Wu dabu se irhomu-ẹmro ri ha uvuẹn Oghwa Odẹrẹ re nyavrẹn na? Nie sẹ wu na sabu kpahenrhọ enọ enana:

Emiemọ ri rhiẹ epha i rha guọlọ ha userhumu rẹn emọ aye, mesoriẹ o fo nẹ aye i roro kpahen edjadjẹ emọ na a djẹ?

Ọkezẹko, emọ na ina sabu yono edjadjẹ ra djẹ uvuẹn ẹkwotọre na uvuẹn isukuru ọrhẹ ekete aye e rhirhiẹ. Ono rhomu orhianẹ ọmọ na o rhe vrẹn edjadjẹ owu. O fori nẹ emiemọ i roro kpahen ukoko emọ na ine vwẹruọ urhomẹmro na, jeghwai ru riaro, sẹ uvuẹn ukoko ra djẹ edjadjẹ ẹkwotọre aye i havwọ na yanghene ọrẹ edjadjẹ emiemọ na. Emiemọ ri rhiẹ Ilele Kristi e roro kpahen e ru riaro emọ aye ukperẹ ono rhiẹ ọdamẹ omobọ aye.—w17.05, pp. 9-11.

Ọke i Jesu ọ nọ i Peter: “Wu vwo ẹguọlọ kpahen mẹ ghwẹ ekwakwa enana?” me yẹ ekwakwa rọ hunute na? (John 21:⁠15)

Ọ họhọre taghene i Jesu ọ tẹmro kpahen irhenrin ri ha obaro aye yanghene owian irhenrin ekpe. Ọke i Jesu o hwu hin, Peter nọ ghwẹrioma riẹ owian ro kpe irhenrin. O fori nẹ Ilele Kristi i dabu roro kpahen ukẹro rẹ aye a ha ni iruo aye.—w17.05, pp. 22-23.

Mesoriẹ Abraham ọ ta rẹn i Sarah nọ ta taghene ọye omizie? (Gen. 12:10-13)

Itiọrurhomẹmro, Sarah ghini omizu Abraham. Orhianẹ Sarah ọ tare taghene ọye aniẹ Abraham, manẹ e kpe Abraham, habaye, manẹ ọ vwọ sabu vwiẹ ọmọ rẹ Osolobrugwẹ o ve riẹn na-a.—wp17.3, pp. 14-15.

Ona ọgo yẹ Elias Hutter ọ ha ruiruo, nọ ha userhumu rẹn ihworho ri guọlọ yono Hebrew?

Ọ guọlọre nẹ ihworho i vwẹruọ ovẹnẹ rọ ha uvwre ẹmro i Hebrew na ọrhẹ ẹmro erọrọ ra habaye. Omarana, no rurie nẹ ẹmro i Hebrew na i havwọ kpotokpoto, ọrẹn, ẹmro erọrọ ra habaye obaro ọrhẹ oberhumu a havwọ kpotokpoto-o. Aruẹ ona ọnana ya ha ruiruo uvuẹn New World Translation of the Holy Scriptures—With References.—wp17.4, pp. 11-12.

Me yo fori no sun orhienbro Olele Kristi sẹ ono vwo okpọghọ uvuẹn oghwa nọ chochọn omayen?

Ekwakwa ezẹko yẹ: Osolobrugwẹ o ni arhọ ghanghanren. Jesu ọ ta rẹn idibo yi nẹ aye i kpare odan ọlọko nẹ aye i sabu chochọn omaye-en. (Luke 22:36, 38) O fori ne ru odan ọlọko ọwan rhẹ ekwakwa ra ha wian uvuẹn ikebi. Arhọ ọ ghanren ghwẹ ekwakwa ugboma. Ọwan e roro kpahen ẹhẹn obrorhiẹn awọrọ, habaye, ọwan i guọlọ dje omamọ udje phia. (2 Cor. 4:⁠2)—w17.07, pp. 31-32.

Mesoriẹ iyẹnrẹn i Matthew kpahen ọtonrhọ akpenyerẹn i Jesu ọ vẹnẹ iyẹnrẹn ọrẹ i Luke?

Matthew ọ tẹnrovi Joseph, jerẹ oborẹ o ruru ọke o rhe taghene i Mary ọ mẹrevwan ọrhẹ erhetio Osolobrugwẹ ọ yẹriẹ taghene aye i zẹ riẹ Egypt, kugbe ọke Osolobrugwẹ ọ ta rẹn aye nẹ aye i ghwẹrioma rhe. Luke ọ tẹnrovi Mary; jerẹ udje, ọ ta kpahen ọke ọ kọn bru Elizabeth ọrhẹ oborẹ i Mary o ruru ọke i Jesu ọ daji oghwa ẹga na.—w17.08, p. 32.

Me yẹ ekwakwa ezẹko ri Baibol na ọ dẹrughwaroghwu ne?

Ẹmro ezẹko ọrhẹ oborẹ aye i mevirhọ i wenerin ọke ẹgbukpe ezẹko a vrẹn ne. Usun ituakpọ ọ jeghwai hobọte edjadjẹ ihworho a djẹ. A jeghwai kparehaso owian ra na rhian i Baibol na rhẹ edjadjẹ rẹ ihworho buebun e vwẹruọ ye.—w17.09, pp. 19-21.

Ọwan i vwo ọmakashe rọ sẹrorẹ ọwan?

Ẹjo. Jesu ọ tare taghene emakashe erẹ idibo enẹyen a tẹnrovi ughwaro Osolobrugwẹ. (Matt. 18:10) Jesu ọ haye ta taghene emakashe i vwo ọdamẹ kpahen idibo yi, ọ vwọ haye ta taghene aye a ha izede igbevwunu sẹrorẹ aye owuowọnwa-an.—wp17.5, p. 5.

Aruo ẹguọlọ ọgo yọ mai ghanren?

A·gaʹpe yẹ aruo ẹguọlọ rọ mai ghanren arha bọn ye kpahen iruemru-urhi. O sekpahen ojemẹ ọrhẹ ọdamẹ re djephia. Habaye, o sekpahen iruemru-urhi ri gbare, ẹguọlọ ọnana o sekpahen irueruo re ruẹ rẹn awọrọ nẹ ẹhẹn sa.—w17.10, p. 7.