UYONO 37
Oborẹ i Baibol na ọ Tare Kpahen Owian Ọrhẹ Igho
Wu vwo ọfiamu kpahen owian yanghene igho dẹ ne? Ọ bẹn rẹn ọwan ọkezẹko ra na hẹrote edamẹ ọwan, jeghwai ga i Jehova uvuẹn izede rọ guọlọre. Baibol na o tiobọnu obọdẹn urhebro rẹn ọwan ri na sabu ha userhumu rẹn ọwan.
1. Me yi Baibol na ọ tare kpahen owian?
Osolobrugwẹ ọ guọlọre nẹ ọwan i riamerhen owian ọwan. Baibol na ọ tare taghene “o vwo oborẹ orhomu ghwẹ ọrẹ onyakpọ ọnọ . . . mẹrẹn omamerhomẹ uvuẹn owian ọgbogbanhon ọnẹye-en.” (Ecclesiastes 2:24) Jehova ọ wian gbanhan omamọ. Ọwan arha hẹrokelie wian dẹndẹn, na lẹrhẹ oma merhiẹn, oma nọ jeghwai merhen ọwan.
Owian ọghanranren omamọ. Ọrẹn, o fo nẹ ọwan i lẹrhẹ owian ghanren rẹn ọwan ghwẹ ogame ra na harẹn i Jehova-a. (John 6:27) O ve rẹn ọwan taghene arha ha ogame ra hariẹn karo uvuẹn akpenyerẹn ọwan, ọnọ hẹrote edamẹ ọwan ephian.
2. Marhẹ ene ru ha ukẹro ro serhọ ovwan ni igho?
Dedevwo i Baibol na ọ tare taghene ‘igho ọ sẹrorẹ ọwan,’ ọ jeghwai yẹ ọwan orhetio taghene igho ọvo ọ sabu yẹ ọwan omamerhomẹ-ẹ. (Ecclesiastes 7:12) Omarana, e jiririe rẹn ọwan ne je vwo ẹguọlọ kpahen igho, ọrẹn, e vwo ‘ẹhẹn otemẹ kpahen ekwakwa re vwori.’ (Se Hebrews 13:5.) Erhe vwo ẹhẹn otemẹ kpahen oborẹ e vwori, e vwe rhe vwo ọfiamu fọkiẹ ẹhẹn re ne vwo bunrhọ-ọ. A vwa ji kpare esa ria-a. (Proverbs 22:7) Ọwan na ji kẹnoma rẹn imwofẹn rọ ha uvuẹn ibikoro efio, ọrhẹ ọra homaba ikoko ra lẹrhẹ ihworho vwo efe okpakpa.
3. Marhẹ ene ru sabu tiobọnu igho re vwori ghwologhwolo?
Jehova, Osolobrugwẹ ro tiobọnẹ ghwologhwolo, omarana, ọwan a hẹrokelie nyoma re ‘tiobọnẹ ghwologhwolo, jeghwai vwo omwemẹ ra na ghalẹ oborẹ e vwori.’ (1 Timothy 6:18) Ana sabu ha igho ọwan hobọtua ukoko na, jeghwai ha userhumu rẹn eri vwo ọdamẹ, maido erẹ ọwan rhẹ aye a gba ga kugbe. Orhiẹ uchunu oborẹ e tiobọnu yi Jehova o vwo ọdamẹ kpahe-en, ọrẹn, ẹhẹn re tiobọnie. Erhe tiobọnẹ ghwologhwolo nẹ ẹhẹn sa, oma nọ merhen ọwan, na jeghwai lẹrhẹ oma merhen i Jehova.—Se Acts 20:35.
YONO KODO RHỌ
Yono kpahen erere ra mẹrẹn erhe vwo ẹhẹn otemẹ, ji vwo omamọ uruemru kpahen owian.
4. Họghọ rẹn i Jehova nyoma izede wa wian lele
O fori nẹ onyerẹnkugbe ọwan rhẹ i Jehova, ọ hobọte ukẹro ọwan a ha ni owian. Kporo IVIDIO na, orho ru, are i gba kpahenrhọ enọ enana.
-
Uvuẹn ividio na, me yọ merhenruọn oma kpahen uruemru i Jason o djephia uvuẹn ekete rọ wian?
-
Me yo ruru, nọ sabu ha ukẹro ro serhọ ovwan ni owian?
Se Colossians 3:23, 24, orho ru, are i gba kpahenrhọ onọ ọnana:
-
Mesoriẹ uruemru ọwan e dje kpahen owian ọ ghanren?
Owian ọghanranren. Ọrẹn, ọwan i vwe jenẹ ọ ghanren rẹn ọwan ghwẹ ogame ra na harẹn i Jehova-a
5. Ẹhẹn otemẹ, ọ yẹ ọwan erere
Ihworho buebun a damoma koko igho buebun te ekete omẹgbanhon aye o teri. Ọrẹn, Baibol na ọ yẹrẹ ọwan urhebro rọ vẹnẹ ọrana. Se 1 Timothy 6:6-8, orho ru, are i gba kpahenrhọ onọ ọnana:
-
Me yi Baibol na o jiririe rẹn ọwan ne ru?
Oma ọnọ ji sabu merhen ọwan, ọrhọ tobọ rhianẹ e vwo bu-un. Kporo IVIDIO na, orho ru, are i gba kpahenrhọ onọ ọnana.
-
Me yọ lẹrhẹ oma merhen ekrun enana, dedevwo aye e vwo igho bu-un?
Erhe vwo bun, ọrẹn, a ji guọlọ vwo bunrhọ vwo? Jesu o dje imwofẹn na phia nyoma udje owu. Se Luke 12:15-21, orho ru, are i gba kpahenrhọ onọ ọnana:
-
Me wu yonorin nẹ udje i Jesu na?—Se oghwẹmro ọrẹ 15.
Se Proverbs 10:22, ne wu ha ye vwanvwọn 1 Timothy 6:10. Orho ru, are i gba kpahenrhọ enọ enana:
-
Ọgo wu rorori taghene ọyọ mai ghanren? Ne vwo onyerẹnkugbe rhẹ i Jehova, gbinẹ ne vwo igho buebun? Mesoriẹ?
-
Ebẹnbẹn ego ya mẹrẹn arha hatua igho?
6. Jehova ọnọ hẹrote edamẹ ọwan
Ebẹnbẹn owian ọrhẹ igho, ọnọ sabu damu esegburhomẹmro ọwan i vwori kpahen i Jehova. Kporo IVIDIO na, ne wu mẹrẹn oborẹ ọwan ina sabu ru, arha dẹrughwaroghwu edamuni enana, orho ru, are i gba kpahenrhọ enọ enana.
-
Uvuẹn ividio na, ebẹnbẹn ego yẹ omizu ọhworhare na ọ dẹrughwaroghwu?
-
Me yo ruru nọ sabu fi ebẹnbẹn na kparobọ?
Se Matthew 6:25-34, orho ru, are i gba kpahenrhọ onọ ọnana:
-
Me yi Jehova o veri rẹn ihworho ri hariẹ karo uvuẹn akpenyerẹn aye?
OBORẸ IHWORHO EZẸKO A TA: “Mi na vi wian gbanhon ni mi sabu hẹrote ekrun mẹ. Omarana, mi sabu riẹ uyono ukoko kọkprughwre kọkprughwre-e.”
-
Ekete i Baibol ọgo yọ lẹrheriẹ mwuẹro taghene na ha ogame i Jehova karo, yẹ orhienbro rọ mai serhọ?
ME WU YONORIN?
Owian ọrhẹ igho i ghanranren, ọrẹn, o fo nẹ aye i rhiẹ ukọ rẹn ogame ọwan a harẹn i Jehova-a.
Ẹzẹkoko
-
Me yọ nọ ha userhumu wẹn sabu ha ukẹro ro serhọ ovwan ni owian?
-
Marhẹ wu ne ru sabu mẹrẹn erere wu rhe vwo ẹhẹn otemẹ?
-
Marhẹ wu ne ru sabu hẹroso ive i Jehova taghene ọnọ hẹrote edamẹ ihworho yi?
GUỌLỌ IYẸNRẸN ERỌRỌ
Guọlọ otọriẹ sẹ i Baibol na ọ tare taghene igho obiomurun.
“Igho yẹ Esiri Ekwakwa Ọkon Ephian?” (Urhomu-ẹmro rọ ha uvuẹn itanẹti)
Yono oborẹ wu na ha igho ruiruo lele izede rọ nọ lẹrhẹ oma merhen Osolobrugwẹ.
“Me yi Baibol na ọ ta Kpahen Uruemru re Tiobọnẹ?” (Urhomu-ẹmro rọ ha uvuẹn itanẹti)
Imwofẹn ọ havwiẹ erhe fi ibikoro?
Se kpahen oborẹ ọ lẹrhẹ ọhworhare owu dobọ ibikoro efio ọrhẹ uhieso ji.
“Mi Vwo Omamerhomẹ Kpahen Esi Ẹghwa Uvuẹn Iruẹn” (Oghwa Odẹrẹ, November 1, 2011)
