UYONO 21

Marhẹ e Ghwoghwo Iyẹnrẹn Esiri na Lele?

KPORIE

Jehova ọnọ ha Uvie ọnẹyen fiobarhọ ebẹnbẹn ọwan ephian phẹrẹkpẹ. Ọnana iyẹnrẹn esiri ro fori na ta rẹn awọrọ. Jesu ọ guọlọre nẹ idibo yi i ta rẹn awọrọ kpahen iyẹnrẹn ọnana! (Matthew 28:19, 20) Marhẹ Iseri Jehova a kpahanrhọ akama ọnana ri Jesu o tiobọnu na?

1. Marhẹ i Matthew 24:14 o ruẹgba lele inyenana?

Jesu ọ mẹraruiẹ rhotọre: “Ene ghwoghwo iyẹnrẹn esiri Uvie na lele ọsoso ekete re rhirhiẹ uvuẹn akpọ na.” (Matthew 24:14) Oma ọmerhen Iseri Jehova rẹ aye a wian owian ọghoghanren ọnana. Ame e ghwoghwo iyẹnrẹn esiri na uvuẹn akpọ na ephian, uvuẹn edjadjẹ ri vrẹn 1,000! Owian ọduado ọnana ọ guọlọ omẹdamu omamọ ọrhẹ ẹkwaphiẹrhotọre. Ame i sabu wian owian ọnana vabọ userhumu i Jehova-a.

2. Me yẹ ame e ruẹ nẹ ame i sabu ghwoghwo?

Ame e ghwoghwo uvuẹn ekete ame a mẹrẹn ihworho ephian. Jerẹ Ilele Kristi erukaro, ame e ghwoghwo “nẹ oghwa riẹ oghwa.” (Acts 5:42) Nyoma ona ọnana, ame na sabu ghwoghwo rẹn iduduru ihworho kẹgbukpe kẹgbukpe. Fọkime ame i vwa mẹrẹn ihworho ezẹko uvuẹn oghwa aye-e, nọ lẹrhẹ ame ji ghwoghwo uvuẹn afiede. Ọke ephian yẹ ame a guọlọ uphẹn rẹ ame ina ta rẹn awọrọ kpahen i Jehova ọrhẹ ọhọre ọnẹyen.

3. Ọrọmo ye tiobọnu owian aghwoghwo iyẹnrẹn esiri na riẹn?

Ilele Kristi urhomẹmro ephian yi vwo owian rẹ aye ine ghwoghwo iyẹnrẹn esiri na. Ame e ni owian ọnana ghanghanren. Ame e ghwoghwo te ekete omẹgbanhon ame o teri, fọkime ame i rheri taghene ọnọ sabu simi arhọ ihworho. (Se 1 Timothy 4:16.) Avwa kwosa rẹn ame uvuẹn owian ọnana-a, fọkime i Baibol na ọ tare: “A yẹrẹ are ọrẹ ọphẹ, are i tiobọnu ọrẹ ọphẹ.” (Matthew 10:7, 8) Orhiẹ ihworho ephian ya kerhọ ame-e. Ọrẹn, ame e ji ghwoghwo nime ame a huvwele i Jehova, ọ ji lẹrhẹ oma merhiẹn.

YONO KODO RHỌ

Yono riaro kpahen oborẹ Iseri Jehova e ru ghwoghwo iyẹnrẹn esiri na uvuẹn akpọ na ephian, ọrhẹ oborẹ i Jehova o ru ha userhumu rẹn ame.

Re ghwoghwo uvuẹn akpọ na ephian: (A) Costa Rica, (B) United States, (C) Benin, (D) Thailand, (E) Yap, (F) Sweden

4. Ame a wian gbangbanhon nẹ ame i sabu ghwoghwo rẹn ihworho ephian

Iseri Jehova a damoma nẹ aye i sabu ghwoghwo iyẹnrẹn esiri na rẹn ihworho uvuẹn ekete rẹ aye a mẹrẹn aye ephian. Kporo IVIDIO na, orho ru, are i gba kpahenrhọ onọ ọnana.

IVIDIO: Re Ghwoghwo Uvuẹn “Ekete Ri Mai Seri Uvuẹn Akpọ Na” (7:33)

Marhẹ oma o ruo kpahen omẹdamu Iseri Jehova, rẹ aye e ghwoghwo?

Se Matthew 22:39 ọrhẹ Romans 10:13-15, orho ru, are i gba kpahenrhọ enọ enana:

Marhẹ owian aghwoghwo rẹ ame e vwobọrhọ na o ru djephia taghene ame i vwo ẹguọlọ kpahen ereva ame?
Marhẹ oma o ru i Jehova kpahen ihworho re ghwoghwo iyẹnrẹn esiri na?—Se oghwẹmro 15.

5. Ame e lele Osolobrugwẹ wian kugbe

Iyẹnrẹn buebun i djephia taghene i Jehova yọ hobọtua owian ame. Jerẹ udje, uvuẹn i New Zealand, omizu ọhworhare owu re si Paul, nọ mẹrẹn ọmase owu uvuẹn erhẹrhuvo ọke ro riẹ aghwoghwo i nẹ oghwa riẹ oghwa. Urhiọke ẹdẹ ọrana, ọmase na ọ nẹrhomo vwe Osolobrugwẹ rhẹ odẹ ye Jehova, nọ ji rẹ ye nọ lẹrhẹ ohworho bruie rhe. Paul nọ tare: “Inọke esa a vrẹn, ni mi te anurẹsẹ ye.”

Se 1 Corinthians 3:9, orho ru, are i gba kpahenrhọ onọ ọnana:

Marhẹ oborerhiẹromẹrẹn jerẹ ọrọ phiare uvuẹn i New Zealand na, o ru djephia taghene i Jehova yọ hobọtua owian aghwoghwo na?

Se Acts 1:8, orho ru, are i gba kpahenrhọ onọ ọnana:

Mesoriẹ ame a guọlọ userhumu i Jehova nẹ ame i sabu wian owian aghwoghwo na fiotọre?

Wu rheri?

Uvuẹn uyono ame e ruẹ erhẹrhẹ ọkprughwre na kọkprughwre kọkprughwre, e yono ame oborẹ ame ine ru sabu ghwoghwo. Orhianẹ wu riẹ owu usuẹn iyono enana ne, me wu rorori kpahen iyono ra haphia uvuẹn avwaye?

6. Ame a huvwele akama Osolobrugwẹ nẹ ame i ghwoghwo

Uvuẹn ọke Ilele Kristi erukaro na, ihworho ezẹko i damoma rẹ aye ina kparehaso owian aghwoghwo idibo i Jesu. Ilele Kristi erukaro na i chochọn ugbomọphẹ rẹ aye ine ghwoghwo, neneyo “urhi ọ jọ rhọ kparehaso iyẹnrẹn esiri na.” (Philippians 1:7) Omaran Iseri Jehova e ji ruẹ inyenana. a

Kporo IVIDIO na.

IVIDIO: Re Fiudugbere Chochọn Iyẹnrẹn Esiri na (2:28)

Se Acts 5:27-42, orho ru, are i gba kpahenrhọ onọ ọnana:

Mesoriẹ ọwan ina ja dobọ owian aghwoghwo na ji?—Se eghwẹmro ọrẹ 29, 38, ọrhẹ 39.

OHWORHO ỌNỌ SABU NỌ: “Mesoriẹ Iseri Jehova e ghwoghwo nẹ oghwa riẹ oghwa?”

Marhẹ wu na kpahenrhọ ye lele?

ME WU YONORIN?

Jesu ọ ta rẹn idibo yi taghene aye i ghwoghwo iyẹnrẹn esiri na lele egbamwa na ephian. Jehova ọ ha userhumu rẹn ihworho yi nẹ aye i sabu wian owian ọnana.