Ihworho ephian i guọlọ igbehian ra ta urhomẹmro. Jehova ọ jeghwai guọlọ taghene igbehian yen i rha ta urhomẹmro. Ọrẹn, ọnana ọlọhọ-ọ, ra mẹriẹn taghene buebun ihworho uvuẹn akpọ na i vwa ta urhomẹmro-o. Erere ego ya mẹrẹn arha ta urhomẹmro ọrẹ i kemru kemru?

1. Me yẹ iroro rọ mai ghanren rẹ ọsoriẹ ana ta urhomẹmro?

Ọwan arha ta urhomẹmro rẹn awọrọ, ne dje rẹn i Jehova taghene e vwo ẹguọlọ kpahiẹn, a jeghwai huvwele yi. Roro kpahen ọnana: Jehova o rhe i kemru kemru rẹ ọwan e roro ọrhẹ oborẹ e ruẹ. (Hebrews 4:13) Ọ mẹrẹn ọwan ọke ra djẹ odjẹ ra na ta urhomẹmro, ọ jeghwai lẹrhẹ oma merhiẹn. Baibol na ọrhọ ta: “Jehova o vwo utuoma kpahen ọrọ mọrenfian, ọrẹn, o vwo onyerẹnkugbe rọ kpẹnkpẹnren rhẹ ohworho ọsoso.”—Proverbs 3:32.

2. Izede ezẹko ego ya na ta urhomẹmro uvuẹn akpenyerẹn ọwan kẹdẹkẹdẹ?

Jehova ọ guọlọre nẹ ọwan i rha “ta urhomẹmro rẹn owuowọnwan.” (Zechariah 8:16, 17) Me yẹ ọnana o mevirhọ? Sẹ ọwan a tẹmro rẹn ohworho ekrun ọwan, erẹ ọwan e lele wian, imizu ukoko na, yanghene era wian rẹn igọmẹti, o fo na mọrenfian rẹn aye, yanghene yẹ aye iyẹnrẹn ro no sun aye vru-u. Ihworho ra ta urhomẹmro i vwe so mie awọrọ, yanghene ruẹ ọghware-e. (Se Proverbs 24:28 ọrhẹ Ephesians 4:28.) Aye a jeghwai kwosa urhomu ephian. (Romans 13:5-7) Uvuẹn izede enana ọrhẹ erọrọ, ọwan “i guọlọ rha ta urhomẹmro ọrẹ i kemru kemru.”—Hebrews 13:18.

3. Erere ego ya na mẹrẹn arha ta urhomẹmro ọke ephian?

Erhe vwo uruemru ra ta urhomẹmro ọke ephian, ihworho ina rha hẹroso ọwan. Ne toroba ufuoma rọ ha uvuẹn ukoko na jerẹ ekrun ro vwo ẹguọlọ. Ne ji vwo ẹhẹn obrorhiẹn rọ fonron. Erhe vwo uruemru ra ta urhomẹmro, ana sabu ha ye “brọghọ rhẹ uyono Osolobrugwẹ ro rhiẹ Usimi ọwan,” ọnọ jeghwai lẹrhẹ ihworho vwo ẹhẹn rẹ aye ina ga i Jehova.—Titus 2:10.

 YONO KODO RHỌ

5. Rha ta urhomẹmro ọke ephian

 6. Uruemru ra ta urhomẹmro ọ yẹ ọwan erere

Ọkiukaro, ana sabu roro taghene uruemru ra ta urhomẹmro ọnọ sabu rhua ebẹnbẹn ezẹko vwe ọwan. Ọrẹn, orho ru, na na mẹrẹnvwrurhe taghene a djẹ odjẹ ro serhọ omamọ. Se Psalm 34:12-16, orho ru, are i gba kpahenrhọ onọ ọnana:

• Marhẹ uruemru ra ta urhomẹmro o ru lẹrhẹ akpenyerẹn ọnọ rhomẹrhọ?

1. Esa ọrhẹ ane ra ta urhomẹmro, a bọn orọnmo aye gbanhan

2. Ihworho ra ta urhomẹmro uvuẹn ekete rẹ aye a wian, onini aye ọ hẹroso aye

3. Ihworho ra ta urhomẹmro uvuẹn ẹkwotọre rẹ aye i havwọ, e vwe omamọ odẹ obaro ihworho ra wian rẹn igọmẹti

 ME WU YONORIN?

Jehova ọ guọlọre nẹ igbehian yen i rhiẹ ihworho ra ta urhomẹmro ọrẹ i kemru kemru.

Ẹzẹkoko

• Izede ezẹko ego ye wu ne ru sabu rha ta urhomẹmro?

• Mesoriẹ o vwo dje ọhọ phia ne roro taghene ana sabu ti urhomẹmro na nu?

• Mesoriẹ wa guọlọ rhiẹ ohworho rọ ta urhomẹmro ọke ephian?