UYONO 50
Marhẹ Ekrun Ọnọ Ono ru Vwo Omamerhomẹ?—Obọrẹ 2
Emọ ẹghẹlẹ ro nẹ obẹ i Jehova rhe. O fiẹrorhọ taghene emiemọ ina dabu hẹrote emọ na. Jehova ọ yẹ emiemọ urhebro rọ vuọnren rhẹ ẹghwanren, ri na ha userhumu rẹn aye ru te omaran. Urhebro yi ọnọ ji dabu ha userhumu rẹn emọ toroba omamerhomẹ uvuẹn ekrun aye.
1. Urhebro ọgo yi Jehova o tiobọnu rẹn emiemọ?
Jehova ọ guọlọre nẹ emiemọ i vwo ẹguọlọ kpahen emọ aye, ji dabu lele aye ghwọghọ ọke kugbe. Ọ ji guọlọ nẹ emiemọ i sẹrorẹ emọ aye nẹ imwofẹn, jeghwai ha iruemru-urhi i Baibol ruẹ esiri uyono rẹ aye ina yẹ emọ na. (Proverbs 1:8) Ọye ọ ta rẹn esẹ taghene: “Are i rha mọrọn [emọ are] lele . . . uyono kugbe ọkpọvi i Jehova.” (Se Ephesians 6:4.) Oma ọ merhen i Jehova orhianẹ emiemọ i nyalele ọkpọvi ọnẹyen ọke aye a mọrọn emọ aye, ukperẹ aye ina ha owian na rẹn ọwọrọ.
2. Urhebro ọgo yi Jehova o tiobọnu rẹn emọ?
Jehova o jurhi rẹn emọ: “Are i huvwele esẹ ọrhẹ izu are.” (Se Colossians 3:20.) Emọ arha huvwele eri vwiẹrẹ aye, aye na lẹrhẹ oma merhen i Jehova ọrhẹ eri vwiẹrẹ aye. (Proverbs 23:22-25) Jesu o dje omamọ udje rhotọre ọke ro rhiẹ ọmọvwerhe. Dedevwo ọye ohworho rọ gbare, ọ huvwele eri vwiẹriẹ, ji mwuọghọ rẹn aye.—Luke 2:51, 52.
3. Marhẹ ekrun ọnọ ono ru sabu tikẹrẹ Osolobrugwẹ?
Wu rhe rhiẹ ọmiọmọ, o vwo ẹfro-o, wu guọlọre nẹ emọ i hẹrokeluo vwo ẹguọlọ kpahen i Jehova. Marhẹ wu ne ru sabu ru ọnana? Nyoma we ruẹ oborẹ i Baibol na ọ tare: “Are i vi haye yono emọ are [nọyẹ, ẹmro i Jehova] jeghwai ta ye harẹn aye ọke rẹ are e siyẹ uvuẹn oghwa are, ọrhẹ ọke are a nya uvuẹn izede.” (Deuteronomy 6:7) Ne “yono ohworho emru,” o mevirhọ ọra vwanriẹn emru na riẹn. Itiọrurhomẹmro, o fiotọre taghene wu na vi vwanriẹn ẹmro ezẹko rẹn emọ ọgbọ buebun, neneyo aye i sabu karorhọ ye. Ekete i Baibol ọnana o mevirhọ taghene wu na vi ha uphẹn wu vwori ephian ta rẹn emọ kpahen i Jehova. O fori nẹ ọsoso ekrun na i sanọ ẹdẹ owu uvuẹn kọkprughwre kọkprughwre, rẹ aye ina ha ruẹ ogame ekrun. Orhianẹ we vwo emọ-ọ, wu na ji sabu mẹrẹn erere nyoma we yono Ẹmro Osolobrugwẹ kọkprughwre kọkprughwre.
YONO KODO RHỌ
Yono kpahen obọdẹn irorẹdjẹ ri na ha userhumu rẹn ọsoso ekrun na vwo omefuon ọrhẹ omamerhomẹ.
4. Yono emọ enọ rhẹ ẹguọlọ
Ọ lọhọ re ne yono ọmọ-ọ. Marhẹ i Baibol na ono ru ha userhumu wẹn? Se James 1:19, 20, orho ru, are i gba kpahenrhọ enọ enana:
-
Marhẹ emiemọ ine ru sabu dje ẹguọlọ phia rẹn emọ aye ọke aye e lele aye tẹmro?
-
Mesoriẹ o vwo fo nẹ ọmiọmọ ọ ghwọghwu emọ yen ọke rọ tuekwẹre? a
5. Hẹrote emọ enọ
Ne wu sabu sẹrorẹ emọ, ọ ghanranren omamọ ne wu ta rẹn aye kpahen ehware. Ọnana ọnọ sabu bẹn. Kporo IVIDIO na, orho ru, are i gba kpahenrhọ enọ enana.
-
Mesoriẹ ọ bẹn rẹn emiemọ ezẹko nẹ aye i ta rẹn emọ aye kpahen ehware?
-
Izede ego yẹ emiemọ ezẹko i ru sabu ta rẹn emọ aye kpahen ehware?
Jerẹ oborẹ a mẹraruiẹ rhotọre, akpọ Echu o biomẹrhọ biomẹrhọ. Se 2 Timothy 3:1, 13, orho ru, are i gba kpahenrhọ onọ ọnana:
-
Ezẹko usuẹn evwọkon ra hunute uvuẹn oghwẹmro ọrẹ 13, a gba emọvwerhe bru ehware. Omarana, mesoriẹ ọ ghanren nẹ emiemọ i yono emọ aye kpahen ehware, ọrhẹ oborẹ aye ine ru sabu sẹrorẹ oma aye nẹ abọ era gba ihworho gbọfanrhiẹn?
Wu rheri?
Iseri Jehova i vwo ekwakwa sansan ra ha userhumu rẹn emiemọ yono emọ aye kpahen ehware, ji sẹrorẹ aye nẹ abọ ẹkuọn. Jerẹ udje, ni ividio na, jeghwai se ọbe ọrhẹ Awake! na:
6. Mwuọghọ rẹn eri vwiẹruọ
Emọ ọrhẹ iphuphẹn ina sabu mwuọghọ rẹn eri vwiẹrẹ aye nyoma oborẹ aye a tẹmro rẹn aye lele. Kporo IVIDIO na, orho ru, are i gba kpahenrhọ enọ enana.
-
Mesoriẹ ọ ghanren nẹ ọmọ ọ tẹmro rẹn eri vwiẹriẹ rhẹ ọghọ?
-
Marhẹ uphuphẹn ono ru tẹmro rẹn eri vwiẹriẹ izede ro no djephia taghene o mwuọghọ rẹn aye?
Se Proverbs 1:8, orho ru, are i gba kpahenrhọ onọ ọnana:
-
Marhẹ uphuphẹn ọnọ kpahenrhọ ọkpọvi eri vwiẹriẹ a yẹ ye?
7. Ga i Jehova kugbe jerẹ ekrun
Ekrun ri rhiẹ Iseri Jehova a sanọ ọke kọkprughwre kọkprughwre rẹ aye a ga kugbe. Me ya na sabu ru uvuẹn ogame ekrun? Kporo IVIDIO na, orho ru, are i gba kpahenrhọ enọ enana.
-
Marhẹ ekrun ono ru sabu rhe ruẹ Ogame Ekrun ọke ephian?
-
Me yẹ ọmiọmọ ono ruo, nẹ ogame ekrun aye ọ sabu mwidjẹn, ji yẹ aye erere?—Ni ifoto ọrukaro uvuẹn uyono ọnana.
-
Me yọ nọ sabu lẹrhiẹ bẹn rẹn ekrun ọnọ, rẹ aye ine ru ogame ekrun kugbe?
Uvuẹn Israel ọke ahwanren, Jehova o guọlọre nẹ ekrun i ta kpahen Eyaya Ọfuanfon na kugbe ọke ephian. Se Deuteronomy 6:6, 7, orho ru, are i gba kpahenrhọ onọ ọnana:
-
Marhẹ wu ne ru sabu ha uruemru-urhi ọnana ruiruo?
Irorẹdjẹ harẹn ogame ekrun:
-
Mwuegbe harẹn iyono ukoko.
-
Se, jeghwai ta kpahen iyẹnrẹn i Baibol rẹ ekruon ina riamerhiẹn.
-
Wu rhe vwo emọvwerhe, danlodu yanghene fomu ekwakwa ra ha yono emọ phia nẹ uvuẹn i jw.org.
-
Wu rhe vwo iphuphẹn, lele aye ta kpahen urhomu-ẹmro ro sekpahen iphuphẹn uvuẹn i jw.org.
-
Lele emọ enọ ruiruẹn udje iyẹnrẹn i Baibol.
-
Are i ni, jeghwai ta kpahen ividio rọ ha uvuẹn i jw.org.
OBORẸ IHWORHO EZẸKO A TA: “Baibol na ọ gbanhon phan rẹn emọvwerhe.”
-
Me wu na sabu ta?
ME WU YONORIN?
Jehova ọ guọlọre nẹ emiemọ i vwo ẹguọlọ kpahen emọ aye, yono aye, ji sẹrorẹ aye; ọ guọlọre nẹ emọ i mwuọghọ rẹn eri vwiẹrẹ aye, ji huvwele aye; ọ ji guọlọ nẹ ekrun i ga ye kugbe.
Ẹzẹkoko
-
Marhẹ emiemọ ine ru sabu yono emọ aye, ji sẹrorẹ aye?
-
Marhẹ emọ ine ru sabu mwuọghọ rẹn eri vwiẹrẹ aye?
-
Erere ego yi havwiẹ orhianẹ ekrun ọ sanọ ẹdẹ owu uvuẹn kọkprughwre kọkprughwre, rẹ aye ina ha ruẹ ogame ekrun?
GUỌLỌ IYẸNRẸN ERỌRỌ
Iyono ego yi ne mwuegbe ọmọ ọnọ no ki te omirẹghwa?
“Iyono Erhan rẹ Ofori nẹ Emọ i Yono” (Awake! Ikekele 2 2019)
Yono kpahen obọdẹn urhebro ri Baibol na o tiobọnu rẹn era hẹrote eri vwiẹrẹ aye ri ho ne.
Se kpahen oborẹ ọhworhare owu ro vwo rhe oborẹ ọnọ mọrọn emọ yen lele, o ru me rhiẹ obọdẹn ọsẹ.
Jehova o Yonirin Ame Oborẹ Ame Ine Ru Vwo Obọdẹn Ekrun(5:58)
Yono oborẹ esẹ ine ru sabu ru onyerẹnkugbe aye rhẹ emọ aye ehworhare gbanhonrhọ.
“Marhẹ Esẹ Ine ru Dje Ẹguọlọ Ọrhẹ Obẹhatua Rẹn Emọ Aye Ehworhare?” (Oghwa Odẹrẹ, November 1, 2011)
a Uvuẹn i Baibol na, “ọghwọghwu” o surhobọmwu uyono ọrhẹ ọkpọvi, ra ji ha userhumu rẹn ọmọ wene iroro ọrhẹ iruemru ri sọre. Ọnana o mevirhọ taghene ene ru aye gbalogbalo yanghene kon aye-e.—Proverbs 4:1.
