Oborẹ i Baibol na ọ Tare

“Iruẹn Gbalogbalo”—O Fori ne wu Fiomarhọ Aye?

“INYENANA IHWORHO BUEBUN I VWE RHE NI IRUẸN GBALOGBALO RA HAPHIA-A, UKPOMARAN AYE NE FIOMARHỌ IRUẸN ENANA, JERẸ IRUẸN RE PHO NẸ ẸROPLENI RUOTỌRE, IRUẸN RE RHENREN RIẸ OBERUN IGBENU RI RIERUN OMAMỌ, YANGHENE RE LELE IRHENRIN RI MWUOFẸN RHẸNRHẸN.”—ỌBE IYẸNRẸN RE SE WILLOW GLEN RESIDENT

ẸMRO ọnana o dje kpahen oborẹ iruẹn i havwọ inyenana. Ihworho buebun inyenana i vwo ẹguọlọ kpahen iruẹn gbalogbalo. * Ihworho ezẹko e ji ruẹn aruẹ iruẹn enana ọke aye a ghwa imotosaikoro, imoto, ọrhẹ owọ. Jerẹ oborẹ ọbe iyẹnrẹn na ọ tare, ihworho buebun e vwobọrhọ aruẹ iruẹn enana neneyo aye i sabu fi ofẹn kparobọ jeghwai mẹrẹn omamerhomẹ omobọ.”

Ọrẹn, iruẹn enana na rhua ẹkuọn vwe ihworho buebun. Ihworho i rha dẹrẹ iruẹn ri serhọ rhiẹ iruẹn gbalogbalo, nọ ha ẹkuọn vwe aye. Uvuẹn ẹkwotọre i United States uvwre ẹgbukpe 1997, ihworho ra kpara riẹ ihọsipita ri konron fọkiẹ aruẹ iruẹn enana ni bunrun omamọ. Uvuẹn iruẹn ezẹko dede erhirhiẹ na o wene, nime iruẹn ezẹko a tobọ suẹ uhwu kpe ihworho re ruẹn aye. Ihworho re ruiruẹn enana i rhe kpahen imwofẹn enana. Ọmase owu ro ji ruẹn aruẹ iruẹn ọnana nọ tare: “Ọke ephian mie roro taghene mi ne hwuo.” Ọhworhare owu rọ dabu ten ona iruẹn re ruẹn uvuẹn imito nọ tare taghene “wa rha ko-on, nọyẹ wu vwe fiomarhọ iruẹn na te-e.”

Sekpahen erhirhiẹ enana, ukẹro ọgo yo fori nẹ Ilele Kristi i ha ni aruẹ iruẹn enana? Marhẹ i Baibol na ono ru ha userhumu rẹn ọwan brorhiẹn sẹ ene vwobọrhọ aruẹ iruẹn ezẹko yanghene e vwobọrhọ aye-e? Ana sabu kpahenrhọ onọ na erhe roro kpahen ukẹro rẹ Osolobrugwẹ ọ ha ni arhọ.

Ukẹro Osolobrugwẹ ọ ha ni Arhọ

Baibol na ọ ta rẹn ọwan taghene Jehova yẹ “esiri arhọ.” (Psalm 36:9) Jehova yọ ma ituakpọ, ọ ji hẹrote aye nyoma ro tiobọnẹ oborẹ aye i guọlọre rẹn aye nẹ aye i sabu riamerhen akpenyerẹn. (Psalm 139:14; Acts 14:16, 17; 17:24-28) Ene kwerhọ ye taghene Jehova o fiẹrorhọ ye taghene ana hẹrote arhọ ọwan. Irhi ọrhẹ iruemru-urhi ro tiobọnu rẹn agbamwa Israel, ọ ha userhumu rẹn aye rhe oborẹ arhọ ọ ghanren te riẹn.

Jehova o tiobọnu irhi rẹn ihworho yi, ri na ha userhumu rẹn aye sẹrorẹ arhọ awọrọ. Ohworho orho hwu nime onyẹ Israel owu ọ nyalele urhi na-a, ana ha oja riẹ ọrọ riẹ iborhin na. Jerẹ udje, e jurhi rẹn ọrovwoghwa taghene ọ gbogba rhẹ oberun oghwa ye. Nime ohworho orho se nẹ oberun oghwa na jeghwai hwu, ọrovwoghwa na ọ riẹ iborhin ọbara ne. (Deuteronomy 22:8) Erhuẹn ọrhọ ha ighorie bọmọ ohworho hwu kpregede, a mọrọn ọro vwo erhuẹn na-a. Ọrẹn, orhianẹ erhuẹn na o vwo uruemru rọ ha ighorie bọmọ ihworho, na ji ta rẹn ọro vworie kpahiẹn, ọrẹn o kwe hẹrote erhuẹn na-a, erhuẹn na orho kpe ohworho hwu, ọnọ sabu lele fiẹ uhwu ọro vwo erhuẹn na nime ọ riẹ iborhin ọbara. (Exodus 21:28, 29) Ra mẹriẹn taghene arhọ ọghanren rẹn i Jehova na, no tiobọnẹ irhi enana neneyo ọwan i sabu hẹrote arhọ ọwan.

Idibo i Jehova ri vwo ẹguọlọ kpahiẹn i rheri taghene o fo ne ruiruẹn gbalogbalo-o, orhianẹ a tobọ jurhi kpahiẹ-ẹn. Uvuẹn iyẹnrẹn i Baibol owu, David nọ tare taghene manẹ o rhomu orhianẹ ọ sabu “da ame nẹ edje owu rọ ha uvuẹn i Bethlehem.” Ọke ọrana, itu i Philistine ye suẹn i Bethlehem. Ọke isodja i David e rhon oborẹ ọ tare, awansa usuẹn aye ni ruẹ uvuẹn ọko itu i Philistine na, aye ni vo ame nẹ uvuẹn edje rọ ha uvuẹn i Bethlehem, aye ni ha ame na vwe i David. Marhẹ i David ọ kpahenrhọ ye lele? O kwe da ame na-a, ukpomaran no rhie ame no fughwẹ. Nọ tare: “Ono rhiẹ oborẹ ọsọre ha mẹ ọrhẹ Osolobrugwẹ mẹ, mi rhe ruẹ emru ọnana! O fori ne mi ghini da ọbara ehworhare enana, ri fi arhọ aye rhẹ erhirhiẹ ofẹn? Fọkime aye i fi arhọ aye rhẹ erhirhiẹ ofẹn aye i ki sabu vo ame na rhe.” (1 Chronicles 11:17-19) Harẹn i David, ọsọre ne fi arhọ rhẹ erhirhiẹ ofẹn na sabu mẹrẹn evwẹnvuọn omobọ.

Uvuẹn emena arudo owu, Jesu o ji ruẹ oborẹ ọ họhọ omana ọke i Dẹbolo ọ ta riẹn no pho nẹ oberun oghwa ẹga na ruotọre, nọ sabu rhẹ sẹ emakashe na ina sabu sẹroriẹ nẹ ẹkuọn. Jesu nọ ta riẹn: “Wu vwa vi damu i Jehova Osolobrugwẹ ọnọ ni-i.” (Matthew 4:5-7) Itiọrurhomẹmro, David ọrhẹ Jesu i mẹrẹnvwrurhe taghene ọsọre uvuẹn ukẹro i Osolobrugwẹ ne vwobọrhọ irueruo ri na sabu fi arhọ ọwan rhẹ erhirhiẹ imwofẹn.

Idje enana ina sabu lẹrhẹ ọwan rhe roro, ‘Marhẹ ene ru rhe sẹ iruẹn o mwuofẹn yanghene o mwuofẹ-ẹn? Ra mẹriẹn taghene a dẹrẹ iruẹn buebun ri serhọ rhiẹ iruẹn gbalogbalo ne, marhẹ ene ru rhe oborẹ ene ruẹn aruẹ iruẹn ọrana lele?’

O Fori ne Ruiruẹn Gbalogbalo Ọrhọ Tobọ Rhianẹ o Vwo Imwofẹn?

Na sabu brorhiẹn ro serhọ, o fori na dabu roro kpahen aruẹ iruẹn ra guọlọ vwobọrhọ. Jerẹ udje, ana sabu nọ oma ọwan, ‘Iruẹn ọnana ọ kiki lẹrhẹ ihworho kuan? Mi vwo ona ọrhẹ ekwakwa ri na sabu lẹrhe me vabọ ẹkuọn? Me yo no nerhumie rhe orhianẹ mi seri yanghene emru nọ sọre ọke mie ruiruẹn na? Mi na kon ẹkuọn ọgbogbanhon yanghene tobọ hwu dede, gbinẹ ẹkuọn na ọ gbanha-an?’

Olele Kristi ọrhọ ha arudo ruiruẹn gbalogbalo, ọnana ọnọ sabu ghwọghọ onyerẹnkugbe ro vwori rhi Jehova, habaye o ji rhiẹ omamọ udje uvuẹn ukoko na-a. (1 Timothy 3:2, 8-10; 4:12; Titus 2:6-8) Omarana, arha tobọ ruiruẹn dede, o fori ne rhe roro kpahen i Jehova ọrhẹ oborẹ arhọ ọghanren te riẹn.

[Ekete Ra Djokarhọ]