UYONO 42
Me Yi Baibol na ọ Tare Kpahen Erhirhiẹ Kologho Ọrhẹ Orọnmo?
Uvuẹn ẹkwotọre ezẹko, ihworho i vwo imwẹro na taghene ohworho ọrhọ rọnmọ-ọ, oma ọ sabu merhiẹ-ẹn. Ọrẹn, orhiẹ ihworho ephian ri rọnmọ ne yẹ oma ọ merha-an, habaye, oma ọ ji merhen buebun ihworho ri havwiẹ kologho. Baibol na ọ tare taghene erhirhiẹ kologho ọrhẹ orọnmo, obọdẹn ẹghẹlẹ ri nẹ obẹ i Jehova rhe.
1. Erere ezẹko ego yẹ erhirhiẹ kologho ọ rhua sa?
Baibol na ọrhọ ta: “Kohworho kohworho rọ rọnmọren o ru rhomu, ọrẹn, kohworho kohworho rọ vwọ rọnmọ, yọ nọ mai ru rhomurhọ.” (Se 1 Corinthians 7:32, 33, 38.) Izede ego yẹ ohworho rọ havwiẹ kologho ono ru “ru rhomurhọ”? Ilele Kristi ri havwiẹ kologho, e vwo ohworho aye i rọnmọ ne rẹ aye ina hẹrote-e. Itiọrurhomẹmro, aye i vwo ugbomọphẹ omamọ. Jerẹ udje, ezẹko a sabu kerabọ owian Uvie na izede sansan, jerẹ ọrẹ aye e riẹ ẹkwotọre ọrọrọ ye ghwoghwo iyẹnrẹn esiri na. Haba ọrana, aye a dabu ghwọghọ ọke tiẹkẹrẹ i Jehova rhọ.
2. Erere ezẹko ego ya na mẹrẹn, arha rọnmọ lele urhi?
Orọnmo, jerẹ erhirhiẹ kologho, o vwo erere oghẹnrensan. Baibol na ọ tare taghene “awanva i rhomu ghwẹ owuọwan.” (Ecclesiastes 4:9) Ọrana urhomẹmro sekpahen Ilele Kristi ra nyalele iruemru-urhi i Baibol uvuẹn orọnmo aye. Eri rọnmọren lele urhi, i veri taghene aye ine dje ẹguọlọ ọrhẹ ọghọ harẹn owuowọnwan, ji ni omoma aye ghanghanren. Ive ọrana, ọ lẹrhẹ aye vwo omefuon ghwẹ ọhworhare ọrhẹ ọmase re nyerẹnkugbe, ọrẹn, aye a ji rọnmọ-ọ. Habaye, emọ aye e ji vwo obọdẹn omefuon.
3. Ukẹro ọgo yi Jehova ọ ha ni orọnmo?
Ọke i Jehova ọ ha orọnmo ọrukaro na mwu, nọ tare: “ọhworhare ọnọ nyajẹ ọsẹ ye ọrhẹ izie vwo, no no tigban aniẹ.” (Genesis 2:24) Jehova ọ guọlọre nẹ esa ọrhẹ ane i vwo ẹguọlọ kpahen omoma aye, tigban owuowọnwan, ji nyerẹnkugbe. O kwenu rẹn orọnmo ẹfan, orhianẹ owuọwan usuẹn aye ọ ghwọwe. Uvuẹn erhirhiẹ ọrana, Jehova o kwenu rẹn ọra ghwọwe rhurhu na no brorhiẹn sẹ ọnọ fonrọnmo na yanghene ọ fan ye-e. a (Matthew 19:9) Jehova o kwenu rẹn Ilele Kristi nẹ aye i rọnmọ ihworho awanva-a.—1 Timothy 3:2.
YONO KODO RHỌ
Yono oborẹ oma ono ru merhuọn, ọrhẹ oborẹ wu ne ru lẹrhẹ oma merhen i Jehova, sẹ wu rọnmọ ne yanghene wa ji rọnmọ-ọ.
4. Ha ẹghẹlẹ erhirhiẹ kologho wu havwọ ruiruo izede ro serhọ
Jesu o ni erhirhiẹ kologho jerẹ ẹghẹlẹ. (Matthew 19:11, 12) Se Matthew 4:23, orho ru, are i gba kpahenrhọ onọ ọnana:
-
Marhẹ i Jesu ọ ha ẹghẹlẹ erhirhiẹ kologho ọnẹyen ga Ọsẹ ye, jeghwai ha userhumu rẹn awọrọ lele?
Ilele Kristi ina sabu riamerhen ẹghẹlẹ erhirhiẹ kologho aye jerẹ oborẹ i Jesu o ruru. Kporo IVIDIO na, orho ru, are i gba kpahenrhọ onọ ọnana.
-
Marhẹ Ilele Kristi ina ha erhirhiẹ kologho aye ruiruo lele nẹ aye i sabu mẹrẹn erere?
Wu rheri?
Baibol na ọ hunute ẹgbukpe ohworho ono te vwẹre nọ ki rọnmọ-ọ. Ọrẹn, o jiririe rẹn iphuphẹn nẹ aye i “vrẹn ọke oruru ehware uphuphẹn” vwẹre, fọkime, ọnana ọke rẹ oruru ehware ọ gbanhan, rọ lẹrhiẹ bẹn rẹn uphuphẹn nọ sabu brorhiẹn ro serhọ.—1 Corinthians 7:36.
5. Ha ẹghwanren djẹ ohworho wu na rọnmọ
Owu usuẹn orhienbro eghoghanren wu ne bro, yẹ ọrẹ wu na djẹ ohworho wu na rọnmọ. Se Matthew 19:4-6, 9, orho ru, are i gba kpahenrhọ onọ ọnana:
-
Mesoriẹ o vwo fo nẹ Olele Kristi o brokpakpa rọnmọ?
Baibol na ọnọ sabu ha userhumu wẹn rhe omamọ iruemru wu na guọlọ uvuẹn oma ohworho wu na rọnmọ. Ọrọ mai ghanren yẹ, guọlọ ohworho ro vwo ẹguọlọ kpahen i Jehova. b Se 1 Corinthians 7:39 ọrhẹ 2 Corinthians 6:14. Orho ru, are i gba kpahenrhọ enọ enana:
-
Mesoriẹ o fo na rọnmọ Olele Kristi urhomẹmro ọvo?
-
Marhẹ wu rorori taghene oma ono ru i Jehova, arha rọnmọ ohworho ro vwo vwo ẹguọlọ kpahiẹn?
Arha gba eranmo eva ri havwọ san kugbe, aye ina rioja. Omaran ọ ji havwọ, Olele Kristi rọ rọnmọ ohworho rọ vwọ ga i Jehova, ono vwo ebẹnbẹn buebun
6. Ni orọnmo jerẹ oborẹ i Jehova o nie
Uvuẹn Israel ọke ahwanren, ehworhare ezẹko i fonrọnmo aye fọkiẹ erere omobọ aye. Se Malachi 2:13, 14, 16, orho ru, are i gba kpahenrhọ onọ ọnana:
-
Mesoriẹ i Jehova o vwo utuoma kpahen uruemru ra fonrọnmo izede rọ kparehaso i Baibol na?
Ọwiẹghwọ ọrhẹ orọnmo ẹfan a suẹ omiamiamo rẹn ọrẹ a ghwọwe rhurhu na, omaran ji te emọ na
Kporo IVIDIO na, orho ru, are i gba kpahenrhọ onọ ọnana.
-
Orhianẹ ohworho wu rọnmọren o vwo ẹguọlọ kpahen i Jehova-a, me wu na sabu ru nẹ orọnmo ọnọ o vwo omamerhomẹ?
7. Ha evwan i Jehova kpahen orọnmo ruiruo
A guọlọ omẹdamu na sabu ha evwan i Jehova kpahen orọnmo ruiruo. c Ọrẹn, Jehova ọ ha ebrurhọ rẹn ihworho ra sabu ruie. Kporo IVIDIO na.
Se Hebrews 13:4, orho ru, are i gba kpahenrhọ enọ enana:
-
Wu rorori taghene evwan i Jehova kpahen orọnmo o dje ọhọ phia? Me wu rorori? Mesoriẹ?
Jehova ọ guọlọre nẹ Ilele Kristi i ruẹ orọnmo yanghene orọnmo ẹfan aye lele urhi, sekpahen urhi rẹ igọmẹti ẹkwotọre aye o kwerhọ. Se Titus 3:1, orho ru, are i gba kpahenrhọ onọ ọnana:
-
Orhianẹ wu rọnmọ ne, o mwuruon ẹro taghene wu ruẹ orọnmo na lele urhi igọmẹti?
OHWORHO ỌNỌ SABU NỌ: “Mesoriẹ o fo ne ruẹ orọnmo lele urhi? Ọhworhare ọrhẹ ọmase i sabu ghwai nyerẹnkugbe?”
-
Marhẹ wu na kpahenrhọ ye lele?
ME WU YONORIN?
Erhirhiẹ kologho ọrhẹ orọnmo, ẹghẹlẹ ri nẹ obẹ i Jehova rhe. Eva na a yẹ ọwan aghọghọ ọrhẹ evwẹnvuọn, erhe ru lele ọhọre i Jehova.
Ẹzẹkoko
-
Marhẹ ohworho ono ru sabu ha erhirhiẹ kologho ọnẹyen ruiruo izede ro serhọ?
-
Mesoriẹ i Baibol na ọ ta taghene a rọnmọ Olele Kristi urhomẹmro ọvo?
-
Iroro ọgo yi Baibol na o kwerhọ kpahen orọnmo ẹfan?
GUỌLỌ IYẸNRẸN ERỌRỌ
Me yo mevirhọ ra na rọnmọ “uvuẹn Ọrovwori na ọvo”?
“Enọ Rẹ Otu Re Se Ẹbe Ọwan i Nọren” (Oghwa Odẹrẹ, July 1, 2004)
Ni iruẹn-udje eva ri na ha userhumu wẹn brorhiẹn ri serhọ kpahen ọke ra kọnrhọ ohworho ọrhẹ orọnmo.
Yono oborẹ ọsoriẹ omizu ọhworhare owu o roro taghene i Jehova ọ yẹriẹ bunrhọ ghwẹ oborẹ ọ kpare fughwẹ.
Ekwakwa ego yẹ ohworho ono roro kpahen vwẹre no ki brorhiẹn orọnmo ẹfan yanghene ẹhẹriẹ?
“Họghọ rẹn Oborẹ Osolobrugwẹ ‘ọ tan Kugbe ne’” (Oghwa Odẹrẹ, December 2018)
a Se Iyẹnrẹn ra habaye ọrẹ 4 kpahen ẹhẹriẹ, orhianẹ owuọwan uvuẹn orọnmo na ọ ghwọwe-e.
b Uvuẹn ẹkwotọre ezẹko, emiemọ ya djẹ ohworho rẹ ọmọ aye ọnọ rọnmọ. Orho rhiomaran uvuẹn okogho ọnọ, o fori nẹ emiemọ ri vwo ẹguọlọ i kiki ni ọrẹ aye a guọlọ djẹ rẹn ọmọ aye na, sẹ o vwo ẹguọlọ kpahen i Jehova, ukperẹ aye ine roro kpahen igho ro vwori, yanghene ẹrhẹ rọ havwọ.
c We rhe rhirhiẹ rhẹ ohworho wu vwa ji rọnmọ, wẹwẹ yi ne brorhiẹn na sẹ wu na rọnmọ ọravwọ yanghene wu na nyajevwo.
