1. Mesoriẹ omebrurhame o rhiẹ idjaghwẹ rọ ghanranren omamọ? (Mẹrẹn ifoto rọ ha uvuẹn ọtonrhọ uyono na.)

KẸGBUKPE kẹgbukpe, ihworho buebun ra ha i Baibol yono e bromarhame. Buebun usuẹn aye yẹ iphuphẹn ọrhẹ emọ ri joma te iphuphẹn ne. Ọkezẹko, esẹ ọrhẹ izu aye Iseri Jehova. Wẹwẹ owuọwan usuẹn aye? Orho rhiẹ omaran, a dabu kpẹmuọ omamọ. A vi guọlọ taghene Ilele Kristi ephian i bromarhame, omebrurhame yẹ idjaghwẹ rọ mai ghanren ra na kpare na sabu vwo usimirhọ.​—⁠Matt. 28:​19, 20; 1 Pet. 3:⁠21.

2. Mesoriẹ o vwo fo na zofẹn yanghene kẹnoma rẹn omẹhakpahontọre?

² Dedevwo omebrurhame o lele fiẹ ebrurhọ, o ji vwo ewian buebun ra na ji wian. Izede ọgo? Wu kpahenrhọ ee ẹdẹ we bromarhame, ọke ra nọ onọ na, “Nyoma izobo otan ọrẹ i Jesu Kristi na, wu ghwẹriẹ nẹ edandan enọ ne, jeghwai homakpahontọre rẹn i Jehova taghene wu ne ru ọhọre ọnẹyen?” Omebrurhame ọnọ, yo ghini djephia taghene wu homakpahontọre rẹn i Jehova ne. Ọnana ive wu ve rẹn i Jehova, taghene wu ne vwo ẹguọlọ kpahiẹn jeghwai ha ogame ọnẹyen karo uvuẹn enyerakpọ ọnọ. Ọnana  ive ọghoghanren omamọ. O fori ne wu viẹ oja fọkime wu bromarhame? Ẹjo, o fo-o. O vwo oborẹ o rhomu ghwẹ ọrẹ wu na homakpahontọre rẹn i Jehova-a. Roro kpahen ọnana! Ohworho rọ vwọ ha obọrẹ i Jehova ọ ha otọre usun i Dẹbolo. Dẹbolo o vwo omamerhomẹ kpahen esimirhọ ọnọ-ọ. Ọrẹn, oma ọnọ merhiẹn wu rhe hwu fọkime wu hobọtua ye tiẹn usun i Jehova.

3. Ebrurhọ ego ya mẹrẹn arha homakpahontọre rẹn i Jehova?

³ Ọrẹ ovẹnẹ, roro kpahen ebrurhọ wu mẹrẹn ne nime wu homakpahontọre rẹn i Jehova jeghwai bromarhame ne. Ra mẹriẹn taghene wu homakpahontọre rẹn i Jehova ne na, ne wu na sabu ta rhẹ imwẹro: “Jehova ọ ha obọ ọnẹmẹ; mi zofẹ-ẹn. Me yẹ onyakpọ ọnọ sabu ru mẹ?” (Ps. 118:⁠6) Itiọrurhomẹmro, oma ọnọ merhen i Jehova kpahuọn wu rha hobọtua ye.

4, 5. (a) Izede ego yẹ omẹhakpahontọre o rhiẹ orhienbro omobọ? (b) Ebẹnbẹn ego yẹ iphuphẹn a dẹrughwaroghwẹ?

⁴ O fo ne wu roro taghene wẹwẹ ọrhẹ ekrun ọnọ yi vwo onyerẹnkugbe ọnọ rhẹ i Jehova-a. Ọrẹn, ọrhọ tobọ rhianẹ we ji lele ọsẹ ọrhẹ izu ọnọ rhirhiẹ, wẹwẹ ọvo yi na sabu wian esimirhọ ọnọ. Mesoriẹ ọ ghanren na karorhọ ọnana? Fọkime wu sabu mẹrẹn oborẹ ọnọ phia obaro na-a. Jerẹ udje, orhianẹ we te uphuphẹn vwẹre wu ki bromarhame-e, ọkezẹko, wu na dẹrughwaroghwu ebẹnbẹn ọrhẹ ọhiẹn ekpokpọ ọke wu te uphuphẹn ne. Ọgbọtọ owu ro rhiẹ uphuphẹn nọ tare: “Emọ ri rhiẹ Iseri Jehova, i vwa ghwai tuekwẹre nime otuẹdẹre aye e kwe yẹ aye ẹghẹlẹ ọke aye a riorẹ ẹdẹ re vwiẹ ohworho uvuẹn isukuru-u. Ọrẹn, aye i rhe te ọke oruru ehware ọ gbanhon omamọ ne, o fori nẹ aye i vwo imwẹro taghene odjẹ rọ mai rhomu yẹ ọrẹ aye ina mọrọn irhi Jehova.”

⁵ Itiọrurhomẹmro, iphuphẹn a dẹrughwaroghwẹ egbobọse ekpokpọ ọke ephian. Ihworho ri bromarhame ọke aye e te imirẹghwa, e ji rhieromẹrẹn edamuni esegburhomẹmro aye. Aye ina sabu dẹrughwaroghwu edamuni uvuẹn orọnmo aye, je vwo omọkpokpọ, yanghene je vwo iruo. Itiọrurhomẹmro, kohworho kohworho ọnọ dẹrughwaroghwu erhirhiẹ rọ nọ sabu damu esegburhomẹmro ro vwori kpahen i Jehova ni.​—⁠Jas. 1:​12-14.

6. (a) Mesoriẹ a ta taghene omẹhakpahontọre ọnọ o vwo ughwru-u? (b) Me yẹ Philippians 4:​11-13 o yoniruo?

⁶ Ne wu sabu sẹrorẹ atamwu ọnọ, o fori ne wu karorhọ taghene omẹhakpahontọre ọnọ rẹn i Jehova o vwo ughwru-u. Ọnana o mevirhọ taghene wu ve rẹn i Jehova ne taghene wu na ga ye, orhianẹ eri vwiẹruọ yanghene igbehian enọ, i vwa ga ye ghwomara-an. (Ps. 27:10) Kerhirhiẹ kerhirhiẹ, nyoma userhumu i Jehova, wu na sabu vwo omẹgbanhon wu ne nyerẹnmwu ive omẹhakpahontọre ọnọ​—⁠Se Philippians 4:​11-13.

7. Me yo mevirhọ re wu na wian usimi ọnọ phia “rhẹ ofẹn kugbe ighweghwe”?

⁷ Jehova ọ guọlọre ne wu rhiẹ ugbehian yen. Ọrẹn, ne wu sabu sẹrorẹ ugbehian ọrana jeghwai vwo usimirhọ ọ lọhọ-ọ. Philippians 2:12 ọrhọ ta: “Are i rha wian usimi are phia rhẹ ofẹn kugbe ighweghwe.” Ẹmro erana i djephia taghene o fori ne wu rhe oborẹ wu ne ru sẹrorẹ onyerẹnkugbe ọnọ rhẹ i Jehova ọrhọ tobọ rhianẹ wu dẹrughwaroghwu ẹkparehaso. O fo ne wu hẹroso oma pha-an. Ezẹko usuẹn ihworho ri ga i Jehova ọke jijiri ne, i ji beghe ọke oru. Omarana, idjaghwẹ ego ye wu na sabu kpare, ne wu sabu vwo usimirhọ?

8. Me yẹ uyono omobọ o sekpahen, mesoriẹ ọ ghanren?

⁸ Na sabu vwo omamọ onyerẹnkugbe rhẹ i Jehova, o fori na tẹmro riẹn jeghwai  kerhọ ye. Uyono omobọ ọwan yẹ izede kirighwo ra na sabu kerhọ Osolobrugwẹ. Ọnana o mevirhọ ọrẹ ene vwo irherhe, nyoma ese, ọrhẹ eroro kodo kpahen Ẹmro Osolobrugwẹ kugbe ẹbe ukoko na. Ọrẹn, we ruẹ ọnana, karorhọ taghene uyono i Baibol ọ vẹnẹ iyono isukuru. O fo na sẹrorẹ irherhe rhẹ urhomu na sabu vrẹn ọdamuni jerẹ oborẹ e ruẹ uvuẹn isukuru-u. Uyono ro mwidjẹn ọ họhọ ugbo onya rọ nọ ha userhumu rẹn ọwan rhe jeghwai mẹrẹn iruemru ri Jehova o vwori vwrurhe. Ọnana ọnọ lẹrhẹ ọwan ti kẹrẹ i Jehova, ọye nẹ ọnọ jeghwai ti kẹrẹ ọwan.—Jas. 4:8.

9. Ekwakwa ego yi ha userhumu wẹn ru uyono omobọ ro mwidjẹn ne?

⁹ Ukoko i Jehova ọ kwaphiẹ ekwakwa buebun rhọ, ni sa owẹwẹ erhumu ru ẹkwaphiẹrhotọre uyono omobọ ọnọ no mwidjẹn. Jerẹ udje, ẹkwaphiẹrhotọre na “Bible Study Activities” rọ ha oghọn na “Teenagers” uvuẹn jw.org, ọnọ sabu ha userhumu wẹn yono ekwakwa kirighwo nẹ ikuegbe i Baibol rhe. Habaye, oghọn uyono uvuẹn i jw.org, ro vwo urhomu-ẹmro “What Does the Bible Really Teach?” ọnọ sabu ha userhumu wẹn bọn imwẹro wu vwori kpahen esegburhomẹmro ọnọ gbanhon. Oghọn ọnana ọnọ ha userhumu wẹn yono oborẹ wu ne ru dje oborẹ wu vwo esegburhomẹmro kpahen rẹn awọrọ. Wu na ji sabu mẹrẹn eghwẹmro erọrọ kpahen oborẹ uyono ọnọ ono ru sabu mwidjẹn uvuẹn urhomu-ẹmro na, “Young People Ask . . . How Can I Make Bible Reading Enjoyable?” rọ ha Awake! ọrẹ April 2009. Itiọrurhomẹmro, uyono ọrhẹ eroro kodo, ekwakwa kirighwo ri na sabu ha userhumu wẹn vwo usimirhọ.—Se Psalm 119:105.

10. Mesoriẹ ẹrhomo ẹnẹ o rhiẹ emru ọghoghanren rẹn Ilele Kristi ri bromarhame ne?

¹⁰ Uyono omobọ izede ra sabu kerhọ Osolobrugwẹ, ọrẹn, ẹrhomo ẹnẹ ye lelie tẹmro. O fo nẹ Olele Kristi ọ ha ukẹro sakamu ni ẹrhomo ẹnẹ-ẹ; yanghene o nie jerẹ umwu rọ lẹrhẹ ohworho vwo efikparobọ-ọ. Ukpomaran, ẹrhomo ẹnẹ izede ra tẹmro rhẹ Ọmemama ọwan. Jehova ọ guọlọre ne wu tẹmro riẹn. (Se Philippians 4:⁠6.) Wu rha dẹrughwaroghwu ọfiamu, urhebro i Baibol ọ haphia yẹ “doron ebẹnbẹn enọ vwe i Jehova.” (Ps. 55:22)  Wu vwo esegburhomẹmro kpahen ọnana? Imizu ehworhare ọrhẹ emẹse buebun i ghini mẹrẹn userhumu nẹ urhebro ọrana ne. Itiọrurhomẹmro, ọnọ ji ha userhumu wẹn!

11. Mesoriẹ o fo na rha kpẹmẹ i Jehova ọke ephian?

¹¹ Ẹrhomo ẹnẹ orhiẹ uphẹn ra na nekpẹn userhumu mie i Jehova ọvo-o. Ukpomaran, Baibol na ọrhọ ta: “Are i jeghwai dje ekpẹmẹ phia.” (Col. 3:15) Ọkezẹko, ebẹnbẹn re vwori ọnọ sabu lẹrhẹ ebrurhọ ra mẹrẹnren sẹrẹ ọwan ẹro. Wu na sabu roro kpahen ekwakwa esa ri na sabu lẹrhuọ rha kpẹmẹ i Jehova kẹdẹkẹdẹ? Omarana, gba rha kpẹmẹ i Jehova nyoma ẹrhomo ẹnẹ fọkiẹ ekwakwa erana. Uphuphẹn owu re se Abigail ro bromarhame ọke rọ ha ẹgbukpe 12, nọ tare: “Mi rheri taghene i Jehova o mwuovwan ujiri ọwan ghwẹ ohworho ọrọrọ uvuẹn akpọ na ephian. O fori na rha kpẹmiẹ ọke ephian fọkiẹ ẹghẹlẹ sansan ro tiobọnu rẹn ọwan. Ọke owu ni mi rhon ohworho rọ tare: Orhianẹ oborẹ wu kpẹmẹ i Jehova kpahen yẹ ọye ono tiobọnu wẹn wu rha rhọmọ kẹdẹkẹdẹ, me wu ne vwo?” *

12, 13. Mesoriẹ o rhiẹ oborẹ ọ ghanranren re ne roro kpahen oborẹ i Jehova o ru dje orhorhomu ọnẹyen rẹn ọwan ne?

¹² Orodje David, ri Jehova o simi nẹ ebẹnbẹn buebun, nọ tare uvuẹn ijoro: “Mẹriẹnvwrurhe taghene i Jehova omamọ ohworho, omamerhomẹ ọ havwiẹ harẹn ohworho rọ ha riẹ ru ekete ra zẹrua.” (Ps. 34:⁠8) Ekete i Baibol ọrana o djephia taghene oborẹ e rhiẹromẹrẹn ọ ghanranren omamọ. We rhe se i Baibol na, ẹbe ukoko na jeghwai riẹ uyono ukoko na, we yono kpahen ikuegbe ihworho ri Jehova ọ ha userhumu rẹn aye sabu sẹrorẹ emevigbanhon aye. Ọrẹn, we ruẹ riaro na, o fori ne wu mẹrẹn abọ i Jehova uvuẹn enyerakpọ ọnọ. Wu mẹrẹn orhorhomu i Jehova uvuẹn enyerakpọ ọnọ ne?

¹³ Ihworho i Jehova ephian i rhiẹromẹrẹn orhorhomu ọnẹyen izede owu ne. Nọyẹ, ọrẹ i Jehova o se ọwan ephian ne ti kẹriẹ ọrhẹ ọmọyen. Jesu ọrhọ ta: “O vwo ohworho owuorowu rọ nọ sabu bru mẹ rhe-e, jokpanẹ Ọsẹ na ro djeri mẹ rhe o serie.” (John 6:44) Wu rorori taghene ẹmro erana i sekpahuọn? Uphuphẹn ọnọ sabu rhe roro, ‘Jehova yo se ọsẹ mẹ ọrhẹ izu mẹ, mẹmẹ i ghwai nyalele aye.’ Ọrẹn, ọke wa homakpahontọre jeghwai bromarhame hin, ne wu djephia taghene wẹwẹ ugbehian i Jehova. Omarana, Jehova no mo rhe owẹwẹ rhẹ ugbehian yen. Baibol na ọrhọ ta: “Osolobrugwẹ o rhe kohworho kohworho ro vwo ẹguọlọ kpahiẹn.” (1 Cor. 8:⁠3) Ha ukẹro ọghoghanren ni uphẹn wu na ga i Jehova.

14, 15. Marhẹ ẹmro eghwoghwo ono ru lẹrhẹ esegburhomẹmro ọnọ gbanhon?

¹⁴ Izede ọrọrọ wu na mẹrẹn orhorhomu i Jehova yẹ ọrẹ wu ne rhiẹromẹrẹn userhumu ọnẹyen ọke we ghwoghwo rẹn awọrọ. Wu na sabu ru aghwoghwo afiede yanghene ghwoghwo uvuẹn isukuru. O rhiẹ oborẹ ọ bẹn rẹn ihworho ezẹko rẹ aye ine ghwoghwo rẹn igbehian aye. Fọkime aye e rhe oborẹ igbehian aye na ine ruo-o. Ọnọ ji sabu bẹn omamọ orhianẹ wa tẹmro rẹn otu ukperẹ ono rhiẹ owuowan ọvo. Me yọ nọ sabu ha userhumu wẹn?

¹⁵ Ọrukaro, roro kpahen oborẹ ọsoriẹ we vwo imwẹro. Eghọn uyono uvuẹn jw.org ra ha userhumu rẹn ọwan vwo imwẹro kpahen oborẹ e rheri, i havwiẹ uvuẹn edjadjẹ ọnọ? Orhianẹ we rhe sẹ aye i havwiẹ-ẹ, dabu mwẹro rhotọre guọliẹ. A  kwaphierẹ aye rhọ nẹ aye i ha userhumu wẹn roro kpahen oborẹ wu vwo imwẹro kpahen, oborẹ ọsoriẹ we vwo imwẹro kpahiẹn, ọrhẹ oborẹ wu ne ru djeyi fiotọre rẹn awọrọ. Wu rhe vwo imwẹro ọgbogbanhon jeghwai dabu mwuegbe, wu ne vwo omwemẹ wu na ta rẹn awọrọ kpahen odẹ i Jehova.​—⁠Jer. 20:​8, 9.

16. Me yọ nọ ha userhumu wẹn sabu ta rẹn awọrọ kpahen oborẹ wu vwo imwẹro kpahen?

¹⁶ Ọrhọ tobọ rhianẹ wu mwuegbe ne, ọnọ ji sabu bẹn wu ne ghwoghwo rẹn awọrọ. Omizu ọmase owu rọ ha ẹgbukpe 18, ro bromarhame ọke rọ ha ẹgbukpe 13, nọ tare, “Mi rhe oborẹ mi vwo esegburhomẹmro kpahen, ọrẹn, ọ bẹn mia sabu ta ye rẹn awọrọ ọkezẹko.” Marhẹ o ru fi obẹnbẹn na kparobọ? Omizu na nọ tare, “Mia ghwai lele igbehian mẹ tẹmro kpekpa. Ihworho mie lele riẹ isukuru a ta kpahen oborẹ aye ruẹ ọke ephian. Omarana, ofẹn o vwo rho mwu mẹ mi na ta kpahen oborẹ mie ruẹ-ẹ. Omarana, ni mia ta kpahen oborẹ mi ruru, jerẹ udje, mia ta: ‘Ẹdẹ owu mie lele ohworho yono i Baibol na, . . . ’ Orho ru, ni mia ta kpahen oborẹ ọsoriẹ mie gbikun na. Ra mẹriẹn taghene rhẹ i Baibol na yi mia tuẹn ẹmro mẹ rhọ-ọ, igbehian mẹ na guọlọ rhe oborẹ mie yono ihworho i Baibol na lele. Ọkezẹko, aye a nọ enọ kpahiẹn. Mia ha ona ọnana ruiruo na, nọ rienrian mẹ oma. Orho ru, oma nọ dabu merhen mẹ!”

17. Marhẹ yẹ ukẹro ra ha ni esegburhomẹmro ọwan o ru hobọte oborẹ a tẹmro rẹn awọrọ lele?

¹⁷ Wu rha họghọ rẹn awọrọ jeghwai dje ọdamẹ rẹn aye, aye ni ne ji ru omaran wẹn. Olivia rọ ha ẹgbukpe 17, ro bromarhame o ki te ẹgbukpe 13 nọ tare: “Ofẹn o mwu mẹ taghene mi rha tẹmro kpahen i Baibol na, ene ni mẹ jerẹ ọrọ kpare ẹga rhẹ urhomu.” Ọrẹn, ọke oru iroro Olivia no wenerin. Olivia ọrhọ tẹnrovi ofẹn na-a, ọke oru, nọ tare: “Iphuphẹn buebun e rhe emru owuorowu kpahen Iseri Jehova-a. Ame yẹ Iseri Jehova rẹ aye i rheri. Omarana, oborẹ ame a rhua oma ame lele ọnọ hobọte oborẹ aye ina kpahenrhọ rẹn ame lele. Me yẹ aye ine ruo, orhianẹ ofẹn o mwu ọwan rẹ ne ghwoghwo rẹn aye? Aye ni ne rhe roro taghene oma ọ vwọ merhen ọwan kpahen oborẹ e vwo esegburhomẹmro kpahe-en. Aye ina sabu kpahenrhọ gbalogbalo orhianẹ ọwan a tẹmro rhẹ imwẹro-o. Ọrẹn, arha dabu lele aye tẹmro rhẹ imwẹro kpahen oborẹ e vwo esegburhomẹmro kpahen, aye ni na họghọ rẹn ọwan.”

18. Me yo mevirhọ ra na wian na sabu vwo usimirhọ?

¹⁸ Sekpahen oborẹ e yono ne, a guọlọ owian na sabu dje oborẹ e vwo imwẹro kpahen phia. Ezẹko usuẹn ekwakwa enana yẹ ọrẹ ene se i Baibol na, roro kodo kpahiẹn, nẹrhomo vwe i Jehova jeghwai roro kpahen izede ri Jehova ọ yẹ ọwan ebrurhọ ne. Wu rhe fiomarhọ ekwakwa enana e ruo, wu na sabu ru onyerẹnkugbe wu vwori rhẹ i Jehova kpẹnkpẹnrhọ. Ọrana nẹ ọnọ ha userhumu wẹn sabu ta rẹn awọrọ kpahen oborẹ wu vwo esegburhomẹmro kpahen.​—⁠Se Psalm 73:⁠28.

19. Mesoriẹ o rhiẹ oborẹ o fori na wian ne vwo usimirhọ?

¹⁹ Jesu ọrhọ ta: “Kohworho kohworho rọ guọlọ nyaleli mẹ, jenẹ ọ tiẹn omayen nọ kpare orhan oja ọnẹyen no rho leli mẹ.” (Matt. 16:24) Itiọrurhomẹmro, wu na vi homakpahontọre jeghwai bromarhame vwẹre, wu ki rhiẹ Olele Kristi. Habaye, o ji rhie uphẹn buebun firhọ na sabu mẹrẹn ebrurhọ i Jehova ọke ọnana ye te ọke re ne vwo arhọ i bẹmẹdẹ. Omarana, no fori ne wu rha wian ne wu sabu vwo usimirhọ!