UYONO 17

Aruẹ Ohworho Ọgo yi Jesu ọ Havwọ?

KPORIE

Erhe yono kpahen oborẹ i Jesu ọ tare, ọrhẹ oborẹ o ruru ọke rọ ha uvuẹn otọrakpọ na, ne yono omamọ iruemru ri na lẹrhẹ ọwan tikẹriẹ, ọrhẹ Ọsẹ ye, Jehova. Ego yẹ ezẹko usuẹn iruemru enana? Marhẹ ene ru hẹrokele i Jesu uvuẹn akpenyerẹn ọwan?

1. Izede ego yi Jesu o ru họhọ Ọsẹ ye?

Jesu o vwo oniso kpahen Ọsẹ ye, ọ jeghwai yono ekwakwa buebun mie yi ẹgbukpe buebun obẹ odjuwu. Omarana, no roro, ji ruẹ ekwakwa jerẹ Ọsẹ ye. (Se John 5:19.) Itiọrurhomẹmro, Jesu ọ hẹrokele iruemru Ọsẹ ye omamọ, omarana, nọ tare: “Kohworho kohworho rọ mẹrẹnren mẹ ne, ọ ji mẹrẹn Ọsẹ na ne.” (John 14:9) We rhe yono kpahen iruemru i Jesu, ọnọ lẹrhuọ dabu rhe i Jehova. Jerẹ udje, arodọmẹ ri Jesu o dje harẹn ihworho, o djephia taghene i Jehova o vwo ẹguọlọ kpahuọn.

2. Marhẹ i Jesu o ru djephia taghene o vwo ẹguọlọ kpahen i Jehova?

Jesu nọ tare: “Nẹ akpọ na ọ sabu rhe taghene mi vwo ẹguọlọ kpahen Ọsẹ na, ni mie ruẹ oborẹ Ọsẹ na o jurhie mẹ mi ru.” (John 14:31) Ọke i Jesu ọ ha uvuẹn otọrakpọ na, no djephia taghene o vwo ẹguọlọ kpahen Ọsẹ ye nyoma rọ huvwele yi udabọ erhirhiẹ egbogbanhon. Fọkiẹ ẹguọlọ ri Jesu o vwo kpahen Ọsẹ ye, no yono awọrọ kpahiẹn, ji ha userhumu rẹn aye vwo omamọ onyerẹnkugbe rhẹ Ọsẹ ye.—John 14:23.

3. Marhẹ i Jesu o ru djephia taghene o vwo ẹguọlọ kpahen ihworho?

Baibol na ọ tare taghene i Jesu o ‘vwo ẹguọlọ kpahen ituakpọ omamọ.’ (Proverbs 8:31, ekete ra djokarhọ) O dje ẹguọlọ ọnana phia nyoma rọ ha urhebro, ji ha userhumu rẹn ihworho. O ru igbevwunu ri djephia taghene o vwo omẹgbanhon ọrhẹ arodọmẹ. (Mark 1:40-42) O ruẹ ihworho dẹndẹn, o vwo ni awọrọ ruẹ-ẹ. Ẹmro enẹyen ọ ha urhebro ọrhẹ ifiẹrorhọ rẹn ihworho ri vwo ẹhẹn esiri ra kerhọ ye. Jesu o vwo omwemẹ rọ nọ rioja jeghwai hwu fọkiẹ ẹguọlọ ro vwo kpahen ituakpọ. Ọrẹn, ihworho ra nyalele iyono enẹyen, yọ mai vwo ẹguọlọ kpahen.—Se John 15:13, 14.

YONO KODO RHỌ

Yono riaro kpahen iruemru i Jesu. Jeghwai yono kpahen oborẹ wu ne ru hẹrokele ẹguọlọ ọrhẹ uruemru ghwologhwolo ọnẹyen.

4. Jesu o vwo ẹguọlọ kpahen Ọsẹ ye

Udje i Jesu o yonirin ọwan oborẹ ene ru dje ẹguọlọ re vwo kpahen Osolobrugwẹ phia. Se Luke 6:12 ọrhẹ John 15:10; 17:26. Are i rhe se ekete i Baibol enana hin, are i gba kpahenrhọ onọ ọnana:

Marhẹ ene ru hẹrokele i Jesu, jeghwai dje ẹguọlọ re vwo kpahen i Jehova phia?

Jesu o vwo ẹguọlọ kpahen Ọsẹ ye obẹ odjuwu, nọ jeghwai nẹrhomo ọgbọ buebun vwe yi

5. Jesu o vwo ọdamẹ kpahen ihworho ri guọlọ userhumu

Jesu ọ ha edamẹ awọrọ karo. Ọke oma ọ ghwọghiẹ dede, ọ ji ha ọke ọrhẹ omẹgbanhon ọnẹyen ha userhumu rẹn ihworho. Se Mark 6:30-44, orho ru, are i gba kpahenrhọ enọ enana:

Uvuẹn iyẹnrẹn ọnana, izede ego yi Jesu o ru dje ọdamẹ ro vwo kpahen ihworho phia?—Se eghwẹmro ọrẹ 31, 34, 41, ọrhẹ 42.
Me yo mwu i Jesu ha userhumu rẹn ihworho?—Se oghwẹmro ọrẹ 34.
Fọkime i Jesu o dje iruemru i Jehova phia, me yẹ ọnana o yoniruon kpahen i Jehova?
Izede ego ye ne ru hẹrokele ọdamẹ i Jesu o dje rẹn ihworho?

6. Jesu ohworho ghwologhwolo

Jesu o tiobọnu ghwologhwolo dedevwo o vwo ekwakwa ugboma bu-un, o ji jirie rẹn ọwan ne rhe tiobọnẹ ghwologhwolo. Se Acts 20:35, orho ru, are i gba kpahenrhọ onọ ọnana:

Lele oborẹ i Jesu ọ tare, me yọ nọ yẹ ọwan obọdẹn omamerhomẹ?

Kporo IVIDIO na, orho ru, are i gba kpahenrhọ onọ ọnana.

IVIDIO: “Omamerhomẹ ọ Havwiẹ Harẹn Ọro Tiobọnẹ”—Ekete ezẹko vwọye (4:00)

Izede ego ye ne ru tiobọnu ghwologhwolo, ọrhọ tobọ rhianẹ e vwo ekwakwa ugboma bu-un?

Wu rheri?

Baibol na o yonirin ọwan na nẹrhomo vwe i Jehova nyoma odẹ i Jesu. (Se John 16:23, 24.) Arha nẹrhomo izede ọrana, ne djephia taghene e vwo ọdaremẹro kpahen userhumu i Jesu o tiobọnu rẹn ọwan na sabu rhiẹ igbehian i Jehova.

OBORẸ IHWORHO EZẸKO A TA: “Osolobrugwẹ ọ vwọ damerhọ erhirhiẹ ojẹriọ ra havwọ-ọ.”