1, 2. Bọgo yẹ ọwan ina mẹrẹn usimirhọ inyenana?

HA ẸHẸN roro taghene wa nya uvuẹn otafe ọke ogiribo o zuẹ. Aruọke na no mwuokuku rhọ, aruọke na no braro, agbranran nọ van. O jiri-i, oso nọ rhọ. Ne wa guọlọ ekete wu na zẹ ro. Oma ọnọ ghini merhuọn wu rha mẹrẹn ekete rọ kare zẹ ro!

² Aruo erhirhiẹ ọrana yẹ ọwan i havwọ inyenana. Erhirhiẹ akpọ na o biomẹrhọ biomẹrhọ. Wu na sabu nọ, ‘Bọgo mi na mẹrẹn usimirhọ?’ Ọbo ijoro na ọrhọ ya: “Mi na ta rẹn i Jehova: ‘Wẹwẹ yẹ ekete mia zẹrua ọrhẹ omẹgbanhon mẹ, Osolobrugwẹ mẹ mi hẹroso.’” (Psalm 91:⁠2) Itiọrurhomẹmro, Jehova ọnọ sabu yẹ ọwan omẹgbanhon re ne nyerẹn ghele ebẹnbẹn ọwan inyenana, ọ jeghwai yẹ ọwan omamọ ifiẹrorhọ kpahen obaro na.

3. Marhẹ i Jehova ono ru sabu rhiẹ ekete ra zẹrua harẹn ọwan?

³ Marhẹ i Jehova ono ru sẹrorẹ ọwan? Ọye ọnọ sa ọwan erhumu nyerẹn ghele ebẹnbẹn re vwori, ọ jeghwai vwo omẹgbanhon ghwẹ kohworho kohworho rọ damoma rọ nọ rhua ẹkuọn vwe ọwan. Ọrhọ tobọ rhianẹ oborẹ obiomurun ọ phia rẹn ọwan inyenana, o mwu rẹ ọwan ẹro taghene i Jehova ono ru ekwakwa serhọ ọke rọ sa obaro na. Baibol na ọrhọ ha urhebro ọnana phia: “Are i sẹrorẹ oma are rhẹ uvuẹn ẹguọlọ Osolobrugwẹ.” (Jude 21) O fori ne ọwan i daji kẹrẹ i Jehova, neneyo ọ sabu sa ọwan erhumu ọke ọgbogbanhon. Ọrẹn, marhẹ ọwan ine ru sabu ru ọrana?

4, 5. Izede ego yi Jehova o dje ẹguọlọ ọnẹyen phia rẹn ọwan?

⁴ Na sabu daji kẹrẹ i Jehova, o fori ne rhe oborẹ  Osolobrugwẹ o vwo ẹguọlọ kpahen ọwan te. Roro kpahen ọsoso oborẹ i Jehova o ru rẹn ọwan ne. Ọ yẹrẹ ọwan otọrakpọ orhorhomu, ọ jeghwai fi ewawọ irhorhomu ọrhẹ eranmo rhọ ye. Ọ jeghwai yẹ ọwan emaren ememerhen ọrhẹ ame rọ fonron ra na da. Nyoma i Baibol na, Jehova o dje odẹ ye ọrhẹ irueruo igbevwunu ọnẹyen phia rẹn ọwan. Maido, o dje ẹguọlọ ro vwo kpahen ọwan phia, nyoma o dje i Jesu ro vwo ẹguọlọ kpahen rhiẹ otọrakpọ na, nọ ha arhọ ye kpahontọre rẹn ọwan. (John 3:16) Fọkiẹ izobo ọrana, ọwan ni vwo obọdẹn ifiẹrorhọ kpahen obaro na.

⁵ Jehova ọ ha Uvie i Messiah na mwu ne, ọnana yẹ igọmẹti rọ nọ ha oja ephian toba phẹrẹkpẹ. Uvie na ono ru akpọ na rhiẹ i Paradais, ekete ihworho ephian ine nyerẹn ọrẹ ufuoma ọrhẹ omamerhomẹ bẹmẹdẹ. (Psalm 37:29) Izede ọrọrọ ri Jehova o dje ẹguọlọ rẹn ọwan, ọyẹ o yono ọwan kpahen izede akpenyerẹn rọ mai rhomu. Ọ jeghwai ta rẹn ọwan na nẹrhomo vwe yi, nime o mwuegbe rọ nọ kerhọ ẹrhomo ọwan. Jehova ọ dabu dje ẹguọlọ ọnẹyen fiotọre rẹn ihworho ephian.

6. Marhẹ wu ne ru rhiabọ dede ẹguọlọ Osolobrugwẹ?

⁶ Marhẹ wu ne ru rhiabọ dede ẹguọlọ Osolobrugwẹ? Dje ọdaremẹro phia kpahen ọsoso oborẹ o ru wẹn. Ọrẹn inyenana, ihworho buebun i vwe dje ọdaremẹro phia-a. Omaran ọ ji havwọ ọke i Jesu ọ ha uvuẹn otọrakpọ na. Ọke owu i Jesu o simi awan ikpe re kpomu oti, owuọwan ọvo yọ rhe mọ kpẹmiẹ. (Luke 17:​12-17) Ọwan i guọlọ họhọ ọhworhare rọ kpẹmẹ i Jesu na. O fori na kpẹmẹ i Jehova ọke ephian.

7. Marhẹ ẹguọlọ ọwan i vwo kpahen i Jehova ono kodo te?

⁷ Ọ jeghwai fo taghene ọwan i dje ẹguọlọ phia rẹn i Jehova. Jesu ọ ta rẹn idibo yi taghene aye ine vi vwo ẹguọlọ  kpahen i Jehova rhẹ ọsoso ọmudu aye, oma aye ọrhẹ ẹhẹn aye. (Se Matthew 22:37.) Me yẹ ọrana o mevirhọ?

8, 9. Marhẹ ene ru djephia rẹn i Jehova taghene ọwan i vwo ẹguọlọ kpahiẹn?

⁸ O teri ra na ghwai ta taghene ọwan i vwo ẹguọlọ kpahen i Jehova? Ẹjo. Ọwan i rhe vwo ẹguọlọ kpahen i Jehova rhẹ ọsoso ọmudu ọwan, oma ọwan, ọrhẹ ẹhẹn ọwan, ne dje ẹguọlọ ọwan phia nyoma irueruo ọwan. (Matthew 7:​16-20) Baibol na ọ dabu yono ọwan taghene erhe vwo ẹguọlọ kpahen Osolobrugwẹ, ọwan ine ru lele ekama enẹyen. Ọrana ọ bẹnren? Ẹjo, nime “ekama enẹyen a ghwa pha-an.”—Se 1 John 5:⁠3.

⁹ Ọwan erhe ruẹ lele oborẹ i Jehova ọ tare, ọwan ni ne nyerẹn omamọ akpọ. (Isaiah 48:​17, 18) Ọrẹn, me yọ nọ ha userhumu rẹn ọwan daji kẹrẹ i Jehova? Jene yono kpahiẹn.

10. Mesoriẹ wu ne rhe yono kpahen i Jehova?

¹⁰ Marhẹ wu ru rhiẹ ugbehian i Jehova? Nyoma uyono i Baibol na, wu me rhe i Jehova rhọ jeghwai vwo omamọ onyerẹnkugbe rhẹ ọye ne. Onyerẹnkugbe ọnana ọ họhọ erhanren wu vwa guọlọ no fun. Jerẹ oborẹ erhanren ọ guọlọ ekokophie nọ sabu bare, omaran wu ne rhe yono kpahen i Jehova ne wu sabu ru onyerẹnkugbe ọnọ rhẹ i Jehova kpẹnkpẹnrhọ.—Proverbs 2:​1-5.

11. Marhẹ oborẹ wu yonorin uvuẹn i Baibol na ono ru hobọte ọmudu ọnọ?

¹¹ We rhe fioma rhọ uyono i Baibol na, ne wu ne yono kpahen ekwakwa ri na hobọte ọmudu ọnọ. Djokarhọ oborẹ oma o ru idibo i Jesu awanva, ọke i Jesu ọ dabu dje aruẹmẹrẹn i Baibol na fiotọre rẹn aye. Aye i rha ta: “Ẹhẹn ọwan ọ havwọ ghwologhwolo ọke rọ tẹmro enana rẹn ọwan uvuẹn izede, rọ dabu dje Eyaya Ọfuanfon na fiotọre rẹn ọwan?”—Luke 24:⁠32.

12, 13. (a) Me yọ nọ sabu phia rẹn ẹguọlọ rẹ ọwan i vwo kpahen Osolobrugwẹ? (b) Marhẹ ọwan ine ru sabu sẹrorẹ ẹguọlọ re vwo kpahen i Jehova?

 ¹² Jerẹ oborẹ o te ẹhẹn idibo na ọke aye e vwẹruọ Eyaya Ọfuanfon na, ọkezẹko, omaran oma ọ je merhuọn ọke we vwẹruọ i Baibol na. Ọnana nọ ha userhumu wẹn rhe i Jehova jeghwai vwo ẹguọlọ kpahiẹn. Wu vwe jenẹ ẹguọlọ ọnana, seriotọre-e.—Matthew 24:⁠12.

¹³ Wu rhe rhiẹ ugbehian Osolobrugwẹ ne, o fori ne wu wian gbangbanhon ne wu sabu sẹrorẹ onyerẹnkugbe ọrana. Wu ne vi rhe yono kpahen i Jehova ọrhẹ i Jesu, jeghwai roro kpahen oborẹ we yono na ọrhẹ oborẹ wu na haye ruiruo lele uvuẹn akpenyerẹn ọnọ. (John 17:⁠3) We rhe se yanghene we rhe yono i Baibol na, gba nọ oma: ‘Me yẹ ọnana o yonirin mẹ kpahen i Jehova? Mesoriẹ mi ne vwo ẹguọlọ kpahen i Jehova rhẹ ọsoso ọmudu mẹ ọrhẹ oma mẹ?’—1 Timothy 4:⁠15.

14. Marhẹ ẹrhomo ono ru sa ọwan erhumu e ru ẹguọlọ re vwo kpahen i Jehova kodo rhọ?

 ¹⁴ Wu rhe vwo omamọ ugbehian, ọke ephian we lelie tẹmro, ọnana nọ lẹrhẹ onyerẹnkugbe are gbanhan. Omaran ọ je havwọ, arha nẹrhomo vwe i Jehova ọke ephian, nọ lẹrhẹ ẹguọlọ re vwo kpahiẹn kodo rhọ. (Se 1 Thessalonians 5:17.) Ẹrhomo omamọ ẹghẹlẹ ro nẹ obẹ Ọsẹ ọwan rọ ha obẹ odjuwu rhe. O fori nẹ ọwan i rha tẹmro riẹn nẹ ẹhẹn sa ọke ephian. (Psalm 62:⁠8) O fo nẹ ọwan i rha vwanriẹn ẹmro owu ọgbọ buebun uvuẹn ẹrhomo ọwa-an, ukpomaran o fori nẹ ẹrhomo ọwan o vi nẹ ẹhẹn ọwan rhe. Itiọrurhomẹmro, erhe yono i Baibol na jeghwai nẹrhomo nẹ ẹhẹn sa, ọwan ni ne rhe ru ẹguọlọ re vwo kpahen i Jehova kodo rhọ.

15, 16. Ukẹro ọgo wa ha ni owian aghwoghwo na?

¹⁵ Orhianẹ ọwan i guọlọ daji kẹrẹ i Jehova, ọ jeghwai fo taghene erhe ghwoghwo rẹn awọrọ kpahen esegburhomẹmro ọwan. Ra na ta rẹn awọrọ kpahen i Jehova, uphẹn ọduado. (Luke 1:74) Ọnana owian i Jesu ọ harẹn Ilele Kristi urhomẹmro ephian. O fori nẹ ọwan ephian i rhe ghwoghwo iyẹnrẹn esiri Uvie Osolobrugwẹ na. Wu ru te omaran ne?—Matthew 24:14; 28:​19, 20.

¹⁶ Ọnyikọ Paul ọ ha owian aghwoghwo na ghanghanren, ọyẹ ọsoriẹ o se yi “efe.” (2 Corinthians 4:⁠7) Ra na ta rẹn awọrọ kpahen i Jehova ọrhẹ ọhọre ọnẹyen, yẹ owian rọ mai ghanren re wu na sabu ru. Ọnana oghọn owu uvuẹn ogame wa harẹn i Jehova, ọ jeghwai vwo ọdaremẹro kpahen oborẹ we ruẹ hariẹn. (Hebrews 6:10) Owian aghwoghwo na ọnọ ha erere wẹn ọrhẹ ihworho ri kerhọ, nime wa ha userhumu rẹn oma ọnọ ọrhẹ awọrọ nẹ aye i sabu ti kẹrẹ i Jehova jeghwai vwo arhọ i bẹmẹdẹ.  (Se 1 Corinthians 15:58.) O vwo owian ọrọrọ rọ nọ sabu yọ omamerhomẹ?

17. Mesoriẹ owian aghwoghwo na o rhiẹ ọrẹ okpakpa?

¹⁷ Owian aghwoghwo na, ọrẹ okpakpa. O fori nẹ ọwan i “ghwoghwo ẹmro na,” na jeghwai “ruie ọrẹ okpakpa.” (2 Timothy 4:⁠2) O fori nẹ ihworho i rhe kpahen Uvie Osolobrugwẹ. Baibol na ọrhọ ta: “Ẹdẹ rode i Jehova o ti kẹrẹ ne! O ti kẹrẹ ne, ọ jeghwai sa rhẹ okpakpa!” Oba na “ọ vwọ samọ kpọke-e!” (Zephaniah 1:14; Habakkuk 2:⁠3) Phẹrẹkpẹ, Jehova ọnọ ghwọghọ akpọ ọkon ọrẹ Echu. Ọrana ọ ki phia, o fori na ha orhetio phia rẹn ihworho nẹ aye i mọ ga i Jehova.

18. Mesoriẹ ene kwomakugbe Ilele Kristi urhomẹmro erọrọ ha ẹga rẹn i Jehova?

¹⁸ Jehova ọ guọlọre taghene ọwan i kwomakugbe Ilele Kristi urhomẹmro erọrọ ha ẹga riẹn. Baibol na ọrhọ ta: “Jenẹ ọwan i roro harẹn owuowọnwan neneyo a sabu dje ẹguọlọ ọrhẹ iruo esiri phia, a vwa sẹrerhumuji okugbe ọrẹ ọwan jerẹ uruemru ihworho ezẹko i vwori-i, ọrẹn jenẹ arha yẹ owuowọnwan uduẹharhaghwẹ, maido rẹ ẹdẹ na o ti kẹrẹ ne na.” (Hebrews 10:​24, 25) O fori na damoma ne riẹ uyono ọke ephian. Iyono na a yẹ ọwan uphẹn ra na ha udu rhẹ owuowọnwan aghwẹ jeghwai bọn ereva ọwan gbanhon.

19. Me yọ nọ sabu ha userhumu rẹn ọwan ne vwo ẹguọlọ kpahen imizu ri ha uvuẹn ukoko na?

¹⁹ We rhe riẹ iyono, wu na mẹrẹn emamọ igbehian ri na ha userhumu wẹn ga i Jehova. Wu na mẹrẹn imizu ehworhare ọrhẹ emẹse ra damoma aye ina ha ẹga rọ fonron rẹn Osolobrugwẹ, jerẹ oborẹ wa ha ẹga riẹn. Jerẹ owẹwẹ, aye ihworho re vwa gba, re ji ruẹ sọ. Aye i rhe ruo sọ, mwuegbe wu na harhomu aye. (Se Colossians 3:13.) Rha tẹnroviẹ omamọ iruemru imizu ri ha uvuẹn ukoko na, we rhe ru omaran, ọnọ ha userhumu wẹn vwo ẹguọlọ kpahen aye jeghwai ti kẹrẹ Jehova rhọ.

20, 21. Me yẹ “obọdẹn akpọ na”?

²⁰ Jehova ọ guọlọre taghene igbehian yen ephian i nyerẹn akpọ rọ mai rhomu kparobọ. Baibol na o yonirin ọwan taghene akpọ rọ sa obaro na, ọnọ vẹnẹ ọrẹ ọwan e nyerẹn inyenana.

²¹ Ọke rọ sa obaro na, ọwan ine nyerẹn bẹmẹdẹ, o rhiẹ ọrẹ ẹgbukpe 70 yanghene 80 ọvo-o. Ọwan ina riẹ amerhen akpọ i bẹmẹdẹ rhẹ oma ọkpokpọ, ufuoma, ọrhẹ omamerhomẹ uvuẹn i Paradais. Ọrana yi Baibol na o seri “obọdẹn akpọ.” Jehova o veri taghene ọnọ yẹ ọwan obọdẹn akpọ na, ọrẹn, ọwan ina vi damoma ru oborẹ ana sabu ru ephian na sabu “sanbọ mwu” obọdẹn akpọ na.—1 Timothy 6:​12, 19.

22. (a) Marhẹ ọwan ine ru sabu “sanbọ mwu obọdẹn akpọ na”? (b) Mesoriẹ ọwan i vwe mwuovwan arhọ i bẹmẹdẹ bi?

²² Marhẹ ọwan ine ru sabu “sanbọ mwu obọdẹn akpọ na”? Ọwan ine vi “rhe ru oborẹ orhomurun” jeghwai “rhe dje uruemru esiri phia.” (1 Timothy 6:18) Ọnana o mevirhọ taghene ana vi ha oborẹ e yonorin uvuẹn i Baibol na ruiruo. Ọrẹn, ọwan i sabu vwo obọdẹn akpọ na nyoma omẹdamu ọwan ọvo-o. Ọwan e mwuovwan arhọ i bẹmẹdẹ bi-i. Ọnana “ẹghẹlẹ ọphẹ” i Jehova o tiobọnu rẹn idibo yi ri sẹrorẹ atamwu kpahiẹn. (Romans 5:15) Jehova ọ ghini guọlọ ha ẹghẹlẹ ọnana rẹn idibo yi ri fuevwan.

23. Mesoriẹ wu na djẹ odjẹ rọ gbare ọke ọnana?

²³ Gba nọ oma, ‘Mia ga Osolobrugwẹ lele izede ro kwerhọ?’ Wu rha mẹriẹn taghene o fori ne wu ru ewene ezẹko, ru omaran kpatakpata. Ọwan i rha hẹroso i Jehova jeghwai ru oborẹ ana sabu ru ephian na họghọ riẹn, Jehova ono rhiẹ ekete ọwan a zẹrua. Ọye ọnọ hẹrote idibo yi ri fuevwan uvuẹn ẹdẹ ri koba ọrẹ akpọ ọkon Echu na. Ọke ọrana, Jehova nẹ ono ruie nẹ ọwan i nyerẹn  bẹmẹdẹ uvuẹn i Paradais, jerẹ oborẹ o vive yi rhotọre. Itiọrurhomẹmro, wu na sabu vwo obọdẹn akpọ na, orhianẹ wu djẹ odjẹ rọ gbare ọke ọnana!