UYONO 28
Dje Ọdaremẹro Kpahen Oborẹ i Jehova Ọrhẹ i Jesu i ru ha Wẹn
Marhẹ oma o ruo, ugbehian ọrhọ yọ ẹghẹlẹ orhorhomu? Itiọrurhomẹmro, ọnọ lẹrhẹ oma merhuọn omamọ, ọnọ ji lẹrhuọ djephia rẹn ugbehian taghene wu vwo ọdaremẹro kpahen ẹghẹlẹ ọrana. Jehova ọrhẹ i Jesu yi yẹrẹ ọwan ẹghẹlẹ rọ mai do kparobọ. Ọrana ẹghẹlẹ ọgo, marhẹ ene ru djephia taghene e vwo ọdaremẹro kpahiẹn?
1. Marhẹ ene ru djephia taghene e vwo ọdaremẹro kpahen oborẹ i Jehova ọrhẹ i Kristi i ru harẹn ọwan?
Baibol na o veri taghene, “kohworho kohworho ro vwo esegburhomẹmro kpahiẹn [nọyẹ i Jesu]” ọnọ sabu nyerẹn bẹmẹdẹ. (John 3:16) Me yo mevirhọ re ne dje esegburhomẹmro kpahiẹn? Ọnana ọ ghwẹ ọrẹ ana ghwai vwo imwẹro kpahen i Jesu. O ji fo ne rhe dje esegburhomẹmro ọwan phia nyoma odjẹ ọwan ọrhẹ ekwakwa re ruẹ. (James 2:17) Erhe dje esegburhomẹmro ọwan phia nyoma oborẹ e ruẹ ọrhẹ oborẹ a ta, esegburhomẹmro re vwori kpahen i Jehova ọrhẹ i Jesu nọ gbanhanrhọ.—Se John 14:21.
2. Irueruo oghẹnrensan ọgo yọ nọ ha userhumu rẹn ọwan dje ọdaremẹro kpahen oborẹ i Jehova ọrhẹ i Jesu i ru rẹn ọwan?
Uvuẹn owuọwọn i Jesu o ki hwu, nọ ta rẹn idibo yi kpahen izede ọrọrọ re ne ru dje ọdaremẹro kpahen izobo ọnẹyen. Nọ ta rẹn aye nẹ aye i koko ru irueruo oghẹnrensan ri Baibol na o seri, “Emaren Owuọwọn Ọrovwori na,” re ji se Ẹkarorhọ Uhwu i Jesu. (1 Corinthians 11:20) Jesu ọ ha riẹ mwu nẹ ọsoso inyikọ ye ọrhẹ ọsoso Ilele Kristi urhomẹmro ri ha kpahen aye, i karorhọ taghene ọ ha arhọ ye kpahontọre harẹn ọwan. Sekpahen irueruo ọnana, Jesu no jurhie rhotọre: “Are i rhe ru ọnana ha karorhọ mẹ.” (Luke 22:19) We rhe riẹ Ẹkarorhọ Uhwu i Jesu, nu we djephia taghene wu vwo ọdaremẹro kpahen ẹguọlọ i Jehova ọrhẹ i Jesu i vwo kpahen ọwan.
YONO KODO RHỌ
Yono kpahen izede erọrọ wu ne ru dje ọdaremẹro phia fọkiẹ ẹguọlọ okokodo ri Jehova ọrhẹ i Jesu i vwo kpahen ọwan. Yono kpahen oborẹ ọsoriẹ Ẹkarorhọ Uhwu i Jesu ọghanren.
3. Marhẹ ene ru dje ọdaremẹro ọwan phia?
Roro kpahen ohworho ro simi arhọ ọnọ. Oborẹ ohworho na o ru ha wẹn, ọnọ sẹruọ ẹro dẹ? Gbinẹ wu na guọlọ izede wu ne ru djephia taghene wu vwo ọdaremẹro kpahen oborẹ o ruru na?
Jehova yo vwo arhọ ọwan. Se 1 John 4:8-10, orho ru, are i gba kpahenrhọ enọ enana:
-
Mesoriẹ izobo i Jesu, o rhiẹ ẹghẹlẹ oghẹnrensan?
-
Marhẹ oma o ruo kpahen oborẹ i Jehova ọrhẹ i Jesu i ru ha wẹn?
Marhẹ ene ru dje ọdaremẹro kpahen oborẹ i Jehova ọrhẹ i Jesu i ru harẹn ọwan? Se 2 Corinthians 5:15 ọrhẹ 1 John 4:11; 5:3. Are i rhe se ekete i Baibol enana ne, are i gba kpahenrhọ enọ enana:
-
Sekpahen ekete i Baibol enana, marhẹ ene ru dje ọdaremẹro ọwan phia?
4. Hẹrokele i Jesu
Izede ọrọrọ re ne ru dje ọdaremẹro ọwan phia, yẹ ọrẹ ana hẹrokele i Jesu. Se 1 Peter 2:21, orho ru, are i gba kpahenrhọ onọ ọnana:
-
Izede ego ye wu ne ru hẹrokele idjaghwẹ i Jesu kpẹnkpẹnkpẹn?
Jesu o vwo ẹguọlọ kpahen Ẹmro Osolobrugwẹ, o ghwoghwo iyẹnrẹn esiri na, ọ jeghwai ha userhumu rẹn awọrọ
5. Riẹ ekete re ruẹ Ẹkarorhọ Uhwu i Jesu
Ne wu rhe oborẹ e ru Emaren Owuọwọn Ọrovwori na ọrukaro lele, se Luke 22:14, 19, 20. Orho ru, are i gba kpahenrhọ enọ enana:
-
Me yọ phiare ọke ra riẹ Emaren Owuọwọn Ọrovwori na?
-
Me yẹ ibrẹdi na ọrhẹ enyo na i mevirhọ?—Se eghwẹmro ọrẹ 19 ọrhẹ 20.
Jesu ọ guọlọre nẹ idibo yi i riẹ Emaren Owuọwọn Ọrovwori na, ukwọgbọ ẹgbukpe ha karorhọ uhwu ọnẹyen. Omarana, Iseri Jehova a vwoma kẹgbukpe kẹgbukpe, neneyo aye i ruẹ Ẹkarorhọ Uhwu i Kristi jerẹ oborẹ o jurhie rhotọre. Ne wu yono kpahen irueruo ọghoghanren ọnana, kporo IVIDIO na. Orho ru, are i gba kpahenrhọ onọ ọnana.
-
Me ye ruẹ uvuẹn Ẹkarorhọ Uhwu i Jesu?
Ibrẹdi ọrhẹ enyo na i mevirhọ emru. Ibrẹdi na o mevirhọ ugboma i Jesu rọ gbare, rọ ha ze izobo fọkiẹ ọwan. Enyo na o mevirhọ ọbara ye
OBORẸ IHWORHO EZẸKO A TA: “Oborẹ wu ne ruo ne wu sabu vwo usimirhọ, yẹ ọrẹ wu ne vwo imwẹro kpahen i Jesu.”
-
Marhẹ wu ne ru ha i John 3:16 ọrhẹ James 2:17 djephia taghene o ji vwo ekwakwa erọrọ re ne ruo?
ME WU YONORIN?
Ọwan e djephia taghene e vwo ọdaremẹro kpahen oborẹ i Jesu o ru harẹn ọwan, nyoma re dje esegburhomẹmro kpahiẹn, jeghwai rhe ruẹ Ẹkarorhọ Uhwu ọnẹyen.
Ẹzẹkoko
-
Me yo mevirhọ re ne dje esegburhomẹmro kpahen i Jesu?
-
Marhẹ wu ne ru dje ọdaremẹro kpahen oborẹ i Jehova ọrhẹ i Jesu i ru ha wẹn?
-
Mesoriẹ ọghanren omamọ ne ruẹ Ẹkarorhọ Uhwu i Jesu?
GUỌLỌ IYẸNRẸN ERỌRỌ
Me yẹ uhwu i Kristi o mwu ọwan ruẹ?
Yono riarorhọ kpahen esegburhomẹmro ọrhẹ oborẹ ene ru dje yi phia.
“Dje Esegburhomẹmro Kpahen ive i Jehova” (Oghwa Odẹrẹ, October 2016)
Uvuẹn ikuegbe na “Mi Vwo Obọdẹn Akpenyerẹn Ọrhẹ Omamerhomẹ Ne,” se kpahen oborẹ akpenyerẹn ọmase owu o ru rhomurhọ ọke ro yono oborẹ izobo i Kristi o mevirhọ.
Yono kpahen oborẹ ọsoriẹ ibiẹ ihworho a riẹ ibrẹdi jeghwai da enyo na, ọke re ruẹ Ẹkarorhọ Uhwu i Jesu.
