Jehova orhiẹ Osolobrugwẹ ro ruẹ yanghan yangha-an. (1 Corinthians 14:33) Omarana, e vi rhe taghene ihworho yi ine rhe ruẹ ekwakwa dẹndẹn. Marhẹ ukoko Ilele Kristi ọ wian lele? Marhẹ ene ru toroba efikparobọ ye?

1. Ọrọmo yo suẹn ukoko na?

‘Kristi yẹ urhomu harẹn ukoko na.’ (Ephesians 5:23) O suẹn irueruo ihworho i Jehova uvuẹn akpọ na ephian nẹ obẹ odjuwu sa. Jesu ọ ha “ọvrẹn ra hẹrosua ro ji vwo ẹghwanren na” mwu, ro rhiẹ ibiẹ otu ekpako ri te edje re rhe rhẹ Ugboma Usuon na. (Se Matthew 24:45-47.) Jerẹ inyikọ ọrhẹ ekpako ri ha uvuẹn i Jerusalem ọke Ilele Kristi erukaro na, Ugboma Usuon na yo tiobọnu ọkpọvi rẹn ikoko ri ha uvuẹn akpọ na ephian. (Acts 15:2) Ọrẹn, orhiẹ ehworhare enana ye suẹn ukoko na-a. Aye a hẹroso i Jehova jeghwai nyalele ọkpọvi ri ha uvuẹn Ẹmro ọnẹyen, habaye, aye i mwuegbe aye ina nyalele ọkpọvi i Jesu.

2. Me yẹ owian ekpako ukoko?

Ekpako ukoko ehworhare ri rhiẹ Ilele Kristi ri fuevwan ra ga ẹgbukpe buebun ne, aye a ha i Baibol na yono ihworho, jeghwai ha urhebro rẹn aye. Avwa kwosa rẹn aye fọkiẹ owian aye-e. Ukpomaran, aye a ga “nẹ ẹhẹn sa harẹn Osolobrugwẹ; orhiẹ fọkiẹ erere ọghware-e, ọrẹn, ọrẹ i ghwologhwolo.” (1 Peter 5:1, 2) Idibo owian, ehworhare ra ha userhumu rẹn ekpako na, aye i rha nyamwu evwan ra guọlọre, na haye mwuẹ ẹrhẹ ekpako ukoko.

Ugboma Usuon na ọ ha ekpako ezẹko mwuẹ ẹrhẹ iniruo okinhariẹ. Aye e kin ikoko sansan nẹ aye i ha ọkpọvi ọrhẹ urhebro rẹn aye. Aye a ha imizu ehworhare ri nyamwu evwan i Baibol na mwuẹ ẹrhẹ ekpako ọrhẹ idibo owian.—1 Timothy 3:1-10, 12; Titus 1:5-9.

3. Me yẹ owian Oseri Jehova owuowu?

Ọsoso ihworho ri ha uvuẹn ukoko na e “jiri odẹ i Jehova” nyoma aye e vwobọrhọ uyono ukoko, jeghwai ghwoghwo lele erhirhiẹ aye i havwọ.—Se Psalm 148:12, 13.

 YONO KODO RHỌ

4. Jesu osun ro vwo uruemru esiri

Jesu ọ rionbọ use rọ merhoma omamọ rẹn ọwan. Se Matthew 11:28-30, orho ru, are i gba kpahenrhọ onọ ọnana:

• Jesu aruẹ osun ọgo, me yọ guọlọre ne roro kpahen usuon ọnẹyen?

5. Ekpako ukoko e yono awọrọ nyoma udje aye

1. Ekpako ukoko e ruẹ onyerẹnkugbe aye rhẹ i Jehova gbanhan, omaran ji te ọrẹ ekrun aye

2. Ekpako ukoko a hẹrote ọsoso ihworho ri ha uvuẹn ukoko na

3.   Ekpako ukoko e ghwoghwo ọke ephian

4. Ekpako ukoko, iyono. Aye e ji vwobọrhọ owian erufon ọrhẹ ewian erọrọ

6. Ọwan ina sabu huvwele ekpako ukoko

Baibol na o dje oborẹ ọsoriẹ ọghanren na rha huvwele ekpako ukoko. Se Hebrews 13:17, orho ru, are i gba kpahenrhọ enọ enana:

• Mesoriẹ i Baibol na ọ ta taghene a huvwele era kobaro? Me wu rorori? Mesoriẹ?

Se Luke 16:10, orho ru, are i gba kpahenrhọ onọ ọnana:

• Mesoriẹ o fo na huvwele ekpako ukoko, ọrhọ tobọ sekpahen ẹmro ekokamu dede?

 ME WU YONORIN?

Jesu yo suẹn ukoko na. Ọwan a huvwele ekpako ri ha otọriẹ fọkime aye a ha userhumu rẹn ọwan, ji yono ọwan nyoma omamọ udje aye e djephia.

Ẹzẹkoko

• Ọrọmo yo suẹn ukoko na?

• Marhẹ ekpako e ru ha userhumu rẹn imizu ukoko na?

• Me yẹ owian owuowọnwan usuẹn ihworho ra ga i Jehova?