UYONO 53
Djẹ Iruẹn Ọrhẹ Ughe ra Lẹrhẹ Oma Merhen i Jehova
Jehova yẹ “Osolobrugwẹ rẹ oma ọ merhan na.” (1 Timothy 1:11) Ọ guọlọre nẹ oma ọ merhen ọwan, na ji riamerhen akpenyerẹn ọwan. Oma ọ merhiẹn orhianẹ ọwan a damoma ronmoma arha wian hin. Uvuẹn uyono ọnana, ene yono kpahen oborẹ ene ru sabu riamerhen ọke omeronmo ọwan, mẹrẹn evwẹnvuọn nie rhe, ji lẹrhẹ oma merhen i Jehova.
1. Me yo fori na karorhọ arha guọlọ djẹ iruẹn, ikpekporo ọrhẹ ughe?
Me we ruẹ ọke we ronmoma? Ihworho ezẹko a ha ọke omeronmo aye se ẹbe, kerhọ ikpekporo, ni ughe, yanghene ha itanẹti ruiruo. Awọrọ a riamerhen ekwakwa erọrọ rhẹ igbehian aye, nyoma aye a rhẹnrhẹn, fa ibọru, yanghene ruiruẹn erọrọ. Ọra djẹre ephian, o fori no mwu ọwan ẹro taghene ọ “lẹrhẹ oma merhen Ọrovwori na.” (Ephesians 5:10) Ọ ghanranren omamọ ne vwẹruọ ẹmro ọnana fọkime, Jehova ovwo utuoma kpahen ughe, ikpekporo kugbe ekwakwa erọrọ re jiri ozighi, ọfanrhiẹn, yanghene irueruo ikpodje, rẹ ihworho a riamerhiẹn inyenana. (Se Psalm 11:5.) Me yọ nọ ha userhumu rẹn ọwan brorhiẹn ri serhọ kpahen iruẹn, ikpekporo ọrhẹ ughe?
Arha ha ihworho ri vwo ẹguọlọ kpahen i Jehova ru igbehian, aye ina ha userhumu rẹn ọwan rhiẹ omamọ ihworho, ji lẹrhẹ ọwan djẹ iruẹn, ikpekporo ọrhẹ ughe ri serhọ. Jerẹ oborẹ e yonorin uvuẹn uyono rọ vrẹnren na, “ohworho rọ nyalele ọvwẹghwanren, ọnọ ghwanren.” Ọrẹn, orhianẹ ọwan e kwomakugbe ihworho ri vwe vwo ẹguọlọ kpahen evwan i Jehova, ana “rioja.”—Proverbs 13:20.
2. Mesoriẹ ọ ghanren na ja ghwọghọ ọke buebun rhẹ iruẹn, ikpekporo ọrhẹ ughe?
Ọrhọ tobọ rhianẹ a djẹ iruẹn, ikpekporo ọrhẹ ughe ri serhọ, o ji fo ne vwo oniso kpahen ọke ra ghwọghọ rhọ aye. Orhiomara-an, ọwan i vwo ọke ra na ha ru ekwakwa ri mai ghanre-en. Baibol na ọ ta rẹn ọwan na “dabu ha ọke [ọwan] ruiruo.”—Se Ephesians 5:15, 16.
YONO KODO RHỌ
Yono kpahen oborẹ wu ne ru brorhiẹn ri serhọ kpahen iruẹn, ikpekporo ọrhẹ ughe wa riamerhiẹn.
3. Kẹnoma rẹn iruẹn, ikpekporo ọrhẹ ughe ri biomurun
Mesoriẹ o fo na jomarhotọre djẹ iruẹn, ikpekporo ọrhẹ ughe? Kporo IVIDIO na, orho ru, are i gba kpahenrhọ enọ enana.
-
Marhẹ iruẹn uvuẹn i Rome ọke ahwanren o ru họhọ erẹ ọke ọwan na?
-
Uvuẹn ividio na, me yi Danny o yonorin kpahen iruẹn ọrhẹ ughe?
Se Romans 12:9, orho ru, are i gba kpahenrhọ onọ ọnana:
-
Marhẹ oghwẹmro ọnana ono ru hobọte orhienbro ọnọ kpahen iruẹn, ikpekporo ọrhẹ ughe?
Ekwakwa ezẹko ego yi Jehova ovwo utuoma kpahen? Se Proverbs 6:16, 17 ọrhẹ Galatians 5:19-21. Are i rhe se ekete i Baibol na owuowu hin, are i gba kpahenrhọ onọ ọnana:
-
Usuẹn ekwakwa ra hunute uvuẹn eghwẹmro re seri na, ego ye wa mẹrẹn uvuẹn iruẹn, ikpekporo ọrhẹ ughe uvuẹn ọke ọwan na?
Oborẹ wu ne ru sabu ha ẹghwanren djẹ iruẹn, ikpekporo ọrhẹ ughe
Nọ oma:
-
Me mie ruẹ? Iruẹn, ikpekporo ọrhẹ ughe na ovwo oborẹ i Jehova ovwo utuoma kpahen?
-
Ọkiọgo mie ruie? Ọ suẹ ukọ rhẹ ekwakwa ri mai ghanren ha mẹ?
-
Mẹmẹ rhẹ ayọmo ye gbe ruie? Ọ lẹrhe mẹ vwo onyerẹnkugbe rọ kpẹnkpẹnren rhẹ ihworho ri vwe vwo ẹguọlọ kpahen i Jehova?
Orhomurun na damoma omamọ kẹnoma rẹn imwofẹn. Ọnana yọ soriẹ o fo na kẹnoma rẹn iruẹn, ikpekporo ọrhẹ ughe re vwo ẹhẹn eveva kpahen
4. Ha ọke ọnọ ruiruo rhẹ ẹghwanren
Kporo IVIDIO na, orho ru, are i gba kpahenrhọ onọ ọnana.
-
Dedevwo omizu ọhworhare uvuẹn ividio na, ovwo ni ughe ri biomuru-un, obẹnbẹn ọgo yo vwori?
Se Philippians 1:10, orho ru, are i gba kpahenrhọ onọ ọnana:
-
Marhẹ oghwẹmro ọnana ono ru ha userhumu rẹn ọwan brorhiẹn kpahen ọke ra ghwọghọ rhẹ ekwakwa ra lẹrhẹ oma merhen ọwan?
5. Djẹ iruẹn, ikpekporo ọrhẹ ughe ri rhomurun
Dedevwo i Jehova ovwo utuoma kpahen iruẹn, ikpekporo ọrhẹ ughe ezẹko, ekwakwa irhorhomu buebun i havwiẹ rẹ ọye o vwo ẹguọlọ kpahen. Se Ecclesiastes 8:15 ọrhẹ Philippians 4:8, orho ru, are i gba kpahenrhọ onọ ọnana:
-
Iruẹn, ikpekporo ọrhẹ ughe irhorhomu ego ye jo?
Wu na sabu riamerhen omeronmo ọnọ, kugbe iruẹn, ikpekporo ọrhẹ ughe ri serhọ
OBORẸ IHWORHO EZẸKO A TA: “Ovwo oborẹ ọsọre uvuẹn iruẹn, ikpekporo ọrhẹ ughe re jiri ozighi, irueruo ọfanrhiẹn, yanghene irueruo ikpodje-e, takpu mi vwe vwobọrhọ aye-e.”
-
Me wu na sabu ta?
ME WU YONORIN?
Jehova ọ guọlọre nẹ ọwan i djẹ iruẹn, ikpekporo ọrhẹ ughe ri serhọ, jeghwai riamerhiẹn.
Ẹzẹkoko
-
Iruẹn, ikpekporo ọrhẹ ughe ego yo fori nẹ Ilele Kristi i kẹnoma riẹn?
-
Mesoriẹ o fo na jomarhotọre roro kpahen ọke ra ghwọghọ rhẹ iruẹn, ikpekporo ọrhẹ ughe?
-
Mesoriẹ wa guọlọ djẹ iruẹn, ikpekporo ọrhẹ ughe ri na lẹrhẹ oma merhen i Jehova?
GUỌLỌ IYẸNRẸN ERỌRỌ
Yono kpahen ohworho ro vwo omẹgbanhon rọ nọ djẹ iruẹn, ikpekporo ọrhẹ ughe rẹn ọwan.
Se kpahen oborẹ wu ne ru sabu brorhiẹn ri serhọ kpahen oborẹ wu ne ruo uvuẹn ọke we ronmoma.
“Wa Mẹrẹn Erere Nẹ Omeronmo Ọnọ?” (Oghwa Odẹrẹ, October 15, 2011)
Uvuẹn ikuegbe na “Mi Tobọ fi Uruemru re ni Awọrọ ruẹ Fọkiẹ Ekete aye i Nurhe Kparobọ,” se kpahen oborẹ ọsoriẹ ọhworhare owu o wene, ikpekporo ọrhẹ ughe re je yi bi.
“Baibol Na O Wene Akpenyerẹn” (Oghwa Odẹrẹ, February 1, 2010)
Ni oborẹ ọmase owu ro rhiẹ izu, o ru brorhiẹn rhẹ ẹghwanren kpahen iruẹn, ikpekporo ọrhẹ ughe re jiri irueruo ikpodje.
