1. Ẹrhomo ro titiri ọgo ye ne yono kpahen?

IDUDURU ihworho i rhe kpahen ẹrhomo ro titiri re se Ọsẹ Ame, yanghene Ẹrhomo Ọrovwori na. Jesu ọ ha ẹrhomo ọnana yono idibo yi oborẹ a nẹrhomo. Me yọ nẹrhomo kpahen? Mesoriẹ ẹrhomo ọnana ọ ghanren rẹn ọwan inyenana?

2. Me yẹ ekwakwa esa kirighwo i Jesu o yonirin ọwan na nẹrhomo kpahen?

² Jesu nọ tare: “Are i nẹrhomo omana: ‘Ọsẹ ame obẹ idjuwu, jenẹ e ru odẹ ọnọ fon. Jenẹ Uvie ọnọ rhe. Jene ru ọhọre ọnọ uvuẹn otọrakpọ na jerẹ oborẹ e ruie obẹ odjuwu.’” (Se Matthew 6:​9-13.) Mesoriẹ i Jesu o yono ọwan na nẹrhomo kpahen ekwakwa esa erana?—Se Iyẹnrẹn Ra Habaye 20.

3. Me yo fori ne rhe kpahen Uvie Osolobrugwẹ?

³ Ọwan i yonorin taghene odẹ Osolobrugwẹ yi Jehova. Ọwan i yono kpahen ọhọre Osolobrugwẹ kpahen ituakpọ ọrhẹ akpọ na. Ọrẹn, me yi Jesu o mevirhọ ọke rọ ta: “Jenẹ Uvie ọnọ ọ rhe”? Ọwan ine yono oborẹ Uvie Osolobrugwẹ o mevirhọ, oborẹ ono ruo, ọrhẹ oborẹ ono ru odẹ Osolobrugwẹ fon lele.

4. Me yẹ Uvie Osolobrugwẹ, ọrọmo yo Orodje yi?

⁴ Jehova ọ ha igọmẹti mwu obẹ odjuwu, ọ jeghwai djẹ i Jesu no rhiẹ Orodje igọmẹti ọrana. Baibol na o se igọmẹti ọnana Uvie Osolobrugwẹ. Jesu yẹ  “Orodje harẹn irodje ọrhẹ Ọrovwori harẹn erivwori.” (1 Timothy 6:15) Jesu ono ru ekwakwa irhorhomu rẹ usun ituakpọ ọnọ jọ sabu ru, ọ jeghwai vwo omẹgbanhon vrẹn ọsoso ituakpọ re suẹn na.

5. Bọgo yẹ igọmẹti Osolobrugwẹ ono sun nurhe? Me yo no sun?

⁵ Ẹdọke uzova a vrẹn ọke ra rhọmọ i Jesu hin, no riẹ odjuwu. Ọke oru, Jehova nọ ha riẹ mwu Orodje ọrẹ Uvie na. (Acts 2:33) Igọmẹti Osolobrugwẹ ono sun nẹ obẹ odjuwu rhiẹ otọrakpọ na. (Revelation 11:15) Ọrana yẹ ọsoriẹ i Baibol na o se Uvie Osolobrugwẹ “Uvie odjuwu.”—2 Timothy 4:⁠18.

6, 7. Mesoriẹ i Jesu o rhomu ghwẹ irodje ituakpọ?

⁶ Baibol na ọ tare taghene i Jesu ọ do vrẹn korodje korodje, nime “ọye ọvo yo vwo hwuẹ.” (1 Timothy 6:16) Ituakpọ re suẹn e hwuẹ, ọrẹn i Jesu o hwuẹ dẹ-ẹ. Ekwakwa irhorhomu ri Jesu ono ru rẹn ọwan ine rhirhiẹ ye bẹmẹdẹ.

⁷ Baibol na ọ tare taghene i Jesu ono rhiẹ Orodje ro brorhiẹn ọsoso rọ jeghwai gbe arodọmẹ rẹn ihworho: “Ẹhẹn ọfuanfon i Jehova ono lelie rhirhiẹ ye, ẹhẹn ẹghwanren ọrhẹ ọmẹrẹnvwrurhe, ẹhẹn urhebro ọrhẹ omẹgbanhon, ẹhẹn irherhe ọrhẹ ofẹnzẹ ọrẹ i Jehova. Ọye ọnọ mẹrẹn omamerhomẹ uvuẹn ofẹnzẹ ọrẹ i Jehova. Ọ vwọ samọ guẹnzọn nyoma oborẹ ọ ghwai ha ukẹro mẹrẹ-ẹn, yanghene ha ọghwọghwu phia lele oborẹ erhọ ye o rhonri-in. Ono guẹnzọn ivwiegbere na izede ọsoso.” (Isaiah 11:​2-4) Wu guọlọre nẹ aruo Orodje ọrana o suon?

8. Marhẹ e ru rhe taghene i Jesu ọvo o suẹ-ẹn?

⁸ Osolobrugwẹ ọ djẹ ihworho ezẹko nẹ aye i leli Jesu sun obẹ odjuwu. Jerẹ udje, ọnyikọ Paul ọ ta rẹn Timothy: “Ọwan i rhe vwo edirin, ọwan ine sun kugbe  ẹrhẹ irodje.” (2 Timothy 2:12) Awan emwa yi ne leli Jesu sun ẹrhẹ irodje?

9. Awan emwa yi ne lele i Jesu sun? Ọke ọgo yẹ Osolobrugwẹ ọ tuẹn ẹdjẹ aye rhọ?

⁹ Jerẹ oborẹ ọwan i yonorin uvuẹn Urhomu-ẹmro 7, ọnyikọ John ọ mẹrẹn Jesu ro rhiẹ Orodje ọrhẹ irodje erọrọ ri te 144,000 obẹ odjuwu uvuẹn emena arodo. Ayọmo yẹ awan 144,000 na? John o djerie fiotọre taghene “a ya odẹ [i Jesu] ọrhẹ odẹ Ọsẹ ye rhẹ aruikpẹn aye.” Ọrhọ ji ta: “Enana ye lele ọmogegede na [nọyẹ Jesu] riẹ ekete rọ nyaren ephian. Usuẹn ituakpọ ya dẹ aye.” (Se Revelation 14:​1, 4.) Awan 144,000 na, Ilele Kristi ri fuevwan rẹ Osolobrugwẹ ọ djẹha, aye ọrhẹ i Jesu yi ne sun otọrakpọ na. Aye i rhe hwu, na rhọmọ aye riẹ odjuwu. (Revelation 5:10) Nẹ ọke inyikọ na rhe, yi Jehova ọ tuẹn ẹdjẹ Ilele Kristi ri fuevwan nẹ aye i rhiẹ usuẹn irodje awan 144,000 na.

10. Mesoriẹ o rhiẹ emru ẹguọlọ taghene i Jehova ọ djẹ Jesu ọrhẹ awan 144,000 na ni sun ituakpọ?

¹⁰ Jehova o vwo ọdamẹ kpahen ọwan omamọ, ọnana yẹ ọsoriẹ ọ djẹ ituakpọ nẹ aye i lele i Jesu sun. Jesu ono rhiẹ omamọ Orodjẹ nime o vwẹruọ ọwan. O rhe oborẹ ọ havwọ ene rhiẹ onyakpọ jeghwai rioja. Paul ọ tare taghene i Jesu o roro harẹn ọwan, o rhe ekete ọwan e seriotọre, a jeghwai damiẹ ni “ọrẹ kizede kizede jerẹ ọwan.” (Hebrews 4:15; 5:⁠8) Awan 144,000 na, i rhe oborẹ ọ havwọ ene rhiẹ onyakpọ. Aye i jeghwai dẹrughwaroghwu ijẹgba ọrhẹ emiamo ne. Omarana, ọwan i vwo imwẹro taghene i Jesu ọrhẹ awan 144,000 na, ine vwẹruọ ebẹnbẹn ọwan ọrhẹ oborẹ ene ru nyerẹn ghelie.

11. Mesoriẹ i Jesu o yono idibo yi nẹ aye i nẹrhomo ne ru ọhọre Osolobrugwẹ obẹ odjuwu?

¹¹ Jesu o yono idibo yi nẹ aye i nẹrhomo ne ru ọhọre Osolobrugwẹ obẹ odjuwu. Mesoriẹ? Ọwan i yonorin uvuẹn Urhomu-ẹmro 3 taghene Echu ro rhiẹ Dẹbolo ọ kparehaso i Jehova. Ọke Echu ọ kparehaso i Jehova hin, Jehova nọ ha uphẹn rẹn Echu ọrhẹ emakashe ri vwa fuevwan ri rhiẹ ikpodje, nẹ aye i daji obẹ odjuwu ibiọke. Omarana, orhiẹ emakashe na ephian ye ru ọhọre Osolobrugwẹ obẹ odjuwu-u. Uvuẹn Urhomu-ẹmro 10, ọwan ine yono riobaro rhọ kpahen Echu ọrhẹ ikpodje na.

12. Me yẹ ekwakwa eva kirighwo ra ta kpahen uvuẹn Revelation 12:⁠10?

¹² Baibol na o djerie phia taghene ogege a ha i Jesu mwu ẹrhẹ Orodje Uvie Osolobrugwẹ hin, nọ samọ lele Echu fiuvweri. (Se Revelation 12:​7-10.) Revelation 12:​10, o dje kpahen ekwakwa eva kirighwo ri phiare. Uvie Osolobrugwẹ ọ tonrhọ ogege a ha i Jesu mwu ẹrhẹ Orodje, Jesu no le Echu nẹ odjuwu rhiẹ akpọ na. Jerẹ oborẹ ọwan ine yono, ekwakwa eva enana e phia vrẹn ne.

13. Me yọ phiare obẹ odjuwu ọke e le Echu nẹ oboran?

¹³ Baibol na o dje kpahen aghọghọ ro gberẹ emakashe ri fuevwan ọke re le Echu ọrhẹ ikpodje yi nẹ odjuwu rhe. Baibol na ọrhọ ta: “Ghọghọ, are idjuwu na ọrhẹ ere rhirhiẹ uvuien!” (Revelation 12:12) Vwarana, ufuoma ọrhẹ okugbe ọ vi ha obẹ odjuwu ne, nime aye ephian e ru ọhọre Osolobrugwẹ.

14. Me yọ phia uvuẹn akpọ na avwọke e le Echu nẹ odjuwu rhe?

¹⁴ Ọrẹn, oborẹ ọ phia uvuẹn otọrakpọ na ọ vẹnẹren omamọ. Ekwakwa imwofẹn a phia rẹn ihworho fọkime  e le i Dẹbolo rhiẹ otọrakpọ na ne, ọ jeghwai “tuekwẹre ọgbogbanhon, nime o rheri taghene ibiọke yo vwori.” (Revelation 12:12) Echu ọ tuekwẹre ọgbogbanhon. E le rie nẹ odjuwu ne, ọ jeghwai rhe taghene ana ghwọghiẹ phẹrẹkpẹ. Echu o ru kemru kemru rọ nọ sabu ru nọ suẹ okpetu, omiamiamo, ọrhẹ ojẹriọ rẹn ituakpọ ephian.

15. Me yẹ ọhọre Osolobrugwẹ kpahen akpọ na?

¹⁵ Ọrẹn, ọhọre Osolobrugwẹ kpahen akpọ na o ji wene-e. Ọ ji guọlọ nẹ ihworho ri gbare i rhirhiẹ akpọ i Paradais bẹmẹdẹ. (Psalm 37:29) Omarana, marhẹ Uvie Osolobrugwẹ ono ru ha ọnana te orugba?

16, 17. Me yẹ Daniel 2:44 o yonirin ọwan kpahen Uvie Osolobrugwẹ?

¹⁶ Aruẹmẹrẹn rọ ha uvuẹn Daniel 2:44 ọrhọ ta: “Uvuẹn ẹdẹ irodje erana, Osolobrugwẹ rọ ha obẹ odjuwu, ọnọ ha uvie owu mwu ra na ja sabu ghwọghọ. A ha Uvie ọnana rẹn ihworho erọrọ-ọ. Nẹ ọnọ ghwọghọ jeghwai fioba rhẹ ọsoso ivie enana, ọye ọvo yo no mevi bẹmẹdẹ.” Me yẹ aruẹmẹrẹn ọrana o yonirin ọwan kpahen Uvie Osolobrugwẹ?

¹⁷ Ọrukaro, o yonirin ọwan taghene Uvie Osolobrugwẹ ọnọ tuẹn usun rhọ “uvuẹn ẹdẹ irodje erana.” Ọnana o mevirhọ taghene usun erọrọ ine rhe suẹn uvuẹn otọrakpọ na ọke Uvie Osolobrugwẹ ọnọ tonrhọ. Ọreva, o yonirin ọwan taghene Uvie Osolobrugwẹ ọnọ rhirhiẹ ye bẹmẹdẹ, usun ọrọrọ o ji wenie-e. Ọresa, uvweri ọnọ homaphia uvwre Uvie Osolobrugwẹ ọrhẹ usun erẹ akpọ na. Uvie Osolobrugwẹ ono fikparobọ, ọye ọvo nẹ ono suẹn akpọ na ephian. Ọke ọrana, ituakpọ ni ne vwo usun rọ mai rhomu kparobọ.

18. Me yẹ odẹ uvweri rọ kẹta uvwre Uvie Osolobrugwẹ ọrhẹ usun akpọ na?

 ¹⁸ Marhẹ Uvie Osolobrugwẹ ono ru fi usun akpọ na kparobọ? Bọmọke uvweri rọ kẹta, re se Armageddon ono te, ikpodje na ina phiẹ ọsoso irodje akpọ na rhọ jeghwai “koko aye hẹrhẹ ẹdẹ uvweri Osolobrugwẹ Ọrọmaigbanhon na.” Itiọrurhomẹmro, usun ituakpọ ọnọ haso Uvie Osolobrugwẹ.—Revelation 16:​14, 16; se Iyẹnrẹn Ra Habaye 10.

19, 20. Mesoriẹ a guọlọ Uvie Osolobrugwẹ no sun akpọ na ephian?

¹⁹ Mesoriẹ a guọlọ Uvie Osolobrugwẹ? Orho riotọre, fọkiẹ iroro esa. Ọrukaro, ọwan ephian iruedandan, omarana, ne kpomẹ jeghwai hwuẹ. Ọrẹn, Baibol na ọ tare taghene obotọre Uvie Osolobrugwẹ, ene nyerẹn bẹmẹdẹ. Itiọrurhomẹmro, John 3:16 ọrhọ ta: “Osolobrugwẹ o vwo ẹguọlọ kpahen akpọ na omamọ, no dje Ọmọyen owu ọvo rẹ ọye o vwori rhe, neneyo kohworho kohworho ro vwo esegburhomẹmro kpahiẹn arha ghwọghiẹ-ẹ, nẹ ono vwo arhọ i bẹmẹdẹ.”

²⁰ Iroro ọreva rọ soriẹ a guọlọ Uvie Osolobrugwẹ yẹ evwọkon ri kinhariẹ ọwan. Ihworho buebun a mọrenfian, aye e ru irueruo ọghware, aye i jeghwai vwo iruemru ọfanrhiẹn. Ituakpọ i sabu ti ekwakwa enana nie-e, ọrẹn Osolobrugwẹ ono ti ekwakwa enana nie. Ana ghwọghọ ihworho re ruẹ ekwakwa ibiobiomu uvuẹn uvweri Armageddon. (Se Psalm 37:10.) Iroro ọresa rọ soriẹ a guọlọ Uvie Osolobrugwẹ, usun ituakpọ i vwiẹlẹre, e ruẹ ọkon, i jeghwai biomu omamọ. Aye e vwo ẹhẹn rẹ aye ina sa ihworho erhumu rhe Osolobrugwẹ-ẹ. Baibol na ọ tare taghene, “onyakpọ o sun onyakpọ riẹ oghwọghọ ye.”—Ecclesiastes 8:⁠9.

21. Marhẹ Uvie na ono ru ha ọhọre Osolobrugwẹ te orugba uvuẹn otọrakpọ na?

 ²¹ Uvweri Armageddon orho hin, Uvie Osolobrugwẹ ọnọ ha ọhọre Osolobrugwẹ te orugba uvuẹn otọrakpọ na ephian. Jerẹ udje, ọnọ ghwọghọ Echu ọrhẹ ikpodje yi. (Revelation 20:​1-3) Orho ru, orho vwo ihworho ri ne kpomu yanghene hwu ghwomara-an. Fọkiẹ otan na, ihworho ephian ri fuevwan ni ne nyerẹn bẹmẹdẹ uvuẹn Paradais. (Revelation 22:​1-3) Uvie na ono ru odẹ Osolobrugwẹ fon. Me yẹ ọnana o mevirhọ? O mevirhọ taghene usun Osolobrugwẹ orho suẹn akpọ na ne, ituakpọ ephian ina họghọ rẹn odẹ i Jehova.—Se Iyẹnrẹn Ra Habaye 21.

22. Marhẹ e ru rhe taghene i Jesu orhiẹ Orodje ọke rọ ha otọrakpọ na yanghene ogege ra rhọmiẹ riẹ odjuwu-u?

²² Jesu o yono idibo yi nẹ aye i nẹrhomo: “Jenẹ Uvie ọnọ rhe.” Omarana, no mwẹro taghene Uvie Osolobrugwẹ ọnọ rhe obaro na. Jehova ọnọ ha usun ọnẹyen mwu jeghwai ha i Jesu mwu ẹrhẹ Orodje. Ogege i Jesu ọ rharhumu riẹ odjuwu ya haye mwu ẹrhẹ Orodje? Ẹjo, ọ hẹrhẹre ibiesuọn. Ẹgbukpe ezẹko a vrẹn ọke ra rhọmọ i Jesu nẹ uhwu, Peter ọrhẹ Paul  ni djerie fiotọre ọke rẹ aye a hunute aruẹmẹrẹn rọ ha uvuẹn Psalm 110:1 taghene o sekpahen i Jesu. Uvuẹn aruẹmẹrẹn na Jehova nọ tare: “Siyẹ obọrhe mẹ, bọmọke mi ne fi evwreghrẹn enọ rhẹ obotọre aghwẹ ọnọ.” (Acts 2:​32-35; Hebrews 10:​12, 13) Marhẹ ono jiri te i Jesu ọnọ hẹrhẹ bọmọke i Jehova ọnọ haye mwu ẹrhẹ Orodje?

23. (a) Ọke ọgo yi Jesu ọ tuẹn usun Uvie Osolobrugwẹ rhọ? (b) Me ye ne yono kpahen uvuẹn urhomu-ẹmro rọ ha kpahen ọnana?

²³ Ẹgbukpe buebun a ki mẹrẹn ẹgbukpe 1914, Ilele Kristi ri vwo omamọ ẹhẹn i vwẹruọ ye taghene ẹgbukpe 1914 ono rhiẹ ẹgbukpe rọ ghanranren uvuẹn aruẹmẹrẹn i Baibol. Ekwakwa ra phia nẹ ẹgbukpe 1914 rhe, i djephia taghene oborẹ aye i tare na urhomẹmro. Jesu ọ tuẹn usun rhọ uvuẹn ẹgbukpe ọrana. (Psalm 110:⁠2) Ọrana ọ vrẹn hin, ne le Echu rhiẹ otọrakpọ na, ekete ọke ọ havwọ na, “ibiọke yo vwori.” (Revelation 12:12) Uvuẹn urhomu-ẹmro rọ ha kpahen ọnana, ene yono ekwakwa erọrọ ri djerie phia taghene ọwan e nyerẹn uvuẹn ọke ọrana ne. Ene ji yono taghene phẹrẹkpẹ Uvie Osolobrugwẹ ọnọ ha ọhọre Osolobrugwẹ te orugba uvuẹn otọrakpọ na.—Se Iyẹnrẹn Ra Habaye 22.