UYONO 35

Oborẹ Ene Ru Brorhiẹn Ri Serhọ

KPORIE

Ọwan ephian e brorhiẹn. Buebun usuẹn orhienbro ọwan ina sabu hobọte ọwan ọrhẹ onyerẹnkugbe ọwan rhẹ i Jehova. Jerẹ udje, ana sabu brorhiẹn kpahen ekete re ne rhirhiẹ, oborẹ ene ru hẹrote oma ọwan, ji brorhiẹn sẹ ana rọnmọ yanghene a rọnmọ-ọ. Erhe brorhiẹn ri serhọ, ana mẹrẹn omamerhomẹ uvuẹn akpenyerẹn ọwan, jeghwai lẹrhẹ oma merhen i Jehova.

1. Marhẹ wu ne ru sabu ha i Baibol na brorhiẹn ri serhọ?

Ne wu ki brorhiẹn, nekpẹn userhumu i Jehova uvuẹn ẹrhomo, jeghwai yono i Baibol na, ne wu mẹrẹn ikẹro rọ ha ni erhirhiẹ na. (Se Proverbs 2:3-6.) Uvuẹn erhirhiẹ ezẹko, Jehova ọ yẹ ọwan akama rọ ghwai fiotọre. Omarana, orhienbro rọ mai serhọ wu ne bro, yẹ ọrẹ wu na huvwele yi.

Me wu ne ruo orhianẹ wa mẹrẹn akama i Baibol rọ ghwai fiotọre kpahen erhirhiẹ na-a? Jehova ọnọ ji ha userhumu wẹn ‘uvuẹn izede ro fori wu nyalele.’ (Isaiah 48:17) Izede ọgo? Iruemru-urhi buebun i havwiẹ ri na ha userhumu wẹn. Iruemru-urhi i Baibol yẹ irhomẹmro ri ha uvuẹn i Baibol na re dje iroro Osolobrugwẹ phia, ọrhẹ ukẹro rọ ha ni ekwakwa. Ọgbọ buebun, e yono oborẹ Osolobrugwẹ o ni erhirhiẹ ezẹko lele, ọke re se iyẹnrẹn rọ ha uvuẹn i Baibol na. Erhe rhe ukẹro ri Jehova ọ ha ni ekwakwa, ọwan ni na sabu brorhiẹn ri na lẹrhẹ oma merhiẹn.

2. Me wu ne roro kpahen vwẹre, ne wu ki brorhiẹn?

Baibol na ọrhọ ta: “Ọvwẹghwanren o roro kpahen udjoghwẹ owuowu.” (Proverbs 14:15) Ọnana o mevirhọ taghene bọmọke ene ki brorhiẹn, o fori na dabu kpọke roro kpahen odjẹ ọwan. Ọke we roro kpahen odjẹ owuowu, gba nọ oma: ‘Iruemru-urhi i Baibol ego yi sekpahen erhirhiẹ ọnana? Odjẹ ọgo yọ nọ lẹrhẹ ẹhẹn mẹ totọre? Marhẹ orhienbro mẹ ọnọ hobọte awọrọ lele? Ọrọ mai ghanren kparobọ yẹ, ọnọ lẹrhẹ oma merhen i Jehova?’—Deuteronomy 32:29.

Jehova o mwuovwan rọ nọ ta rẹn ọwan oborẹ orhomurun ọrhẹ oborẹ obiomurun. Arha dabu rhe irhi ọrhẹ iruemru-urhi enẹyen, jeghwai vwo omwemẹ ra na nyalele aye, ne ne vwo ẹhẹn obrorhiẹn rọ fonron. Ẹhẹn obrorhiẹn yọ ha userhumu rẹn ọwan rhe oborẹ orhomurun ọrhẹ oborẹ obiomurun. (Romans 2:14, 15) Erhe yono ẹhẹn obrorhiẹn ọwan, ọnọ ha userhumu rẹn ọwan brorhiẹn ri serhọ.

YONO KODO RHỌ

Yono oborẹ iruemru-urhi i Baibol ọrhẹ ẹhẹn obrorhiẹn ọwan e ru ha userhumu rẹn ọwan brorhiẹn ri serhọ.

3. Jenẹ i Baibol na o suon

Marhẹ iruemru-urhi i Baibol ine ru sabu sun ọwan ọke ra guọlọ brorhiẹn? Kporo IVIDIO na, orho ru, are i gba kpahenrhọ enọ enana.

IVIDIO: Jenẹ Iruemru-irhi i Baibol Suon (5:54)

Me yẹ ugbomọphẹ?
Mesoriẹ i Jehova ọ yẹ ọwan ugbomọphẹ?
Me yọ yẹrẹ ọwan rọ nọ ha userhumu rẹn ọwan brorhiẹn ri serhọ?

Ne wu sabu mẹrẹn udje iruemru-irhi i Baibol, se Ephesians 5:15, 16. Orho ru, are i gba ta kpahen oborẹ wu ne ru ‘dabu ha ọke ọnọ ruiruo’ nyoma we . . .

se i Baibol na ọke ephian.
rhiẹ omamọ esa yanghene ane, ọmiọmọ, ọmọ ọhworhare, yanghene ọgbọtọ.
riẹ iyono ukoko ọke ephian.

4. Yono ẹhẹn obrorhiẹn ọnọ, ne wu sabu brorhiẹn ri serhọ

Orhianẹ i Baibol na ọ dabu ta kpahen erhirhiẹ na fiotọre, nọ lọhọ re ne brorhiẹn ro serhọ ọkezẹko. Ọrẹn, orhianẹ i Baibol na o je akama kpahen erhirhiẹ na vwo? Kporo IVIDIO na, orho ru, are i gba kpahenrhọ onọ ọnana.

IVIDIO: “Sẹrorẹ Ẹhẹn Obrorhiẹn rọ Fonron” (5:13)

Uvuẹn ividio na, idjaghwẹ ego yẹ omizu ọmase na ọ kparare no yono ẹhẹn obrorhiẹn ọnẹyen, nọ sabu brorhiẹn rọ nọ lẹrhẹ oma merhen i Jehova?

Mesoriẹ o vwo fo na ta rẹn awọrọ nẹ aye i brorhiẹn ro fori ne bru? Se Hebrews 5:14, orho ru, are i gba kpahenrhọ enọ enana:

Dedevwo ọ lọhọre ra na ta rẹn awọrọ nẹ aye i brorhiẹn rẹn ọwan, me yo fori na mẹrẹnvwrurhe?
Ekwakwa ego yẹ ukoko na o tiobọnu wẹn, ri na sabu ha userhumu wẹn yono ẹhẹn obrorhiẹn ọnọ, jeghwai brorhiẹn ri serhọ?

Jerẹ imapu, ẹhẹn obrorhiẹn ọwan ọ ha userhumu rẹn ọwan brorhiẹn oborẹ ene nyerakpọ lele

5. Họghọ rẹn ẹhẹn obrorhiẹn awọrọ

Ihworho ephian e brorhiẹn izede rọ vẹnẹren. Marhẹ ọwan ine ru họghọ rẹn ẹhẹn obrorhiẹn awọrọ? Jene roro kpahen erhirhiẹ eva:

Erhirhiẹ ọrẹ 1: Omizu ọmase owu ro vwo ẹguọlọ kpahen ekwakwa ra ha sin ughwaro, no riẹ ukoko ọrọrọ rẹ imizu emẹse buebun e vwo utuoma kpahen ekwakwa ra ha sin ughwaro.

Se Romans 15:1 ọrhẹ 1 Corinthians 10:23, 24, orho ru, are i gba kpahenrhọ enọ enana:

Sekpahen eghwẹmro enana, orhienbro ọgo yẹ omizu ọmase na ono bro? Me wu ne ruo orhianẹ wu ha uvuẹn ekete rẹ ẹhẹn obrorhiẹn ohworho o kpokpie, fọkiẹ oborẹ ẹhẹn obrorhiẹn ọnọ o kwenu wẹn wu ru?

Erhirhiẹ ọrẹ 2: Omizu ọhworhare owu o rheri taghene i Baibol na ọ kparehaso enyo ro mwu ọwan ra da izede ro serhọ-ọ, ọrẹn, no brorhiẹn rọ nọ kẹnoma riẹn. Na ha use riẹn riẹ akpẹriọ rọ mẹrẹn imizu ehworhare ra da inyo re mwu ọwan.

Se Ecclesiastes 7:16 ọrhẹ Romans 14:1, 10, orho ru, are i gba kpahenrhọ enọ enana:

Sekpahen eghwẹmro enana, orhienbro ọgo yẹ omizu ọhworhare na ono bro? Me wu ne ruo orhianẹ wu mẹrẹn ọwọrọ ro ruẹ emru rẹ ẹhẹn obrorhiẹn ọnọ o vwo kwenu wẹn wu ru?

Idjaghwẹ ego yi na ha userhumu wẹn brorhiẹn ri serhọ?

1. Rẹ i Jehova nọ ha userhumu wẹn brorhiẹn oborẹ wu ne ruo.—James 1:5.

2. Tọn kodo uvuẹn i Baibol na ọrhẹ ẹbe ra bọn kpahen i Baibol na, ne wu mẹrẹn iruemru-irhi ri na ha userhumu wẹn. Wu na ji sabu nekpẹn userhumu mie imizu ri tedje uvuẹn ukoko na.

3. Roro kpahen oborẹ orhienbro na ono ru hobọte ẹhẹn obrorhiẹn ọnọ ọrhẹ ọrẹ awọrọ.

OBORẸ IHWORHO EZẸKO A TA: “Wu vwo omẹgbanhon wu ne ru oborẹ wu guọlọ ru ephian. Oborẹ awọrọ e roro kpahiẹn, o fiemru-u.”

Mesoriẹ o fo ne vwo ọdamẹ kpahen iroro Osolobrugwẹ ọrhẹ ọrẹ awọrọ?

ME WU YONORIN?

Ọwan e brorhiẹn ri serhọ arha tọn kodo kpahen ikẹro i Jehova ọ ha ni erhirhiẹ na, jeghwai roro sẹ idjaghwẹ ọwan ọnọ ha userhumu rẹn awọrọ, yanghene suẹ ẹkuọn rẹn aye.