UYONO 33
Oborẹ Uvie Osolobrugwẹ Ono Ruo
Uvie Osolobrugwẹ o suẹn ne. Phẹrẹkpẹ, ono ruẹ ewene eduado uvuẹn otọrakpọ na. Jene yono kpahen ezẹko usuẹn ekwakwa irhorhomu re wu na sabu fiẹrorhọ, Uvie na orho suẹn ne.
1. Marhẹ Uvie Osolobrugwẹ ono ru rhua ufuoma ọrhẹ orhienbro ọsoso rhiẹ otọrakpọ na?
Jesu ro rhiẹ Orodje Uvie Osolobrugwẹ, ọnọ ghwọghọ evwọkon ọrhẹ igọmẹti sansan uvuẹn uvweri ọrẹ Armageddon. (Revelation 16:14, 16) Ọke ọrana, ive i Baibol ọnana no no rugba, rọ tare taghene: “Phẹrẹkpẹ vwanran, evwọkon i rhe rhirhiẹ ye-e.” (Psalm 37:10) Jesu ọnọ nyoma Uvie na rhua ufuoma ọrhẹ orhienbro ọsoso rhiẹ otọrakpọ na ephian.—Se Isaiah 11:4.
2. Ọhọre Osolobrugwẹ kpahen akpọ na orho rugba ne, marhẹ akpenyerẹn ọwan ono rhirhiẹ?
Uvuẹn otọre usuon Uvie Osolobrugwẹ, “evwata na ina ha otọrakpọ na riuku, aye ine nyerẹn uvuien bẹmẹdẹ.” (Psalm 37:29) Gbe roro kpahen oborẹ akpọ na ono rhirhiẹ, ihworho ephian i rhe rhiẹ evwata, ji vwo ẹguọlọ kpahen i Jehova ọrhẹ omoma aye! Ovwo ohworho ro no kpomu-u, ihworho ephian ine nyerẹn bẹmẹdẹ.
3. Me yẹ Uvie Osolobrugwẹ ono ruo, arha ghwọghọ evwọkon na hin?
Arha ghwọghọ evwọkon na hin, Jesu no no sun uvuẹn ẹrhẹ Orodje ẹgbukpe 1,000. Uvwrọke ọrana, Jesu ọrhẹ awan 144,000 ri ne lelie sun, ina ha userhumu rẹn ituakpọ rhiẹ ihworho ri gbare. Orho ru, otọrakpọ na nọ nọ ghwẹriẹ rhiẹ i paradais orhorhomu, rọ nọ vuọn rhẹ ihworho oma ọmerhan fọkime aye a huvwele irhi i Jehova. Jesu nọ nọ ha usuon na rẹn Ọsẹ ye, Jehova. Itiọrurhomẹmro, ọke ọrana, ne ne ru ‘odẹ i Jehova fon’ dẹn. (Matthew 6:9, 10) Ihworho ephian ni ne rhe taghene i Jehova yẹ Osuinsuensun rọ mai rhomu, rọ hẹrote ihworho ro suẹn. Jehova nọ nọ ghwọghọ Echu, ikpodje na, ọrhẹ awọrọ ri djẹ odjẹ rẹ aye ina kparahasuẹ usuon Ọnẹyen. (Revelation 20:7-10) Ewene egbagba rẹ Uvie Osolobrugwẹ ọnọ ha rhe, ine rhirhiẹ ye bẹmẹdẹ.
YONO KODO RHỌ
Yono kpahen oborẹ ọsoriẹ ana sabu hẹroso Osolobrugwẹ taghene, ọnọ nyoma Uvie na ha ive i Baibol na sansan kpahen obaro na te orugba.
4. Uvie Osolobrugwẹ ono fiobarhọ igọmẹti ituakpọ
“Onyakpọ o sun onyakpọ riẹ ẹkuọn ye” ne. (Ecclesiastes 8:9) Jehova ọnọ nyoma Uvie ọnẹyen ti osehiẹn ọnana nẹ otọrakpọ na.
Se Daniel 2:44 ọrhẹ 2 Thessalonians 1:6-8, orho ru, are i gba kpahenrhọ enọ enana:
-
Me yi Jehova ọrhẹ Ọmọyen Jesu, ine ru igọmẹti ituakpọ ọrhẹ era hobọtua aye?
-
Marhẹ oborẹ wu yonorin kpahen i Jehova ọrhẹ i Jesu, o ru yọ imwẹro na taghene aye ine brorhiẹn ọsoso?
5. Jesu yẹ Orodje rọ mai rhomu
Ri Jesu orhiẹ Orodje Uvie Osolobrugwẹ na, ọnọ rhua erere buebun vwe ituakpọ ro no suon. Kporo IVIDIO na, ne wu mẹrẹn oborẹ i Jesu o ru djephia taghene o vwo omwemẹ ọrhẹ omẹgbanhon ro nẹ obẹ Osolobrugwẹ rhe, rọ nọ ha userhumu rẹn ihworho.
Ọke i Jesu ọ ha uvuẹn otọrakpọ na, o dje udje oborẹ Uvie na ono ruo. Ọgo wa mai fiẹrorhọ usuẹn ebrurhọ ra hunute uvuẹn arana? Se eghwẹmro i Baibol na ri dabu dje kpahen ebrurhọ erana.
|
ỌKE I JESU Ọ HA UVUẸN OTỌRAKPỌ NA . . . |
RI JESU Ọ HA OBẸ ODJUWU VWANA . . . |
|---|---|
|
|
|
|
|
|
|
|
6. Uvie Osolobrugwẹ ọnọ yẹ ọwan obọdẹn obaro akpọ
Uvie na ọnọ ha ọhọre i Jehova harẹn ituakpọ te orugba. Aye ine nyerẹn bẹmẹdẹ uvuẹn otọrakpọ na ro no rhiẹ i paradais. Kporo IVIDIO na, ne wu mẹrẹn oborẹ i Jehova o ru nyoma Ọmọyen, Jesu, ha ọhọre Ọnẹyen te orugba.
Se Psalm 145:16, orho ru, are i gba kpahenrhọ onọ ọnana:
-
Marhẹ oma o ruo, ru we rhe taghene i Jehova ọnọ “hẹrote edamẹ i kemru kemru re nyerẹn”?
OBORẸ IHWORHO EZẸKO A TA: “Ọwan ephian i rha wian kugbe, ana sabu fiobarhọ ebẹnbẹn ri ha uvuẹn akpọ na.”
-
Ebẹnbẹn ego yẹ Uvie Osolobrugwẹ ono fiobarhọ, rẹ igọmẹti ituakpọ ina ja sabu fiobarhọ?
ME WU YONORIN?
Uvie Osolobrugwẹ ọnọ ha ọhọre ọnẹyen te orugba. Ono wene akpọ na rhiẹ i paradais, rọ nọ vuọn rhẹ omamọ ihworho ri na ga i Jehova bẹmẹdẹ.
Ẹzẹkoko
-
Marhẹ Uvie Osolobrugwẹ ono ru ruẹ odẹ i Jehova fon?
-
Mesoriẹ ono mwu ọwan ẹro taghene Uvie Osolobrugwẹ, ọnọ ha ive i Baibol na te orugba?
-
Me wa mai fiẹrorhọ usuẹn ive rẹ Uvie na ọnọ ha te orugba?
GUỌLỌ IYẸNRẸN ERỌRỌ
Guọlọ otọre oborẹ Armageddon o mevirhọ.
“Me yẹ Uvweri Armageddon?” (Urhomu-ẹmro rọ ha uvuẹn itanẹti)
Yono kpahen ekwakwa ri na phia uvwrọke ri Jesu o seri “ukpokpogho rode” na.—Matthew 24:21.
“Me yẹ Ukpokpogho Rode na?” (Urhomu-ẹmro rọ ha uvuẹn itanẹti)
Ni oborẹ ekrun ine ru roro kugbe kpahen ebrurhọ rẹ Uvie na ọnọ ha rhe.
Uvuẹn iyẹnrẹn na “Mi Vwo Enọ Buebun re Kpokpi mẹ Ẹhẹn,” yono kpahen oborẹ ọhworhare owu rọ kparahasuẹ usuon oseghe, o ru mẹrẹn ẹkpahenrhọ harẹn enọ enẹyen.
“Baibol Na O Wene Akpenyerẹn” (Oghwa Odẹrẹ, January 1, 2012)
