn ephian, tobọ te ọke o ki hwu. Ọye o djephia taghene ituakpọ ina sabu ga Osolobrugwẹ, aye i rha dẹrughwaroghwu ebẹnbẹn egbogbanhon dede. Omarana, Jesu o dje “udje neneyo [ọwan] i ha kpahen idjaghwẹ ye kpẹnkpẹnkpẹn.”—1 Peter 2:21.

YONO KODO RHỌ

Yono kpahen oborẹ i Jesu o ru ghwoghwo iyẹnrẹn esiri na, jeghwai ru igbevwunu sansan.

4. Jesu o ghwoghwo iyẹnrẹn esiri

Jesu ọ nya ugbo oseseri omamọ uvuẹn izede ri vuọnren rhẹ oghwurhie, ro ghwoghwo iyẹnrẹn esiri na rẹn ihworho uvuẹn ekete rọ mẹrẹn aye ephian. Se Luke 8:1, orho ru, are i gba kpahenrhọ enọ enana:

Jesu o ghwoghwo rẹn ihworho ri kokori, ri guọlọ kerhọ ye ọvo?
Omẹdamu ọgo yi Jesu o djephia nọ sabu ghwoghwo rẹn ihworho?

Osolobrugwẹ ọ mẹraro taghene i Messiah na ono ghwoghwo iyẹnrẹn esiri. Se Isaiah 61:1, 2, orho ru, are i gba kpahenrhọ enọ enana:

Marhẹ i Jesu o ru ha aruẹmẹrẹn ọnana te orugba?
Wu rorori taghene o fori nẹ ihworho i rhon kpahen iyẹnrẹn esiri ọnana?

5. Jesu o yono ihworho iyono eghoghanren

Haba ọrẹ i Jesu o ghwoghwo iyẹnrẹn esiri Uvie Osolobrugwẹ, o ji yono ihworho iyono eghoghanren rẹ aye ina sabu ha ruiruo. Yono kpahen idje ezẹko rọ haphia uvuẹn Ẹmro rọ Tare Oberun Ugbenu. Se Matthew 6:14, 34 ọrhẹ 7:12, orho ru, are i gba kpahenrhọ enọ enana:

Urhebro ọgo yi Jesu ọ haphia uvuẹn eghwẹmro enana ra na sabu ha ruiruo?
Wu rorori taghene ana ji sabu ha urhebro ọnana ruiruo uvuẹn ọke ọwan na?

6. Jesu o ru igbevwunu sansan

Jehova yọ yi Jesu omẹgbanhon rọ sabu ru igbevwunu buebun. Ne wu sabu mẹrẹn udje owu, se Mark 5:25-34, yanghene kporo IVIDIO na. Orho ru, are i gba kpahenrhọ enọ enana.

IVIDIO: E Simi Ọmase ro Kpomẹ (5:10)

Uvuẹn ividio na, imwẹro ọgo yẹ ọmase ro kpomẹ na o vwori?
Me yọ merhenruọn oma kpahen igbevwunu ọnana?

Se John 5:36, orho ru, are i gba kpahenrhọ onọ ọnana:

Marhẹ igbevwunu i Jesu o ruru, i ru “sẹ oseri” kpahiẹn?

Wu rheri?

Iyẹnrẹn buebun rẹ ọwan i rhe kpahen i Jesu, i ha uvuẹn ẹbe i Baibol ẹne re se i Matthew, Mark, Luke, ọrhẹ John. Ihworho ri ya iyẹnrẹn enana i ya ekwakwa sansan kpahen akpenyerẹn i Jesu. Erhe se iyẹnrẹn ẹne enana, ana mẹrẹn iyẹnrẹn buebun ri merhoma kpahen akpenyerẹn yen.

MATTHEW

yọ kiki ya kpahen i Jesu. Ọ dabu dje kpahen iyono i Jesu, maido oborẹ i Jesu o yono ihworho kpahen Uvie Osolobrugwẹ.
MARK

yọ ya iyẹnrẹn rọ mai kamu kpahen i Jesu. Iyẹnrẹn yen ọ vuọnren rhẹ irueruo ra merhoma omamọ.
LUKE

ọ dabu tẹnrovi oborẹ ẹrhomo ọghanren te rẹn i Jesu, ọrhẹ oborẹ ọ hẹrote emẹse lele.
JOHN

ọ nẹ iyẹnrẹn buebun kpahen aruẹ ohworho ri Jesu ọ havwọ, nyoma rọ ta kpahen ẹmro i Jesu ọ tare rhẹ igbehian yen ọrhẹ awọrọ.