UYONO 47

Wu Mwuegbe wu ne Bromarhame ne?

KPORIE

Wu yono ekwakwa buebun kpahen i Jehova nyoma uyono i Baibol ọnọ ne. Ọkezẹko, wu ru ewene buebun ne, ne wu sabu ha oborẹ wu yonorin ruiruo. Ọrẹn, ọnọ sabu vwo oborẹ ọ lẹrhuọ tiẹrierhumu wu na homakpahontọre rẹn i Jehova, jeghwai bromarhame. Uyono ọnana ọnọ ta kpahen egbanrhọ ezẹko ri na sabu lẹrhiẹ bẹn ha wẹn wu ne bromarhame, ọrhẹ oborẹ wu ne ru fi aye kparobọ.

1. Marhẹ irherhe ọnọ ono kodo te, wu ki bromarhame?

Ne wu ki bromarhame, wu ne vi vwo “irherhe ọgbagba ọrẹ urhomẹmro na” vwẹre. (1 Timothy 2:4) Ọnana o mevirhọ taghene wu ne vi rhe ọsoso ẹkpahenrhọ harẹn enọ rẹ ihworho ina sabu nọ kpahen i Baibol na, wu ki bromarhame-e. Ilele Kristi ri bromarhame ẹgbukpe buebun ne dede, e ji yono. (Colossians 1:9, 10) Ọrẹn, wu ne vi yono kpahen iyono kirighwo ri ha uvuẹn i Baibol na vwẹre. Ekpako uvuẹn ukoko wu havwọ ina ha userhumu wẹn mẹrẹnvwrurhe sẹ irherhe ọnọ o kodo te ne.

2. Idjaghwẹ ego ye wu na vi kpare ne wu ki bromarhame?

Ne wu ki bromarhame, wu na vi “ghwẹriẹ . . . jeghwai wene akpenyerẹn” ọnọ vwẹre. (Se Acts 3:19.) Ọnana o mevirhọ taghene edandan wu ruru, i daruọ omamọ, ne wu na ji rẹ i Jehova nọ harhomuo. Wu ne ji vwo omwemẹ wu na ten iruemru esọsọ, jeghwai nyerakpọ lele izede rọ nọ merhen Osolobrugwẹ oma. Habaye, wu ne ji rhe riẹ uyono, ji vwobọrhọ owian aghwoghwo na, ru we rhiẹ oghwoghwẹmro ro vwo ji bromarhame ne na.

3. Mesoriẹ ovwo fo ne wu tirierhumu fọkiẹ ofẹn?

Ihworho ezẹko a zofẹn taghene aye i sabu ru oborẹ aye i ve rẹn i Jehova-a. Itiọrurhomẹmro, wu na sabu ru sọ ọkezẹko, jerẹ oborẹ ehworhare ọrhẹ emẹse ri fuevwan ra hunute uvuẹn i Baibol na i ji ru. Ọrẹn, Jehova ọ dabu rhe taghene idibo yi a gba-a. (Se Psalm 103:13, 14.) Oma ọ merhiẹn we rhe ru ekete omẹgbanhuọn o teri! Ọye ọnọ ha userhumu wẹn. Itiọrurhomẹmro, Jehova ọ yẹrẹ ọwan imwẹro taghene ovwo emru owuorowu rọ nọ “sabu hẹriẹ ọwan nẹ ẹguọlọ [ọnẹye-en].”—Se Romans 8:38, 39.

YONO KODO RHỌ

Se kpahen oborẹ wu ne ru fi egbanrhọ ri na sabu lẹrhuọ je bromarhame kparobọ, nyoma wu ne rhe i Jehova rhọ, jeghwai rhiabọ dede userhumu ọnẹyen.

4. Rhe i Jehova rhọ

Marhẹ wu ne vi rhe i Jehova te, ne wu ki bromarhame? Wu ne vi rhe yi te erhirhiẹ wu ne vwo ẹguọlọ kpahiẹn, jeghwai vwo omwemẹ wu na lẹrhẹ oma merhiẹn. Kporo IVIDIO na, ne wu mẹrẹn oborẹ emọ uyono i Baibol uvuẹn akpọ na ephian i ru sabu ruie. Orho ru, are i gba kpahenrhọ onọ ọnana.

IVIDIO: Izede ro Lele Fiẹ Omebrurhame (3:56)

Uvuẹn ividio na, me yọ ha userhumu rẹn ihworho na owuowu mwuegbe rẹ aye ine bromarhame?

Se Romans 12:2, orho ru, are i gba kpahenrhọ enọ enana:

Wu vwo ẹhẹn eveva kpahen oborẹ we yono uvuẹn i Baibol na, yanghene sẹ Iseri Jehova e yono urhomẹmro na?
Orho rhiomaran, me wu na sabu ru kpahiẹn?

5. Fi egbanrhọ ri na sabu lẹrhuọ je bromarhame kparobọ

Ọwan i rha djẹ odjẹ ra na homakpahontọre rẹn i Jehova, jeghwai bromarhame ne, na dẹrughwaroghwẹ ebẹnbẹn. Ne wu sabu mẹrẹn udje ọnana, kporo IVIDIO na, orho ru, are i gba kpahenrhọ enọ enana.

IVIDIO: Ẹguọlọ ro Vwo Kpahen i Jehova ọ Lẹrheriẹ Fiẹ Ebẹnbẹn Kparobọ (5:22)

Uvuẹn ividio na, egbanrhọ ego yi Narangerel o fikparobọ neneyo ọ sabu ga i Jehova?
Marhẹ ẹguọlọ ro vwo kpahen i Jehova o ru ha userhumu riẹn fi egbanrhọ na kparobọ?

Se Proverbs 29:25 ọrhẹ 2 Timothy 1:7, orho ru, are i gba kpahenrhọ onọ ọnana:

Me yọ yẹ ọwan uduefigbere fi egbanrhọ kparobọ?

6. Hẹroso userhumu i Jehova

Jehova ọnọ ha userhumu wẹn ne wu sabu lẹrhẹ oma merhiẹn. Kporo IVIDIO na, orho ru, are i gba kpahenrhọ enọ enana.

IVIDIO: Jehova Osolobrugwẹ Ọnọ Ha Userhumu Wẹn (2:50)

Uvuẹn ividio na, me yẹ ọsoriẹ ọmọ uyono i Baibol na o tirierhumu no jo rho bromarhame?
Me yo yonorin, rọ ha userhumu riẹn bọn ẹruẹhaso ọnẹyen kpahen i Jehova gbanhonrhọ?

Se Isaiah 41:10, 13, orho ru, are i gba kpahenrhọ onọ ọnana:

Mesoriẹ ono mwuo ẹro taghene wu na sabu ha ive wu veri ọke wa homakpahontọre te orugba?

7. Ru ọdaremẹro wu vwo kpahen ẹguọlọ i Jehova gbanhonrhọ

We rhe roro kpahen oborẹ i Jehova o vwo ẹguọlọ kpahuọn te, no no rho mwuo kpẹmiẹ ọke ephian, ne wu ne ji vwo omwemẹ wu na ga ye bẹmẹdẹ. Se Psalm 40:5, orho ru, are i gba kpahenrhọ onọ ọnana:

Usuẹn ebrurhọ ri Jehova ọ yẹruọ ne, ego wa mai dje ọdaremẹro kpahan?

Ọmẹraro Jeremiah o vwo ẹguọlọ kpahen i Jehova ọrhẹ ẹmro ọnẹyen, ọ jeghwai dje ọdaremẹro kpahen odẹ i Jehova rẹ ọye ọ ha nya. Nọ tare: “Ẹmro ọnọ no mo rhiẹ omamerhomẹ ha mẹ, nọ jeghwai lẹrhẹ ọmudu mẹ vwo aghọghọ, fọkime, a ha odẹ ọnọ se mẹ, O Jehova Osolobrugwẹ.” (Jeremiah 15:16) Kpahenrhọ enọ enana: