UYONO 38
Dje Ọdaremẹro Phia Kpahen Ẹghẹlẹ Ọrẹ Arhọ
O vwo ekwakwa buebun rẹ ọwan ina sabu ru, ji riamerhiẹn fọkime e nyerẹn. Arha tobọ dẹrughwaroghwu ebẹnbẹn dede, ọwan a ji riamerhen akpọ ọkezẹko. Marhẹ ọwan ine ru djephia taghene e vwo ọdaremẹro kpahen ẹghẹlẹ ọrẹ arhọ? Me yẹ iroro rọ mai ghanren rọ nọ lẹrhẹ ọwan dje ọdaremẹro ọrana phia?
1. Mesoriẹ o fo nẹ ọwan i dje ọdaremẹro phia kpahen arhọ?
O fori ne dje ọdaremẹro phia kpahen arhọ fọkime, ọnana ẹghẹlẹ rẹ Ọsẹ ọwan Jehova ro vwo ẹguọlọ, o tiobọnu rẹn ọwan. Ọye yẹ “esiri arhọ,” nọyẹ, ọye yọ ma arhọ ephian. (Psalm 36:9) “Ọye yọ yẹ ihworho ephian arhọ ọrhẹ ẹhẹn kugbe ekwakwa ephian.” (Acts 17:25, 28) Jehova ọ yẹ ọwan oborẹ a guọlọre ọke ephian na sabu nyerẹn. Ọrẹn, habaye, ọ sẹrorẹ arhọ ọwan neneyo a sabu riamerhen akpenyerẹn.—Se Acts 14:17.
2. Marhẹ ọwan ine ru djephia rẹn i Jehova taghene e vwo ọdaremẹro kpahen ẹghẹlẹ ọrẹ arhọ?
Jehova ọ hẹroto ghwai nẹ ọke wa ha uvuẹn oghwuvwiẹ. David ro rhiẹ owuọwan usuẹn era ga Osolobrugwẹ, nọ ta riẹn uvuẹn ẹrhomo: “Ikẹro enọ i mẹrẹn ọtonrhọ mẹ.” (Psalm 139:16) Arhọ ọnọ ọghanranren omamọ rẹn i Jehova. (Se Matthew 10:29-31.) Ọ miamiẹ omamọ orhianẹ ohworho ọ ha arudo kpe ọwọrọ, yanghene omayen dede. a (Exodus 20:13) Ọnọ jeghwai da i Jehova omamọ orhianẹ ọwan i ha arudo fi arhọ ọwan rhẹ erhirhiẹ imwofẹn, yanghene a kpare idjaghwẹ ra na sẹrorẹ arhọ awọrọ-ọ. Arha hẹrote arhọ ọwan ji mwuọghọ rẹn arhọ awọrọ, ne djephia taghene e vwo ọdaremẹro kpahen ẹghẹlẹ ọrẹ arhọ.
YONO KODO RHỌ
Yono kpahen izede ezẹko wu ne ru dje ọdaremẹro phia kpahen ẹghẹlẹ ọrẹ arhọ.
3. Hẹrote omọkpokpọ ọnọ
Ilele Kristi ri homakpahontọre rẹn i Jehova ne, a ga ye rhẹ ọsoso akpenyerẹn aye. Nọ họhọre taghene aye a ha oma aye ze izobo rẹn Osolobrugwẹ. Se Romans 12:1, 2, orho ru, are i gba kpahenrhọ enọ enana:
-
Me yo no mwuo hẹrote omọkpokpọ ọnọ?
-
Izede ego ye wu ne ru sabu ru tomaran?
4. Jomarhotọre ọrẹ i kemru kemru, ne wu ja rha suẹ ẹkuọn yanghene uhwu
Baibol na o jiririe rẹn ọwan na kẹnoma rẹn irueruo re mwuofẹn. Kporo IVIDIO na ne wu yono ekwakwa ezẹko wu ne ruo, ne wu sabu sẹrorẹ oma.
Se Proverbs 22:3, orho ru, are i gba ta kpahen oborẹ owẹwẹ rhẹ awọrọ ine ru sabu ru dẹndẹn . . .
-
uvuẹn oghwa ọnọ.
-
uvuẹn ekete we ruiruo.
-
ọke we ruiruẹn.
-
ọke wa ghwa idjighere, imoto yanghene imotosaiko.
5. Wu vwa suẹ ẹkuọn rẹn ọmọ rọ ha uvuẹn oghwuvwiẹ-ẹ
David ọ dabu dje kpahen ọdamẹ ri Jehova o vwo kpahen i kemru kemru rọ phia rẹn ọmọ rọ ha uvuẹn oghwuvwiẹ. Se Psalm 139:13-17, orho ru, are i gba kpahenrhọ onọ ọnana:
-
Uvuẹn ukẹro i Jehova, arhọ ohworho ọ tonrhọ ọke izie ọ mẹrenvwan yen, gbinẹ ọke re vwiẹ ye?
Irhi ri Jehova o tiobọnu rẹn emọ Israel ọke ahwanren, ọ sẹrorẹ arhọ izu ọrhẹ emọ ri ha uvuẹn oghwuvwiẹ aye. Se Exodus 21:22, 23, orho ru, are i gba kpahenrhọ enọ enana:
-
Ukẹro ọgo yi Jehova ọ ha ni ohworho rọ vwọ ha arudo kpe ọmọ rọ ha uvuẹn oghwuvwiẹ?
-
Marhẹ oma o ruie kpahen ohworho rọ ha arudo kpe ọmọ rọ ha uvuẹn oghwuvwiẹ? b
-
Marhẹ oma o ruo kpahen ukẹro Osolobrugwẹ ọ ha nie?
Ọmase rọ tobọ vwo ọdaremẹro kpahen ọghanronmẹ arhọ, ọnọ sabu roro taghene evwan ẹkpanren ọvo yọ nọ sabu ha userhumu riẹn uvuẹn erhirhiẹ ezẹko. Se Isaiah 41:10, orho ru, are i gba kpahenrhọ enọ enana:
-
Orhianẹ ọmase ọ dẹrughwaroghwu ọhiẹn rọ nọ kpanrenvwan, ọrọmo yo fori nọ guọlọ userhumu mie? Mesoriẹ?
OBORẸ IHWORHO EZẸKO A TA: “Ọmase o vwo omẹgbanhon rọ nọ djẹ odjẹ sẹ ọnọ kpanrenvwan, fọkime ọye yo vwo omayen.”
-
Me yọ lẹrheriẹ mwuo ẹro taghene i Jehova, o ni arhọ izu ọrhẹ ọmọ rọ ha uvuẹn oghwuvwiẹ ghanghanren?
ME WU YONORIN?
Baibol na o yonirin ọwan taghene e vwo ẹguọlọ kpahen ẹghẹlẹ arhọ ri Jehova o tiobọnu rẹn ọwan, a họghọ riẹn, jeghwai sẹroriẹ. Ọnana o sekpahen arhọ ọwan ọrhẹ arhọ awọrọ.
Ẹzẹkoko
-
Mesoriẹ arhọ onyakpọ ọ ghanren rẹn i Jehova?
-
Marhẹ oma o ruẹ i Jehova kpahen ohworho rọ ha arudo kpe ohworho ọrọrọ?
-
Mesoriẹ we vwo ọdaremẹro kpahen ẹghẹlẹ ọrẹ arhọ?
GUỌLỌ IYẸNRẸN ERỌRỌ
Marhẹ ọwan ine ru kpẹmẹ i Jehova fọkiẹ ẹghẹlẹ ọrẹ arhọ?
Guọlọ ẹkpahenrhọ rẹn onọ na, Osolobrugwẹ ọnọ sabu harhomu ọmase rọ kpanrenvwan vrẹn ne?
“Me yi Baibol na ọ ta Kpahen Evwan Ẹkparen?” (Urhomu-ẹmro rọ ha uvuẹn itanẹti)
Yono oborẹ ukẹro rẹ Osolobrugwẹ ọ ha ni arhọ, ono ru hobọte odjẹ ọwan kpahen iruẹn.
“‘Iruẹn Gbalogbalo’—O Fori ne wu Fiomarhọ Aye?” (Awake!, October 8, 2000)
Ohworho orho vwo ẹhẹn ro no kpe omayen vwo? Yono kpahen oborẹ i Baibol na ono ru sabu ha userhumu phia.
a Jehova o vwo ọdamẹ okokodo kpahen ihworho rẹ ẹhẹn aye o seriotọre. (Psalm 34:18) Ọye o vwẹruọ omiamiamo rọ nọ sabu lẹrhẹ ohworho vwo ẹhẹn ro no kpe omayen, ọ jeghwai guọlọ ha userhumu phia. Ne wu sabu mẹrẹn oborẹ ono ru ha userhumu rẹn ohworho fi iroro ọnana kparobọ, se urhomu-ẹmro na “Mi Guọlọ Hwu—Baibol na Ọnọ Sabu ha Userhumu mẹ mi Rhe Vwo Iroro mi ne Kpe Omamẹ?” rọ ha uvuẹn oghọn na Guọlọ Iyẹnrẹn Erọrọ uvuẹn uyono ọnana.
b O fo nẹ ẹhẹn o kpokpo ihworho ri kpanrenvwan vrẹn ne-e, fọkime Jehova ọnọ sabu harhomu aye. Ne wu sabu mẹrẹn iyẹnrẹn erọrọ, se urhomu-ẹmro na “Me yi Baibol na ọ ta Kpahen Evwan Ẹkpanren?” rọ ha uvuẹn oghọn na Guọlọ Iyẹnrẹn Erọrọ uvuẹn uyono ọnana.
