Jesu o yono idibo yi taghene Ilele Kristi ine vi bromarhame. (Se Matthew 28:19, 20.) Ọrẹn, me yẹ omebrurhame? Me yẹ ohworho ono ruo nọ ki sabu bromarhame?

1. Me yẹ omebrurhame?

Ẹmro na “bru rhẹ ame,” o nẹ ẹmro i Greek rhe ro mevirhọ, “re dumu” ohworho rhẹ uvuẹn ame. Ọke i Jesu o bromarhame, ne dumu rien rhẹ uvuẹn Urhie i Jordan, na ji haye nẹ “uvuẹn ame na rhe.” (Mark 1:9, 10) Ilele Kristi inyenana a ji hẹrokele i Jesu, nyoma re bru aye rhẹ uvuẹn ame yanghene re dumu aye rhẹ uvuẹn ame.

2. Me yẹ ohworho o djephia ọke ro bromarhame?

Ohworho ro bromarhame, o djephia taghene ọ homakpahontọre rẹn i Jehova Osolobrugwẹ ne. Marhẹ ohworho o ru homakpahontọre? Ohworho ọ homakpahontọre rẹn i Jehova uvuẹn ẹrhomo, rọ ta riẹn taghene ọ guọlọ ga Ye bẹmẹdẹ. No ve taghene ọ guọlọ ga i Jehova ọvo, ọ ji guọlọ ha ọhọre Osolobrugwẹ karo uvuẹn akpenyerẹn ọnẹyen. O brorhiẹn taghene ọ guọlọ ‘tiẹn omayen no . . . rho lele’ iyono ọrhẹ udje i Jesu. (Matthew 16:24) Omẹhakpahontọre ọrhẹ omebrurhame ọnẹyen yọ lẹrheriẹ vwo onyerẹnkugbe rọ kpẹnkpẹnren rhẹ i Jehova ọrhẹ imizu ukoko na.

3. Me yẹ ohworho ono ruo nọ ki sabu mwuovwan omebrurhame?

Bọmọke wu na ki sabu bromarhame, ọghanranren ne wu yono kpahen i Jehova, jeghwai vwo esegburhomẹmro ọgbogbanhon kpahiẹn. (Se Hebrews 11:6.) Esegburhomẹmro ọrhẹ irherhe ọnọ ọrhọ gbanhanrhọ, ẹguọlọ wu ne vwo kpahen i Jehova nọ nọ ji gbanhonrhọ. Ọnana ọnọ lẹrhuọ vwo omwemẹ wu ne ghwoghwo kpahiẹn, jeghwai nyalele evwan enẹyen. (2 Timothy 4:2; 1 John 5:3) Ohworho orho ‘mwuovwan obaro i Jehova ne, nọ sabu lẹrhẹ oma merhiẹn vuọnvuọn,’ ọnana no mwuie homakpahontọre rẹn Osolobrugwẹ jeghwai bromarhame.—Colossians 1:9, 10. a

 YONO KODO RHỌ

4. Ana sabu yono nẹ omebrurhame i Jesu

Se Matthew 3:13-17, ne wu yono kpahen iyẹnrẹn erọrọ sekpahen omebrurhame i Jesu. Orho ru, are i gba kpahenrhọ enọ enana:

• Jesu ọmọboban ọke ro bromarhame?

• Marhẹ e bru rie rhẹ ame lele? A ghwai balọ ame ghwuie?

Ọke i Jesu o bromarhame hin uvuẹn otọrakpọ na, nọ wian owian ọghoghanren rẹ Osolobrugwẹ ọ yẹriẹ. Se Luke 3:21-23 ọrhẹ John 6:38, orho ru, are i gba kpahenrhọ onọ ọnana:

• Ọke i Jesu o bromarhame hin, owian ọgo yọ ha karo uvuẹn akpenyerẹn ọnẹyen?

5. Omebrurhame orhienbro ọghoghanren wu na sabu bru

Omẹhakpahontọre ọrhẹ omebrurhame ọnọ sabu gbanhon ha wẹn ọke ọrukaro. Ọrẹn, wu na sabu ru riarorhọ te erhirhiẹ wu ne fiudugbere brorhiẹn ọghoghanren ọnana. Ne wu mẹrẹn ihworho ezẹko ri ru te omaran, kporo IVIDIO na.

Se John 17:3 ọrhẹ James 1:5, orho ru, are i gba kpahenrhọ onọ ọnana:

• Me yọ nọ ha userhumu rẹn ohworho mwuegbe hẹrhẹ omebrurhame?

1. Ọwan a homakpahontọre ọke ra ta rẹn i Jehova taghene a guọlọ ga ye bẹmẹdẹ

2. Ọke re bromarhame, ne djephia rẹn otu na taghene a homakpahontọre rẹn Osolobrugwẹ ne

 6. Erhe bromarhame, ne rhiẹ usuẹn ekrun i Jehova

Ọwan i rhe bromarhame, ne rhiẹ usuẹn ekrun ri vwo okugbe uvuẹn akpọ na ephian. Dedevwo ọwan i nẹ ekete ọrhẹ ẹkwotọre sansan rhe, e vwo imwẹro owu, e ji nyerẹn lele evwan ri gbare. Se Psalm 25:14 ọrhẹ 1 Peter 2:17, orho ru, are i gba kpahenrhọ onọ ọnana:

• Marhẹ omebrurhame o ru hobọte onyerẹnkugbe ohworho rhẹ i Jehova ọrhẹ awọrọ ra ga Ye?

 ME WU YONORIN?

Jesu o yono idibo yi taghene o fori nẹ Ilele Kristi i bromarhame. Nẹ ohworho ọ ki sabu bromarhame, ono vwo onyerẹnkugbe rọ dabu gbanhon rhẹ i Jehova, ono nyerẹn lele evwan enẹyen, jeghwai homakpahontọre Riẹn.

Ẹzẹkoko

• Me yẹ omebrurhame, mesoriẹ ọghanren?

• Me yẹ omẹhakpahontọre ọrhẹ omebrurhame e djephia?

• Me yẹ ohworho ono ruo nọ ki sabu homakpahontọre jeghwai bromarhame?