1. Me wu na sabu roro kpahen fọkiẹ urhomẹmro i Baibol na buebun wu yono kpahen ne na?

WU YONO urhomẹmro i Baibol na buebun ne uvwre ọke we yono ọbe ọnana, jerẹ ive Osolobrugwẹ kpahen akpọ i bẹmẹdẹ, erhirhiẹ eri hwu ne e havwọ, ọrhẹ ẹruefirhọ kpahen ẹrhọmọnuhwu. (Ecclesiastes 9:5; Luke 23:43; John 5:​28, 29; Revelation 21:​3, 4) Ọkezẹko, we riẹ iyono Iseri Jehova ne, wu jeghwai vwo imwẹro taghene aye ya ga ogame urhomẹmro na. (John 13:35) Ọkezẹko, wa ha i Jehova  rhiẹ ugbehian ọnọ ne, wu jeghwai brorhiẹn wu na ga ye ne. Omarana, wu na sabu roro kpahen onọ ọnana, ‘Me mi ne ru ne mi sabu ga Osolobrugwẹ?’

2. Mesoriẹ onyẹ Ethiopia na ọ guọlọ bromarhame?

² Ọrana yẹ oborẹ ọhworhare onyẹ Ethiopia ro nyerẹnren ọke i Jesu ọ nọren. Ọke ra rhọmọ i Jesu nẹ uhwu hin, odibo i Jesu re se Philip no ghwoghwo rẹn ọhworhare na. Philip no djerie fiotọre riẹn taghene i Jesu yi Messiah na. Oborẹ onyẹ Ethiopia na o yonorin o te riẹ ẹhẹn, ogege nọ tare: “Nughe! Ame ọ ha aran; me yọ nọ lẹrhe mẹ je bromarhame?”—Acts 8:​26-36.

3. (a) Akama ọgo yi Jesu ọ harẹn ihworho ra nyalelie? (b) Marhẹ ye bru ohworho rhẹ ame lele?

³ Baibol na ọ dabu yono taghene wu rha guọlọ ga i Jehova, o fori ne wu bromarhame. Jesu ọ ta rẹn ihworho ra nyalelie: “Are i ye ruẹ idibo ihworho uvuẹn egbamwa na ephian, bru aye rhẹ ame.” (Matthew 28:19) Jesu ọ jeghwai dje udje na rhotọre nyoma o bromarhame. E bru ọsoso oma i Jesu rhẹ ame, orhiẹ ọrẹ a ghwai balọ ame ghwu urhomie ọvo-o. (Matthew 3:16) Olele Kristi orho bromarhame inyenana, a jeghwai bru ọsoso omayen rhẹ ame.

4. Me yẹ omebrurhame ọnọ o djephia rẹn awọrọ?

⁴ Wu rhe bromarhame, we djephia rẹn awọrọ taghene wu ghini guọlọ rhiẹ ugbehian Osolobrugwẹ jeghwai ha ẹga riẹn. (Psalm 40:​7, 8) Omarana, wu na sabu roro, ‘Me mi ne ru, ne mi sabu bromarhame?’

5. (a) Me wu ne ru vwẹre ne wu ki sabu bromarhame? (b) Mesoriẹ uyono ẹnya ọ ghanren?

⁵ Ne wu ki sabu bromarhame, wu ne vi rhe Jehova ọrhẹ i Jesu. Nyoma i Baibol na e yono, wu tuẹn ọnana rhọ ne. (Se John 17:⁠3.) Ọrẹn, ọrana ọvo o te-e. Baibol na ọ tare taghene wu ne vi “vwo irherhe rọ gbare,”  kpahen ọhọre i Jehova. (Colossians 1:⁠9) Iyono ukoko Iseri Jehova ọnọ ha userhumu wẹn vwo onyerẹnkugbe rọ kpẹnkpẹnren rhẹ i Jehova. Ọrana usuẹn oborẹ ọsoriẹ ọ ghanren wu ne riẹ uyono ukoko na ọke ephian.—Hebrews 10:​24, 25.

6. Me yo fori ne wu rhe kpahen i Baibol na vwẹre wu ki bromarhame?

⁶ Itiọrurhomẹmro, Jehova o fiẹrorhọ taghene wu rhe ọsoso oborẹ ọ ha uvuẹn i Baibol na vwẹre ne wu ki bromarhame-e. O fiẹrorhọ taghene onyẹ Ethiopia na o rhe ekwakwa ephian vwẹre no ki bromarhame-e. (Acts 8:​30, 31) Ọwan ine rhe yono kpahen Osolobrugwẹ ye ti bẹmẹdẹ. (Ecclesiastes 3:11) Ọrẹn, wu ki bromarhame, o fori ne wu rhe jeghwai kwerhọ iyono kirighwo re ha uvuẹn i Baibol na.—Hebrews 5:⁠12.

7. Marhẹ uyono i Baibol na o ru ha userhumu wẹn ne?

⁷ Baibol na ọrhọ ta: “Esegburhomẹmro ọrhọ havwiẹ-ẹ, a sabu ru oborẹ ọnọ merhen Osolobrugwẹ oma-a.” (Hebrews 11:⁠6) Omarana, wu ne vi vwo esegburhomẹmro ne wu ki sabu bromarhame. Baibol na ọ ta rẹn ọwan taghene ọke ihworho ezẹko uvuẹn Corinth, e rhon oborẹ idibo i Jesu e yono, aye ni “vwo imwẹro jeghwai bromarhame.” (Acts 18:⁠8) Omaran ọ ji havwọ, uyono i Baibol na ọ ha userhumu wẹn vwo esegburhomẹmro kpahen ive Osolobrugwẹ ọrhẹ omẹgbanhon izobo i Jesu, rọ nọ sabu simi ọwan nẹ abọ ọdandan ọrhẹ uhwu.—Joshua 23:14; Acts 4:12; 2 Timothy 3:​16, 17.

8. Me yo no mwuo ta rẹn awọrọ kpahen oborẹ wu yonorin?

⁸ We rhe yono i Baibol na, jeghwai mẹrẹn oborẹ ọ ha userhumu wẹn lele uvuẹn akpenyerẹn ọnọ, ọnana nọ  lẹrhẹ esegburhomẹmro ọnọ gbanhanrhọ. Ne wu ne vwo omwemẹ wu na ta rẹn awọrọ kpahen oborẹ we yono na. (Jeremiah 20:9; 2 Corinthians 4:13) Ọrẹn, ayọmo ye wu na ta riẹn?

9, 10. (a) Ayọmo ye wu guọlọ lele tuẹn ẹmro ẹta rhọ kpahen oborẹ wu yono ne? (b) Me wu ne ru, wu rha guọlọ homaba ukoko na riẹ aghwoghwo?

⁹ Wu na sabu ta oborẹ we yono na rẹn ekrun enọ, igbehian enọ, ihworho re rhirhiẹ kẹruọ yanghene ihworho wẹwẹ rhẹ aye a gba wian kugbe. Ọrana orhomurun, ọrẹn, ru ọnana izede uruemru esiri ọrhẹ ẹguọlọ. Orho ru, wu na sabu homaba imizu uvuẹn ukoko na riẹ aghwoghwo. Wu rhe mwuegbe ne, wu na sabu ta rẹn Oseri Jehova ro leluo yono i Baibol na taghene wu guọlọ homaba ukoko na riẹ aghwoghwo. Orhianẹ ohworho ro leluo yono na ọ mẹrenriẹn taghene wu mwuegbe ne, wa jeghwai nyerẹn akpọ ọnọ lele irhi re ha uvuẹn i Baibol na, wẹwẹ ọrhẹ ọye ni ne lele ekpako awanva uvuẹn ukoko na siyẹ.

¹⁰ Me yọ nọ phia uvuẹn esiyẹ ọnana? Ekpako na ine leluo tẹmro nẹ aye i mẹrẹnvwrurhe sẹ wu vwẹruọ jeghwai vwo imwẹro kpahen iyono eghoghanren ri ha uvuẹn i Baibol na, sẹ we ru oborẹ i Baibol na ọ tare uvuẹn akpenyerẹn ọnọ, aye ine ji leluo tẹmro sẹ wu ghini guọlọ rhiẹ Oseri Jehova. Karorhọ taghene ekpako na a hẹrote ihworho ephian re ha uvuẹn ukoko na, ji te owẹwẹ, omarana, we jẹ ofẹn mwuo wu na tẹmro rẹn aye-e. (Acts 20:28; 1 Peter 5:​2, 3) Esiyẹ ọnana orho hin, ekpako ukoko na ni na ta wẹn sẹ wu mwuovwan wu na homaba ukoko na riẹ aghwoghwo.

11. Mesoriẹ ọ ghanren ne wu wene obọ vwẹre wu ki homaba ukoko na riẹ aghwoghwo?

¹¹ Ekpako na ina sabu dje yi fiotọre wẹn taghene o vwo irueruo erọrọ wu ne ji tiọbọnu vwẹre, ne wu ki sabu  mwuovwan wu na homaba ukoko na riẹ aghwoghwo. Mesoriẹ ọ ghanren re ne ruẹ ewene enana? Nime, arha tẹmro rẹn awọrọ kpahen Osolobrugwẹ, ọwan e meviẹ harẹn i Jehova, nẹ ana jeghwai nyerẹn izede ro no brọghọ rhọye oma.—1 Corinthians 6:​9, 10; Galatians 5:​19-21.

12. Mesoriẹ o fo nẹ ihworho ephian e ghwẹriẹ?

¹² O vwo emru ọrọrọ wu ne vi ru ne wu ki sabu bromarhame. Ọnyikọ Peter ọrhọ ta: “Omarana, are i ghwẹriẹ, jeghwai wene akpenyerẹn are, neneyo a sabu hionron edandan are nie.” (Acts 3:19) Me yo mevirhọ ra na ghwẹriẹ? O mevirhọ taghene ọsọre ọwan i ruru ephian, ọ da ọwan. Jerẹ udje, we rhe nyerẹn akpọ ọfanrhiẹn, o fori ne wu ghwẹriẹ obọ. Ọrhọ tobọ rhianẹ uvuẹn akpenyerẹn ọnọ wa damoma wu ne ru oborẹ ọgbare, wu na ji ghwẹriẹ, nime ọwan ephian iruedandan, omarana, a guọlọ ẹharhomu mie Osolobrugwẹ.—Romans 3:23; 5:⁠12.

13. Me yo mevirhọ ne “wene akpenyerẹn” ọwan?

¹³ Wu rha ta taghene oborẹ wu ruru na ọ da ruọ, ọrana ọvo o teri? Ẹjo. Peter ọ tare taghene o fori ne wu “wene akpenyerẹn” ọnọ. Ọnana o mevirhọ taghene wu na tiẹn ọsoso iruemru we ruẹ bi re sọre, ne wu ru oborẹ ọgbare. Ne dje ọnana fiotọre, gba ha ẹhẹn roro taghene we riẹ ekete wu vwe ji te dẹ. Ọke oru, ne wu mẹrẹnvwrurhe taghene izede rọ sọre nọ ye wu ha kpahen. Me wu ne ruo? O vwo ẹhẹn eveva-a, wu ne zikẹn, domaji, ghwẹrioma, ne wu na ha kpahen izede rọ gbare na. Omaran ọ ji havwọ, rẹ we yono i Baibol na, wu na sabu mẹrẹnvwrurhe taghene o vwo iruemru yanghene ekwakwa ezẹko uvuẹn enyerakpọ ọnọ re wu ne wene obọ rhọ. Gbe vwo ẹhẹn wu ne “wene akpenyerẹn” ọnọ nyoma wu ne ru ewene ri fori, ne wu rhe ruẹ oborẹ orhomurun ọke ephian.

14. Marhẹ wu ne ru homakpahontọre rẹn Osolobrugwẹ?

¹⁴ Udjoghwẹ ọghoghanren ọrọrọ re wu na kpare ne wu ki bromarhame, ye wu na homakpahontọre rẹn i Jehova. Omẹhakpahontọre o mevirhọ ọrẹ we vive rẹn i Jehova uvuẹn ẹrhomo taghene wu na ga ye ọvo, jeghwai ha ọhọre ọnẹyen rhiẹ oborẹ ọ mai ghanren uvuẹn akpenyerẹn ọnọ.—Deuteronomy 6:⁠15.

15, 16. Me yo mwu ohworho ha omayen kpahontọre rẹn Osolobrugwẹ?

¹⁵ Erhe vive taghene ana ga i Jehova ọvo, ọ họhọ ọke ohworho o vive taghene ọye ono lele ohworho ro vwo ẹguọlọ kpahen nyerẹn ọsoso akpenyerẹn yen. Ha ẹhẹn roro taghene ọhworhare ọrhẹ ọmase a kọn rhẹ ọwan. Ọke rẹ ọhworhare na o rhe ọmase na rhọ, no vwo ẹguọlọ kpahiẹn jeghwai vwo ẹhẹn rọ nọ rọnmọ ọmase na. Dedevwo, ọnana orhienbro ọduado, ọhworhare na o vwo omwemẹ rọ nọ kpare ohwan ọnana nime o vwo ẹguọlọ kpahen ọmase na.

¹⁶ Ru we yono kpahen i Jehova, wẹwẹ ne vwo ẹguọlọ kpahiẹn jeghwai damoma wu na ha ẹga riẹn. Ọnana ono mwuo vive uvuẹn ẹrhomo taghene i Jehova ọvo ye wu na ga. Baibol na ọ tare taghene kohworho kohworho rọ guọlọ lele i Jesu, ọnọ vi “tiẹn omayen.” (Mark 8:34) Me yẹ ọnana o mevirhọ? O mevirhọ taghene oborẹ ọ karo uvuẹn akpenyerẹn ọnọ ọyẹ wu na huvwele i Jehova. Oborẹ i Jehova ọ guọlọre ọ ghanren vrẹn ẹkẹ ọrhẹ ojemẹ enọ.—Se 1 Peter 4:⁠2.

17. Mesoriẹ ihworho ezẹko e vwa ha omayen kpahontọre rẹn i Jehova?

¹⁷ Ihworho ezẹko e vwa ha omayen kpahontọre rẹn i Jehova-a, nime ofẹn o mwu aye taghene aye i sabu sẹrorẹ  ive rẹ aye ina ha ẹga riẹ-ẹn. Aye a guọlọ ru oborẹ ono biomu i Jehova evwa-an, yanghene aye ina sabu roro taghene aye arha homakpahontọre riẹ-ẹn, Jehova ọrhọ mọrọn aye fọkiẹ oborẹ aye i ruru-u.

18. Me yọ nọ ha userhumu wẹn ja zofẹn taghene wu ne ru i Jehova sọ?

¹⁸ Ẹguọlọ wu vwo kpahen i Jehova ọnọ ha userhumu wẹn ja zofẹn taghene wu ne ru i Jehova sọ. Nime wu vwo ẹguọlọ kpahiẹn, wu ne ru ekete omẹgbanhon ọnọ o teri, ne wu sabu nyamwu ive wu veri na. (Ecclesiastes 5:4; Colossians 1:10) Wu vwe roro taghene orhiẹ oborẹ ọ bẹnren re ne ru ọhọre i Jehova-a. Ọnyikọ John ọrhọ ya: “Ọnana yẹ oborẹ ẹguọlọ Osolobrugwẹ o mevirhọ, ne ru lele ekama enẹyen, nime ekama enẹyen a ghwa pha-an.”—1 John 5:⁠3.

19. Mesoriẹ wu na ja zofẹn wu na homakpahontọre rẹn i Jehova?

¹⁹ Wu rhiẹ ohworho rọ gbare vwẹre ne wu ki homakpahontọre rẹn i Jehova-a. Jehova o vwo fiẹrorhọ taghene ọwan i ru vrẹn oborẹ ọwan ina sabu ru-u. (Psalm 103:14) Ọnọ ha userhumu wẹn ru oborẹ ọgbare. (Isaiah 41:10) Hẹroso i Jehova rhẹ ọsoso ọmudu ọnọ, “ọye nẹ ono ru izede ọnọ phiọn.”—Proverbs 3:​5, 6.

20. Wu rha homakpahontọre rẹn Osolobrugwẹ ne, me yẹ udjoghwẹ ọreva wu na kpare?

²⁰ Wu rorori taghene wu mwuegbe wu na homakpahontọre rẹn i Jehova ne? Wu rha homakpahontọre rẹn i Jehova ne, nọyẹ wu mwuegbe wu na kpare udjoghwẹ ọreva ne. O fori ne wu bromarhame.

21, 22. Marhẹ wu ne ru sabu “ghwoghwo” esegburhomẹmro ọnọ phia ọrẹ “afiede”?

²¹ Jenẹ ọrọhẹrote ewian ugboma ekpako ukoko ọnọ,  rhe taghene wu homakpahontọre rẹn i Jehova ne, wu jeghwai vwo ẹhẹn wu ne bromarhame. Nẹ ono vwo ẹkwaphiẹrhotọre rẹ ekpako ezẹko ina nọ owẹwẹ enọ kpahen iyono eghoghanren ri ha uvuẹn i Baibol na. Aye i rha mẹriẹn taghene wu mwuegbe ne, nẹ aye ina ta wẹn ne wu bromarhame uvuẹn omẹvwa okinhariẹ yanghene omẹvwa ẹkwotọre ọrẹ Iseri Jehova rọ sa obaro na. Uvuẹn omẹvwa na, ana tẹmro kpahen  oborẹ omebrurhame o mevirhọ. Ọtẹmro na ọnọ nọ eri guọlọ bromarhame na enọ eghoghanren eva. Wu rha kpahenrhọ enọ erana, nọyẹ, wu “ghwoghwo” esegburhomẹmro ọnọ phia ọrẹ “afiede” ne.—Romans 10:⁠10.

²² Ne wu ne bromarhame. Ene vi bru ọsoso oma ọnọ rhẹ uvuẹn ame na. Omebrurhame ọnọ no djephia rẹn  ihworho ephian taghene wu homakpahontọre rẹn i Jehova ne, wẹwẹ nẹ Oseri Jehova.

23. Me yo mevirhọ re ne bromarhame “odẹ Ọsẹ na, Ọmọ na, ọrhẹ ọrẹ ẹhẹn ọfuanfon na”?

²³ Jesu ọ tare taghene idibo yi ine bromarhame “odẹ Ọsẹ na, Ọmọ na, ọrhẹ ọrẹ ẹhẹn ọfuanfon na.” (Se Matthew 28:19.) Me yẹ ọrana o mevirhọ? O mevirhọ taghene wu rheri taghene i Jehova yo fo ohworho ro no sun, wu jeghwai rhe owian ro te i Jesu uvuẹn orugba ọhọre Osolobrugwẹ, ọrhẹ oborẹ Osolobrugwẹ o ru ha ẹhẹn ọfuanfon ọnẹyen ruẹ ọhọre ọnẹyen.—Psalm 83:18; Matthew 28:18; Galatians 5:​22, 23; 2 Peter 1:⁠21.

24, 25. (a) Me yẹ omebrurhame o mevirhọ? (b) Me yẹ ọwan ine yono kpahen uvuẹn urhomu-ẹmro rọ kẹta na?

²⁴ Omebrurhame emru ọghoghanren. Ọke re bru owẹwẹ rhẹ ame na, o mevirhọ taghene wu hwuru, yanghene wu nyajẹ akpọ we nyerẹn bi vwo ne. Wu rhe nẹ uvuẹn ame na rhe, ne wu na tuẹn akpenyerẹn ọkpokpọ rhọ wu ne ru ọhọre Osolobrugwẹ. O djephia taghene wu na ga i Jehova bẹmẹdẹ. Karorhọ taghene orhiẹ onyakpọ, ukoko, yanghene iruo ye wu homakpahontọre riẹ-ẹn. Jehova ye wu ha arhọ ọnọ kpahontọre riẹn.

²⁵ Omebrurhame ọnọ, ọnọ ha userhumu wẹn vwo onyerẹnkugbe rọ kpẹnkpẹnren rhẹ Osolobrugwẹ. (Psalm 25:14) Ọnana o mevirhọ taghene ohworho ono vwo usimirhọ fọkime o bromarhame ne-e. Ọnyikọ Paul ọrhọ ya: “Are i rha wian usimi are phia rhẹ ofẹn kugbe ighweghwe.” (Philippians 2:12) Omebrurhame ghwai ọtonrhọ. Ọrẹn, marhẹ wu ne ru sabu daji kẹrẹ i Jehova? Urhomu-ẹmro rọ kẹta uvuẹn ọbe ọnana ọnọ kpahenrhọ onọ ọrana.