OBORẸ IHWORHO A TA

Ihworho ezẹko e nie taghene ibikoro ọ vwọ suẹ ẹkuọ-ọn, takpu aye i fariẹ lele urhi. Igho ra mẹrẹn nẹ aruẹ ibikoro ezẹko sa, a haye sa ihworho erhumu.

OBORẸ I BAIBOL NA Ọ TARE

O vwo ekete owuorowu uvuẹn i Baibol na rọ hunute ibikoro-o. Ọrẹn, o vwo iruemru-urhi sansan ri dje ukẹro Osolobrugwẹ ọ ha ni ibikoro efi.

Ihworho re fibikoro e vwo ẹhẹn aye ina riẹ igho awọrọ i kpare fughwẹ, ọnana ọ kparehasuẹ orhetio i Baibol na rọ tare taghene a “kẹnoma rẹn aruẹ ufiuvwele ephian.” (Luke 12:15) Ufiuvwele yọ lẹrhẹ ihworho fibikoro. Uvuẹn ekete re fibikoro, a ta rẹn ihworho taghene aye ina mẹrẹn igho buebun, ọrẹn ọgbọ buebun ọrana ofian, nime aye i rheri taghene ọnana ọnọ lẹrhẹ aye ha igho buebun fibikoro na. Ukperẹ ibikoro ọnọ lẹrhẹ ohworho kẹnoma rẹn ufiuvwele, nọ lẹrhẹ ihworho vwo ufiuvwele igho omamọ.

Ihworho re fibikoro e roro kpahen oma aye ọvo, nime aye a guọlọ riẹ igho rẹ awọrọ i kpare fughwẹ. Ọrẹn, Baibol na ọ ha urhebro phia taghene “jenẹ owuowọnwan guọlọ ọdamẹ ọreva ye, o vwo rhiẹ ọdamẹ ọnẹyen ọvo-ọ.” (1 Corinthians 10:24) Habaye, owu usuẹn Akama Ikpe na ọrhọ ta: ‘Are i vwe vwo ufiuvwele kpahen . . . oborẹ ọreva are o vwori-i.’ (Exodus 20:17) Ohworho ro fibikoro ọrhọ ha ẹhẹn kpahiẹn, no fiẹrorhọ taghene awọrọ ina kpare igho aye fughwẹ nọ sabu mẹrẹn erere nẹ uvuien rhe.

Baibol na ọ ji ha orhetio rẹn ọwan taghene e vwe vwo imwẹro kpahen atarhe-e. Uvuẹn Israel ọke ahwanren, o vwo ihworho ezẹko ri vwe vwo esegburhomẹmro kpahen Osolobrugwẹ, aye ne “rhie enyo rhẹ iko harẹn osolobrugwẹ Atarhe.” Oma ọ merhen Osolobrugwẹ kpahen uruemru ọrana? Ẹjo, nọ ta rẹn aye: “Are ne ru oborẹ o biomurun uvuẹn ukẹro mẹ, are ne ruẹ oborẹ o tun mẹ oma.”—Isaiah 65:11, 12.

Itiọrurhomẹmro uvuẹn ekete ezẹko uvuẹn akpọ na, a ha igho ibikoro kwosa isukuru, ọrhẹ igho erọrọ re toroba eruriaro amwa na. Ọrẹn oborẹ a ha igho ruiruo lele o mevirhọ taghene oborẹ e ru mẹrẹn igho na o serhọ-ọ, nime ere fibikoro i vwo ufiuvwele, aye e roro rẹn oma aye ọvo, aye a ji guọlọ ekwakwa awọrọ.

“Are i vwe vwo ufiuvwele kpahen oborẹ ọreva are o vwori-i.”—Exodus 20:17.

OBORẸ I BAIBOL NA Ọ TARE

Baibol na ọ ha orhetio rẹn ọwan taghene “otu ri guọlọ fe, ne se rhẹ ọdamuni kugbe ufi ọrhẹ ojemẹ akpa rọ suẹ ẹkuọn ro suẹn ihworho riẹ oghwọghọ ọrhẹ uhwu.” (1 Timothy 6:9) Uruemru re fibikoro o jiri uruemru ufiuvwele, ufiuvwele o biomurun omamọ te erhirhiẹ ri Baibol na ọ ta taghene, “ufiuvwele” ọ ha usuẹn iruemru ihworho i vwori, ro fori na kẹnoma riẹn.—Ephesians 5:3.

Nime uruemru re fibikoro o jiri efe okpakpa, nọ lẹrhẹ ihworho vwo ẹguọlọ igho, ro rhiẹ oborẹ i Baibol ọ tare taghene yẹ “esiri kemru kemru rọ rhua ẹkuọn sa.” Ojemẹ re ne fe, ọnọ sabu gbanhon omamọ te erhirhiẹ rọ nọ suẹ ọfiamu ọgbogbanhon, jeghwai kpe esegburhomẹmro ohworho o vwo kpahen Osolobrugwẹ. Baibol na ọ ha ihworho ri rhiẹ evrẹn harẹn ẹguọlọ igho dje ihworho ri “dumu oma aye ephian rhẹ omiamiamo buebun.”—1 Timothy 6:10.

Ufiuvwele ọ vwọ lẹrhẹ ohworho vwo ẹhẹn otemẹ kpahen oborẹ aye i vwori-i, ọ vwọ ji lẹrhẹ aye vwo omamerhomẹ-ẹ. “Ohworho ro vwo ẹguọlọ kpahen idọlọ efuanfon, idọlọ efuanfon i vwa da ye ẹro-o, omaran ji te ohworho ro vwo ẹguọlọ kpahen igho.”—Ecclesiastes 5:10.

Ihworho buebun ra riẹriẹ vwobọrhọ uruemru re fibikoro, i rhiẹ ọvrẹn harẹn uruemru na ne. Obẹnbẹn ọnana ọ ha ekete ephian, uvuẹn ẹkwotọre i United States ọvo, iduduru ihworho ye fibikoro uvuien.

Isẹ owu nọ tare: “Arha ha ufiuvwele ha oborẹ ohworho ọ ha riuku, ebrurhọ ọ vwọ samọ rhirhiẹ ye obẹta ye-e.” (Proverbs 20:21) Uruemru re fibikoro ọ lẹrhẹ ihworho buebun riosa ne, ọ lẹrhẹ ezẹko rhiẹ ivwiegbere, ezẹko i kpare iruo aye fughwẹ, omaran ji te orọnmo ọrhẹ igbehian aye. Arha nyalele ọkpọvi Baibol na, ọnọ sabu ha userhumu rẹn ohworho kẹnoma rẹn ẹkuọn rẹ ibikoro ọ rhua sa, aye ine ji vwo omamerhomẹ.

“Otu ri guọlọ fe, ne se rhẹ ọdamuni kugbe ufi ọrhẹ ojemẹ akpa rọ suẹ ẹkuọn ro suẹn ihworho riẹ oghwọghọ ọrhẹ uhwu.”—1 Timothy 6:9.