UYONO 32
Uvie Osolobrugwẹ o Suẹn Ne!
Uvie Osolobrugwẹ ọ tuẹn usuon rhọ obẹ odjuwu uvuẹn ẹgbukpe 1914. Ẹgbukpe ọrana ọyẹ ẹdẹ ri koba ọrẹ usuon ituakpọ ọ ji tonrhọ. Marhẹ ọwan i ru rhe? Ene yono kpahen oborẹ i Baibol na ọ mẹraruiẹ rhotọre, ọrhẹ oborẹ akpọ na ọ havwọ, kugbe iruemru ihworho nẹ ẹgbukpe 1914 rhe.
1. Me yi Baibol na ọ mẹraruiẹ rhotọre?
Ọbe i Daniel o djephia taghene Uvie Osolobrugwẹ ọnọ tuẹn usuon rhọ uvuẹn obẹta uvwrọke re seri “ọke irhiruẹ.” (Daniel 4:16, 17) Ẹgbukpe buebun a vrẹn, Jesu nọ rionbọrhọ ọke ọrana taghene “ọke ra yẹ egbamwa na,” no ji yono awọrọ taghene ọke na o ji toba-a. (Luke 21:24) Jerẹ oborẹ ana mẹrẹn, ọke irhiruẹ na o toba uvuẹn ẹgbukpe 1914.
2. Marhẹ erhirhiẹ akpọ na ọrhẹ iruemru ihworho ọ havwọ nẹ ẹgbukpe 1914 rhe?
Idibo i Jesu ni nọ riẹn: “Oka ọgo yo no dje omẹhaphia ọnọ ọrhẹ oba enyerakpọ ọnana phia?” (Matthew 24:3) Ọrẹ ẹkpahenrhọ, Jesu nọ mẹraro kpahen ekwakwa buebun ri na phia, ọrhọ tuẹn usuon rhọ uvuẹn ẹrhẹ Orodje Uvie Osolobrugwẹ obẹ odjuwu ne. Ezẹko usuẹn eka enana yẹ uvweri, emaren ri na kanren, ọrhẹ etọre ri ne kpogho. (Se Matthew 24:7.) Baibol na ọ ji mẹraruiẹ rhotọre taghene iruemru ihworho uvuẹn “ẹdẹ ri koba na” ọnọ lẹrhẹ akpọ na “bẹn enyerẹn.” (2 Timothy 3:1-5) Eka enana i dabu fiotọre nẹ ẹgbukpe 1914 rhe.
3. Mesoriẹ erhirhiẹ akpọ na o biomu omamọ nẹ ọke Uvie Osolobrugwẹ ọ tuẹn usuon rhọ?
Ọke i Jesu o rhiẹ Orodje Uvie Osolobrugwẹ hin, o jiri-i, nọ wọnrọn haso Echu ọrhẹ ikpodje na obẹ odjuwu. Echu o fikparobọ-ọ. Baibol na ọ tare taghene “ne dorinrien rhiẹ otọrakpọ na, ne ji donron emakashe yi lelie.” (Revelation 12:9, 10, 12) Echu ọ tuekwẹre gbangbanhon fọkime o rheri taghene ana ghwọghiẹ. Omarana, no suẹ omiamiamo ọrhẹ ojẹriọ lele akpọ na ephian. Ọnana yẹ ọsoriẹ erhirhiẹ akpọ na o biomu omamọ! Uvie Osolobrugwẹ ono fiobarhọ ebẹnbẹn enana ephian.
YONO KODO RHỌ
Yono kpahen oborẹ ọwan i ru rhe taghene Uvie na ọ tuẹn usuon rhọ uvuẹn ẹgbukpe 1914, ọrhẹ oborẹ ọnana o mevirhọ rẹn ọwan.
4. Ikekele ra bọn kpahen i Baibol na i djephia taghene Uvie Osolobrugwẹ ọ tuẹn usuon rhọ ẹgbukpe 1914
Osolobrugwẹ nọ lẹrhẹ Orodje Nebuchadnezzar ro suẹn i Babylon ọke ahwanren, menẹ emena aruẹmẹrẹn. Emena ọrana ọrhẹ oborẹ i Daniel ọ rhian riẹn lele, o djephia taghene o sekpahen usuon i Nebuchadnezzar ọrhẹ Uvie Osolobrugwẹ.—Se Daniel 4:17. a
Se Daniel 4:20-26, orho ru, are i gba ha ishati na kpahenrhọ enọ enana:
-
(A) Me yi Nebuchadnezzar ọ mẹrẹnren uvuẹn emena yen?—Se oghwẹmro ọrẹ 20 ọrhẹ 21.
-
(B) Me yọ nọ phia rẹn orhan na? —Se oghwẹmro ọrẹ 23.
-
(C) Me yọ nọ phia uvuẹn oba “ọke irhiruẹ” na?—Se oghwẹmro ọrẹ 26.
Oborẹ Emena Orhan na o ru Sekpahen Uvie Osolobrugwẹ
ARUẸMẸRẸN NA (Daniel 4:20-36)
Usuon
(A) Orhan ọduado
Usuon na no toba uvwrọke owu
(B) “Hẹn orhan na se,” jenẹ “ọke irhiruẹ nyavrẹn yen”
A rharhumu ha usuon na mwu
(C) “Ana rharhumu ha Uvie ọnọ wẹn”
Uvuẹn orugba ọrukaro ọrẹ aruẹmẹrẹn ọnana . . .
-
(D) Ọrọmo yẹ orhan na o mevirhọ?—Se oghwẹmro ọrẹ 22.
-
(E) Marhẹ usuon ọnẹyen o ru toba uvwrọke owu?—Se Daniel 4:29-33.
-
(F) Me yọ phia rẹn i Nebuchadnezzar obẹta “ọke irhiruẹ” na?—Se Daniel 4:34-36.
ORUGBA ỌRUKARO
Usuon
(D) Nebuchadnezzar, ro rhiẹ Orodje i Babylon
Usuon na no toba uvwrọke owu
(E) Ọke ẹgbukpe 606 B.C.E. ọ vrẹn, iroro i Nebuchadnezzar ọrhọ gba-a, omarana, ọrhọ sabu sun ẹgbukpe irhiruẹ-ẹ
A rharhumu ha usuon na mwu
(F) Iroro i Nebuchadnezzar nọ rhe ma gba, nọ sabu rharhumu tuẹn usuon rhọ
Uvuẹn orugba ọreva ọrẹ aruẹmẹrẹn ọnana . . .
-
(G) Ayọmo yẹ orhan na o mevirhọ?—Se 1 Chronicles 29:23.
-
(H) Marhẹ usuon aye o ru toba uvwrọke owu? Marhẹ ọwan i ru rhe taghene usuon aye o toba ọke i Jesu ọ ji ha uvuẹn otọrakpọ na?—Se Luke 21:24.
-
(I) Ọkiọgo, ọrhẹ bọgo ya rharhumu ha usuon ọnana mwu?
ORUGBA ỌREVA
Usuon
(G) Irodje Israel ri suẹn ihworho Osolobrugwẹ
Usuon na no toba uvwrọke owu
(H) Na ghwọghọ i Jerusalem, usuon irodje Israel ni toba uvwre ẹgbukpe 2,520
A rharhumu ha usuon na mwu
(I) Jesu nọ tuẹn usuon rhọ obẹ odjuwu uvuẹn ẹrhẹ Orodje Uvie Osolobrugwẹ
Marhẹ ọke irhiruẹ na i jiri te?
Eghwẹmro ezẹko uvuẹn i Baibol na, a ha userhumu rẹn ọwan vwẹruọ eghwẹmro erọrọ uvuien. Jerẹ udje, ọbe i Revelation ọ tare taghene ọke esa gbuphrophro na, o mevirhọ ẹdẹ 1,260. (Revelation 12:6, 14) Ọnana o mevirhọ taghene ẹgbukpe uvuẹn aruẹmẹrẹn i Baibol o ji mevirhọ ẹdẹ 360. Omarana, “ẹgbukpe irhiruẹ” na o ji mevirhọ ẹdẹ 2,520. Ovwo ọkezẹko rẹ ẹdẹ o meviẹrhọ ẹgbukpe uvuẹn i Baibol na. (Ezekiel 4:6) Ọrana yẹ ọsoriẹ ọke irhiruẹ ra hunute uvuẹn ọbe i Daniel na o mevirhọ ẹgbukpe 2,520.
5. Akpọ na o wene ne avwẹ ẹgbukpe 1914 rhe
Jesu ọ mẹraro kpahen ekwakwa ri na phia uvuẹn akpọ na ọke ro rhiẹ Orodje hin. Se Luke 21:9-11, orho ru, are i gba kpahenrhọ onọ ọnana:
-
Ọgo usuẹn ekwakwa enana ye wu mẹrẹn ne, yanghene wu rhon kpahen ne?
Ọnyikọ Paul o dje kpahen oborẹ ihworho ine nyerakpọ lele uvuẹn ẹdẹ ri koba ọrẹ usuon ituakpọ. Se 2 Timothy 3:1-5, orho ru, are i gba kpahenrhọ onọ ọnana:
-
Wa mẹrẹn ihworho ri vwo iruemru enana uvuẹn ọke ọwan na?
6. O fori nẹ usuon Uvie Osolobrugwẹ o mwu ọwan kpare idjaghwẹ
Se Matthew 24:3, 14, orho ru, are i gba kpahenrhọ enọ enana:
-
Owian ọghoghanren ọgo yo djephia taghene Uvie Osolobrugwẹ o suẹn ne?
-
Marhẹ wu ne ru sabu vwobọrhọ owian ọnana?
Uvie Osolobrugwẹ o suẹn ne, ono ji suẹn akpọ na ephian phẹrẹkpẹ. Se Hebrews 10:24, 25, orho ru, are i gba kpahenrhọ onọ ọnana:
-
Me yo fori nẹ ọwan owuowọnwan o ru, “rẹ ẹdẹ na o tiẹ kẹrẹ ne na”?
Wu rhe yono kpahen emru rọ nọ sabu ha userhumu rẹn awọrọ, jeghwai simi arhọ aye, me wu ne ruo?
OHWORHO ỌNỌ SABU NỌ: “Mesoriẹ Iseri Jehova a ta taghene 1914 ẹgbukpe ọghoghanren?”
-
Me wu na sabu ta?
ME WU YONORIN?
Aruẹmẹrẹn i Baibol, ikekele oborẹ ekwakwa i phia lele, ọrhẹ oborẹ akpọ na ọ havwọ vwana, i djephia taghene Uvie Osolobrugwẹ o suẹn ne. Ọwan e djephia taghene o mwurun ọwan ẹro nyoma re ghwoghwie, ji riẹ iyono ukoko ọke ephian.
Ẹzẹkoko
-
Me yọ phiare uvuẹn oba ọke irhiruẹ ri Baibol na ọ mẹraruiẹ uvuẹn ọbe i Daniel?
-
Mesoriẹ o mwuo ẹro taghene Uvie Osolobrugwẹ ọ tuẹn usuon rhọ ẹgbukpe 1914?
-
Marhẹ wu ne ru dje imwẹro ọnọ phia taghene Uvie Osolobrugwẹ o suẹn ne?
GUỌLỌ IYẸNRẸN ERỌRỌ
Yono oborẹ ihworho ra ya kpahen iyẹnrẹn ahwanren, ọrhẹ awọrọ a ta kpahen ewene ri homaphia uvuẹn akpọ na avwẹ ẹgbukpe 1914 rhe.
Se kpahen oborẹ aruẹmẹrẹn rọ ha uvuẹn Matthew 24:14, o ru hobọte akpenyerẹn ọhworhare owu.
“Mi Vwo Ẹguọlọ Kpahen Baseball Ẹfa Ghwẹ Ekwakwa Erọrọ!” (Oghwa Odẹrẹ Ikekele 3 2017)
Marhẹ ọwan i ru rhe taghene aruẹmẹrẹn rọ ha uvuẹn i Daniel urhomu-ẹmriẹn ọrẹ 4, o sekpahen Uvie Osolobrugwẹ?
“Ọkiọgo yẹ Uvie Osolobrugwẹ ọ Tuẹn Usun Rhọ? (Obọrẹ Ukaro)” (Oghwa Odẹrẹ, October 1, 2014)
Me yo djerie phia taghene “ọke irhiruẹ” ra hunute uvuẹn i Daniel urhomu-ẹmriẹn ọrẹ 4, o toba ẹgbukpe 1914?
“Ọkiọgo yẹ Uvie Osolobrugwẹ ọ Tuẹn Usun Rhọ? (Obọreva)” (Oghwa Odẹrẹ, November 1, 2014)
a Se irhomu-ẹmro eva ri kẹta uvuẹn oghọn na Guọlọ Iyẹnrẹn Erọrọ, uvuẹn uyono ọnana.
