UYONO 22

Marhẹ Wu Ne Ru Ghwoghwo Iyẹnrẹn Esiri na?

KPORIE

Ru we yono kpahen irhomẹmro i Baibol na, wu na sabu rhe roro, ‘O fori nẹ ihworho ephian i rhon kpahiẹn!’ Urhomẹmro, o ghini fo nẹ ihworho ephian i rhon yi! Ọrẹn, ọkezẹko ofẹn ọnọ sabu rhe mwuo wu na ta rẹn awọrọ kpahen oborẹ wu yonorin. Jene yono oborẹ wu ne ru fi ofẹn kparobọ, ọrhẹ oborẹ wu ne ru ghwoghwo iyẹnrẹn esiri na rhẹ omamerhomẹ.

1. Marhẹ wu ne ru ta rẹn ihworho wu rheri kpahen oborẹ wu yono ne?

Idibo i Jesu ni tare: “Ekwakwa ame i mẹrẹnren jeghwai rhon, ame i sabu dobọ ẹta ye jẹ-ẹ.” (Acts 4:20) Aye i vwo ẹguọlọ kpahen oborẹ i Jesu o yonirin aye, omarana, aye ni ji guọlọ ta rẹn awọrọ kpahiẹn. We ji rorie omaran? Orho rhiomaran, guọlọ uphẹn wu na homariotọre ta rẹn ekruon ọrhẹ igbehian kpahen oborẹ wu yono ne.—Se Colossians 4:6.

Izede ezẹko wu ne ru tonrhọ

We rhe lele ohworho ekruon tẹmro, ta riẹn kpahen urhomu-ẹmro i Baibol, nyoma wu na ta: “Mi yono oborẹ ọ merhenren mẹ oma ọkprughwre ọnana.”
Ta rẹn ugbehian ro kpomẹ yanghene ro vwo ọfiamu, kpahen ekete i Baibol rọ nọ yẹ ye urhebro.
Ta rẹn ereva obẹ iruo ra nọ kpahen oborẹ oma ọ havwọ, oborẹ wu yonorin uvuẹn uyono ukoko yanghene uyono i Baibol ọnọ.
Dje iwẹbsaiti jw.org rẹn igbehian.
Ta rẹn awọrọ nẹ aye i homaba ọke we ruẹ uyono i Baibol ọnọ, yanghene dje rẹn aye oborẹ aye ine ru sabu nekpẹn uyono i Baibol uvuẹn i jw.org.

2. Mesoriẹ ọghanren ne kwomakugbe ukoko uvuẹn owian aghwoghwo na?

Idibo i Jesu e ghwoghwo iyẹnrẹn esiri na rẹn ihworho rẹ aye i rheri ọvo-o. Jesu o ‘dje rẹ aye eveva nẹ aye i kobaro ha riẹn, uvuẹn amwa na ephian’ ye ghwoghwo. (Luke 10:1) Owian aghwoghwo ọrana ra dabu djiroro yi, nọ lẹrhẹ ihworho buebun rhon iyẹnrẹn esiri na. Idibo na i ghọghọren ọke aye a wian owian ọnana kugbe. (Luke 10:17) Wu na sabu bru ẹkẹ te oma wu ne kwomakugbe ukoko na uvuẹn owian aghwoghwo na?

YONO KODO RHỌ

Yono kpahen oborẹ wu ne ru fi ofẹn kparobọ, jeghwai mẹrẹn aghọghọ rọ havwiẹ arha ta rẹn awọrọ kpahen iyẹnrẹn esiri na.

3. Jehova ọrhẹ owẹwẹ i gba havwiẹ

Ihworho ezẹko ri guọlọ ghwoghwo, a zofẹn oborẹ awọrọ ine roro, yanghene oborẹ aye ina kpahenrhọ ye lele.

Wa zofẹn wu na ta rẹn awọrọ kpahen oborẹ wu yonorin? Me wu rorori? Mesoriẹ?

Kporo IVIDIO na, orho ru, are i gba kpahenrhọ onọ ọnana.

IVIDIO: Mi Nẹrhomo Vwe i Jehova Nọ Yẹ Mẹ Uduefigbere (4:05)

Marhẹ iphuphẹn Iseri Jehova enana, i ru fi ofẹn kparobọ?

Se Isaiah 41:10, orho ru, are i gba kpahenrhọ onọ ọnana:

Wa rha zofẹn wu ne ghwoghwo, mesoriẹ o fo ne wu nẹrhomo?

Wu rheri?

Iseri Jehova buebun i zofẹn rẹ aye ine ghwoghwo iyẹnrẹn esiri na ọke rọ vrẹnren. Jerẹ udje, ofẹn o mwu i Sergey ro no lele awọrọ tẹmro. Ọrẹn, no yono i Baibol na. Nọ tare: “Dedevwo mia zofẹn, mi ji ta rẹn awọrọ kpahen oborẹ mie yono. O gberi mẹ unu omamọ, ọke mia mẹriẹn taghene owian aghwoghwo na, ọ lẹrhẹ uduefigbere mẹ gbanhanrhọ. O ji ru imwẹro mẹ gbanhonrhọ.”

4. Dje ọghọ phia

Wa rha ta rẹn awọrọ kpahen iyẹnrẹn esiri na, roro kpahen oborẹ wu na ta, ọrhẹ oborẹ wu na ta ye lele. Se 2 Timothy 2:24 ọrhẹ 1 Peter 3:15, orho ru, are i gba kpahenrhọ enọ enana:

Marhẹ wu ne ru ha ekete i Baibol enana ruiruo, wa rha ta rẹn awọrọ kpahen oborẹ wu yonorin?
Ọkezẹko, ihworho ekruon ọrhẹ igbehian ezẹko, i kwerhọ oborẹ wa ta na-a. Me wu na sabu ru? Me wu ne je ruo?
Mesoriẹ o fo ne wu ha ona nọ enọ, ukperẹ wu na gba aye kwerhọ imwẹro ọnọ?

5. A mẹrẹn aghọghọ erhe ghwoghwo iyẹnrẹn esiri na

Jehova ọ yi Jesu owian ro no ghwoghwo iyẹnrẹn esiri na. Ukẹro ọgo yọ ha ni owian na? Se John 4:34, orho ru, are i gba kpahenrhọ enọ enana:

Arha riẹ omamọ emaren, ọ sẹrorẹ ọwan, ọ ji lẹrhẹ oma merhen ọwan. Mesoriẹ i Jesu ọ ta taghene erhe ruẹ ọhọre Osolobrugwẹ, ọrhẹ ọre ne ghwoghwo iyẹnrẹn esiri Uvie na, ọ họhọ emaren ra ria?
Aghọghọ ego wu rorori taghene wu na mẹrẹn we rhe ghwoghwo iyẹnrẹn esiri na?

Urhebro

Ọke re ne ruẹ uyono uvuẹn erhẹrhẹ ọkprughwre na, guọlọ izede wu ne ru ghwoghwo rẹn awọrọ.
Ta rẹn oyono ọnọ taghene wu guọlọ vwobọrhọ ẹmro emọ isukuru Uvie na a haphia uvuẹn uyono re ruẹ erhẹrhẹ ọkprughwre na. Oghọn ọrana, ọnọ ha userhumu wẹn dabu mwuegbe wu na ta rẹn awọrọ kpahen oborẹ we yono.
Ha oghọn na, “Oborẹ Ihworho Ezẹko A Ta” yanghene “Ohworho Ọnọ Sabu Nọ,” uvuẹn uyono ọnana yono oborẹ wu ne ru kpahenrhọ onọ yanghene oborẹ ihworho ezẹko a ta.

OHWORHO ỌNỌ SABU NỌ: “Marhẹ oma ọ havwọ?”